ಟೈಮ್ಸ್ ನೌ ಪತ್ರಕರ್ತನ ಮೇಲೆ 4-6 ಮಂದಿ ಅಪರಿಚಿತರಿಂದ ಏಕಾಏಕಿ ಹಲ್ಲೆ

ಶನಿವಾರ ತಡರಾತ್ರಿ ಟೈಮ್ಸ್ ನೌ ವಾಹಿನಿಯ ಹರ್ಮನ್‌ ಗೋಮ್ಸ್ ಗೆಳೆಯನ ಜತೆ ಟ್ಯಾಕ್ಸಿಯಲ್ಲಿ ಮನೆಗೆ ಬರುತ್ತಿರುವಾಗ ಅಪರಿಚಿತರು ಕಾರು ತಡೆದಿದ್ದಾರೆ. ಕಾರಿನಿಂದ ಹರ್ಮನ್ ಕೆಳಗಿಳಿಯುತ್ತಿದ್ದಂತೆ 4-6 ಅಪರಿಚಿತರು ಏಕಾಏಕಿ ಹಲ್ಲೆ ನಡೆಸಿದ್ದಾರೆ ಎಂದು ಮುಂಬಯಿ (ವಲಯ-2)ಯ ಉಪ ಪೊಲೀಸ್ ಆಯುಕ್ತ ಧ್ಯಾನೇಶ್ವರ್ ಚವ್ಹಾಣ್ ತಿಳಿಸಿದ್ದಾರೆ.

ಗಾಯಗೊಂಡ ಪತ್ರಕರ್ತ ಹರ್ಮನ್ ಗಾಂದೇವಿ ಪೊಲೀಸ್ ಠಾಣೆಗೆ ನೀಡಿದ ದೂರಿನನ್ವಯ ಪ್ರಕರಣ ದಾಖಲಾಗಿದೆ.

ಪತ್ರಕರ್ತನ ಮೇಲಿನ ಹಲ್ಲೆಗೆ ಕಾರಣ ತಿಳಿದುಬಂದಿಲ್ಲ. ಹಲ್ಲೆ ನಡೆಸಿದವರ ಪತ್ತೆಗೆ ತನಿಖೆ ನಡೆಸಲಾಗುತ್ತಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಮುಂಬಯಿ ನಗರ ಪತ್ರಕರ್ತರ ಒಕ್ಕೂಟ ಹಲ್ಲೆಯನ್ನು ಖಂಡಿಸಿದ್ದು, ಪೊಲೀಸರು ಸರಿಯಾದ ರೀತಿಯಲ್ಲಿ ದೂರು ದಾಖಲಿಸಿಲ್ಲ ಎಂದು ಆರೋಪಿಸಿದ್ದಾರೆ.

ಮುಂಬಯಿ ಪ್ರೆಸ್ ಕ್ಲಬ್ ಮತ್ತು ನಗರ ಕ್ರೈಂ ಪತ್ರಕರ್ತರ ಒಕ್ಕೂಟ ಹೇಳಿಕೆ ಬಿಡುಗಡೆ ಮಾಡಿದ್ದು, ಹಲ್ಲೆಕೋರರನ್ನು ತಕ್ಷಣ ಬಂಧಿಸಿ ಸೂಕ್ತ ಕ್ರಮ ಕೈಗೊಳ್ಳುವಂತೆ ಸಿಎಂ ದೇವೇಂದ್ರ ಫಡ್ನವೀಸ್ ಅವರನ್ನು ಒತ್ತಾಯಿಸಿದೆ.