ಮುಂಬಯಿ: ಬ್ರೈನ್ ಡೆಡ್ ಆಗಿದ್ದ 54 ವರ್ಷದ ತಾಯಿಯ ಅಂಗಾಂಗಗಳನ್ನು ದಾನ ಮಾಡುವ ಮೂಲಕ ಇಬ್ಬರ ಜೀವಗಳನ್ನು ಯುವತಿಯೊಬ್ಬಳು ಉಳಿಸಿದ್ದಾಳೆ. ನಗರದ ವಿಲೇಪಾರ್ಲೆಯಲ್ಲಿ ಈ ಘಟನೆ ನಡೆದಿದ್ದು, ಈ ಮೂಲಕ ಮುಂಬಯಿ ಮಹಾನಗರದಲ್ಲಿ 2018ರಲ್ಲೇ 33 ಬ್ರೈನ್ ಡೆಡ್ ಆಗಿರುವ ಮನುಷ್ಯರ ದೇಹದ ಅಂಗಾಂಗಗಳನ್ನು ದಾನ ಮಾಡಲಾಗಿದೆ.
ಬೆಳಗ್ಗೆ ಟೀ ಕುಡಿಯುತ್ತಿದ್ದ ಉಜ್ವಲಾ ಇದ್ದಕ್ಕಿದ್ದಂತೆ ಕುಸಿದುಬಿದ್ದರು. ನಂತರ, ಅವರನ್ನು ನಾನಾವತಿ ಆಸ್ಪತ್ರೆಗೆ ಕರೆದೊಯ್ಯಲಾಗಿದ್ದು, ವೈದ್ಯರು ಅವರಿಗೆ ಚಿಕಿತ್ಸೆ ನೀಡಿದರೂ ಯಾವುದೇ ಪ್ರಯೋಜನವಾಗಲಿಲ್ಲ. ನಂತರ, ಅವರಿಗೆ ಸ್ಟ್ರೋಕ್ ಆಗಿದೆ ಎಂದು ಹೇಳಿದ ವೈದ್ಯರು, ಬಳಿಕ ಉಜ್ವಲಾ ಬ್ರೈನ್ ಡೆಡ್ ಆಗಿದ್ದು, ಅವರ ಅಂಗಾಂಗಗಳನ್ನು ಬೇರೆಯವರಿಗೆ ದಾನಮಾಡಬಹುದು ಎಂದು ಕುಟುಂಬಕ್ಕೆ ತಿಳಿಸಿದರು ಎಂದು ಉಜ್ವಲಾರ ಪುತ್ರಿ ಅಶ್ವಿನಿ ತಿವಾರಿ ಮಾಹಿತಿ ನೀಡಿದ್ದಾರೆ. ಅಲ್ಲದೆ, ಅಂಗಾಂಗ ದಾನದ ಬಗ್ಗೆ ತಾನು ಶಾಲೆಯ ಪದ್ಯವೊಂದರಲ್ಲಿ ಓದಿದ್ದೆ. ಹೀಗಾಗಿ, ನಮ್ಮ ಕುಟುಂಬದವರಿಗೆ ಈ ಬಗ್ಗೆ ತಿಳಿಸಿದೆ. ಜತೆಗೆ, ತನ್ನ ತಾಯಿ ಸುತ್ತಮುತ್ತಲ ಜನರಿಗೆಲ್ಲ ನೆರವಾಗುತ್ತಿದ್ದರು. ಹೀಗಾಗಿ, ಅವರ ಅಂಗಾಂಗಗಳ ದಾನದ ಮೂಲಕ ಅಂಗಾಂಗ ವೈಫಲ್ಯಗೊಂಡು ತೀವ್ರ ಗಂಭೀರವಾಗಿರುವ ರೋಗಿಗಳಿಗೆ ಸಹಾಯ ಮಾಡಬಹುದು. ಈ ಮೂಲಕ ತನ್ನ ತಾಯಿ ಸಹ ಜೀವಂತವಾಗಿರುತ್ತಾರೆ ಎಂದು ಯುವತಿ ಹೇಳಿದ್ದಾಳೆ.
ಇನ್ನು, ಆಕೆಯ ದೇಹದಿಂದ ಹಲವು ಅಂಗಾಂಗಗಳನ್ನು ದಾನ ಮಾಡಲು ಕುಟುಂಬ ಒಪ್ಪಿಗೆ ನೀಡಿದರೂ ಸಹ, ಆಕೆಯ ಆರೋಗ್ಯದ ವಿಚಾರಗಳ ಹಿನ್ನೆಲೆ ದೇಹದಿಂದ ಯಕೃತ್ತು ಹಾಗೂ ಕಿಡ್ನಿಯನ್ನು ಮಾತ್ರ ನೀಡಲು ವೈದ್ಯರು ಸೂಚಿಸಿದ್ದರು. ನಾನಾವತಿ ಆಸ್ಪತ್ರೆಯಲ್ಲೇ ಕಿಡ್ನಿ ಕಸಿ ಮಾಡಲು ನೋಂದಾಯಿಸಿಕೊಂಡಿದ್ದ ವ್ಯಕ್ತಿಯೊಬ್ಬರಿಗೆ ಆಕೆಯ ಕಿಡ್ನಿ ದಾನ ಮಾಡಿದ್ದು, ಮುಂಬಯಿಯ ಗ್ಲೋಬಲ್ ಆಸ್ಪತ್ರೆಯಲ್ಲಿದ್ದ ರೋಗಿಗೆ ಯಕೃತ್ತು ದಾನ ಮಾಡಲಾಗಿದೆ ಎಂದು ಅಧಿಕಾರಿ ಮಾಹಿತಿ ನೀಡಿದ್ದಾರೆ. ನಾನಾವತಿ ಆಸ್ಪತ್ರೆಯಲ್ಲೇ ಈ ವರ್ಷ 4 ಅಂಗಾಂಗ ದಾನ ಮಾಡಲಾಗಿದ್ದು, ಈ ತಿಂಗಳ ಆರಂಭದಲ್ಲೇ ನಗರದಲ್ಲಿ 48 ಗಂಟೆಗಳಲ್ಲಿ ಎರಡು ಅಂಗಾಂಗ ದಾನ ಮಾಡಲಾಗಿತ್ತು ಎಂದು ಅವರು ತಿಳಿಸಿದ್ದಾರೆ.
Comments are closed.