ಇಂಚೋನ್, ಅ.2: ಹದಿನೇಳನೆ ಏಷ್ಯನ್ ಗೇಮ್ಸ್ನ ಹಾಕಿಯ ಫೈನಲ್ನಲ್ಲಿ ಇಂದು ಭಾರತದ ಪುರುಷರ ತಂಡ ಹಾಲಿ ಚಾಂಪಿಯನ್ ಪಾಕಿಸ್ತಾನ ತಂಡವನ್ನು ಪೆನಾಲ್ಟಿ ಶೂಟೌಟ್ನಲ್ಲಿ 4-2 ಅಂತರದಿಂದ ಬಗ್ಗು ಬಡಿದು, ಹದಿನಾರು ವರ್ಷಗಳ ಚಿನ್ನದ ಬರ ನೀಗಿಸಿಕೊಂಡಿದೆ.
ಭಾರತದ ಹಾಕಿ ತಂಡ ಈ ಯಶಸ್ಸಿನೊಂದಿಗೆ 2016ರ ರಿಯೋ ಒಲಿಂಪಿಕ್ಸ್ಗೆ ಪ್ರವೇಶ ಗಿಟ್ಟಿಸಿಕೊಂಡಿದೆ. ಫೈನಲ್ನಲ್ಲಿ 32 ವರ್ಷಗಳ ಬಳಿಕ ಮತ್ತೊಮ್ಮೆ ಪಾಕ್ನ್ನು ಎದುರಿಸಿದ ಭಾರತ ತಂಡ ಹಾಲಿ ಚಾಂಪಿಯನ್ ಪಾಕ್ಗೆ 9ನೆ ಬಾರಿ ಚಿನ್ನ ಗೆಲ್ಲಲು ಅವಕಾಶ ನೀಡಲಿಲ್ಲ.
ಹಾಕಿಯಲ್ಲಿ ಚಿನ್ನ ಪಡೆಯುವುದರೊಂದಿಗೆ ಭಾರತದ ಖಾತೆಗೆ ಇಂದು ಅವಳಿ ಚಿನ್ನ ಜಮೆಯಾಗಿತ್ತು. ಮಹಿಳೆಯರ ತಂಡ ರೀಲೆಯಲ್ಲಿ ಚಿನ್ನ ಜಯಿಸಿತ್ತು. ಮಹಿಳೆಯರ 4 ್ಡ400 ಮೀಟರ್ ರೀಲೆಯಲ್ಲಿ ಭಾರತದ ಪ್ರಿಯಾಂಕ ಪವಾರ್, ಟಿಂಟು ಲುಕಾ, ಮನ್ದೀಪ್ ಕೌರ್ ಮತ್ತು ಎಂ.ಪೂವಮ್ಮ ತಂಡ 3 ನಿಮಿಷ 28.68 ಸೆಕೆಂಡ್ಗಳಲ್ಲಿ ಗುರಿ ತಲುಪಿ ಚಾಂಪಿಯನ್ ಪಟ್ಟವನ್ನು ಉಳಿಸಿಕೊಂಡಿತು.ಜಪಾನ್ ತಂಡ ಎರಡನೆ ಸ್ಥಾನ ಪಡೆಯಿತು. ಭಾರತದ ಇಂದ್ರಜಿತ್ ಸಿಂಗ್ ಶಾಟ್ಪುಟ್ನಲ್ಲಿ , ಬಾಕ್ಸಿಂಗ್ನಲ್ಲಿ ಸತೀಶ್ ಕುಮಾರ್ ಮತ್ತು ವಿಕಾಸ್ ಕೃಷ್ಣನ್ ಕಂಚು ಪಡೆದರು.
ಏಷ್ಯನ್ ಗೇಮ್ಸ್ನ 13ನೆ ದಿನವಾಗಿರುವ ಇಂದು ಭಾರತ ಎರಡು ಚಿನ್ನ, 3 ಕಂಚನ್ನು ಪಡೆದಿದ್ದು, ಪದಕ ಪಟ್ಟಿ ಯಲ್ಲಿ 9ನೆ ಸ್ಥಾನ ತಲುಪಿದೆ.
ಕಬಡ್ಡಿಯಲ್ಲಿ ಭಾರತದ ಪುರುಷರ ಹಾಗೂ ಮಹಿಳೆಯರ ತಂಡ ಫೈನಲ್ ಪ್ರವೇಶಿಸಿದೆ. ಶುಕ್ರವಾರ ಫೈನಲ್ ನಡೆಯಲಿದ್ದು ಭಾರತಕ್ಕೆ ಇನ್ನೆರಡು ಚಿನ್ನದ ಪದಕ ದೊರೆಯುವ ಸಾಧ್ಯತೆ ಇದೆ.
