ಕರ್ನಾಟಕ

ಶೃಂಗೇರಿಯಲ್ಲಿ ಬಂದ್‌; ವಿವಾದ, ಪ್ರತಿಭಟನೆ, ಪ್ರತಿರೋಧದ ನಡುವೆ ನಡೆದ ಜಿಲ್ಲಾ ಕನ್ನಡ ಸಾಹಿತ್ಯ ಸಮ್ಮೇಳನ

Pinterest LinkedIn Tumblr


ಚಿಕ್ಕಮಗಳೂರು: ಬಂದ್‌, ಪ್ರತಿಭಟನೆಯಂಥ ಪ್ರತಿರೋಧಗಳ ನಡುವೆಯೇ ಶೃಂಗೇರಿಯಲ್ಲಿ ಶುಕ್ರವಾರ 16ನೇ ಜಿಲ್ಲಾ ಕನ್ನಡ ಸಾಹಿತ್ಯ ಸಮ್ಮೇಳನ ಶುಕ್ರವಾರ ಆರಂಭವಾಗಿ ಒಂದೇ ದಿನಕ್ಕೆ ಸೀಮಿತಗೊಂಡಿತು.

ಪೊಲೀಸರ ಆಗ್ರಹದ ಮೇರೆಗೆ ಎರಡು ದಿನಗಳ ಕಾರ್ಯಕ್ರಮವನ್ನು ಒಂದು ದಿನಕ್ಕೆ ಮುಕ್ತಾಯಗೊಳಿಸಲಾಗಿದ್ದು, 2ನೇ ದಿನದ ಕಾರ್ಯಕ್ರಮವನ್ನು ಮುಂದೂಡಿರುವುದಾಗಿ ಸಂಘಟಕರು ಪ್ರಕಟಿಸಿದ್ದಾರೆ.

ಕಲ್ಕುಳಿ ವಿಠಲ ಹೆಗ್ಡೆ ಅವರನ್ನು ಅಧ್ಯಕ್ಷರಾಗಿ ಆಯ್ಕೆ ಮಾಡಿದ್ದಕ್ಕೆ ವಿರೋಧ ವ್ಯಕ್ತಪಡಿಸಿದ ಬಲಪಂಥೀಯ ಸಂಘಟನೆಗಳು ಕಸಾಪ ಉಳಿಸಿ ಸಮಿತಿ ಮತ್ತು ನಕ್ಸಲ್‌ ವಿರೋಧಿ ಹೋರಾಟ ಸಮಿತಿ ಬಂದ್‌ಗೆ ಕರೆ ನೀಡಿದ್ದರಿಂದ ಶೃಂಗೇರಿ ಪಟ್ಟಣ ಬೆಳಗ್ಗೆಯಿಂದಲೂ ಸ್ತಬ್ಧವಾಗಿತ್ತು.

ವಾಹನಗಳ ಓಡಾಟ ಬಿಟ್ಟರೆ ಅಂಗಡಿಮುಂಗಟ್ಟುಗಳು ಮುಚ್ಚಿದ್ದವು. ಸಮ್ಮೇಳನಕ್ಕೂ ಅನುಮತಿ ಇಲ್ಲ, ಪ್ರತಿಭಟನೆಗೂ ಅನುಮತಿ ಇಲ್ಲಎಂದು ಪೊಲೀಸರು ಬಂದೋಬಸ್ತ್‌ ಏರ್ಪಡಿಸಿದ್ದರು. ಕಾನೂನು ಪರಿಧಿಯೊಳಗೆ ಏನೆಲ್ಲ ಮಾಡಬಹುದು ಎಂದು ಚಿಂತನೆ ನಡೆಸಿ ಸಮ್ಮೇಳನಾಧ್ಯಕ್ಷರ ಮೆರವಣಿಗೆ ರದ್ದು ಮಾಡಿ ಒಳ ಆವರಣದಲ್ಲಿಕಸಾಪ ಸಮ್ಮೇಳನ ನಡೆಸಿತು. ಆದಿಚುಂಚನಗಿರಿ ಸಮುದಾಯ ಭವನದ ಬಳಿ ಜನಜಾತ್ರೆ ಏರ್ಪಟ್ಟಿತ್ತು. ಪೊಲೀಸರು ಪರಿಶೀಲಿಸಿ ಒಳಗೆ ಕಳಿಸಿದರು.

ಕಿಮ್ಮನೆ ಶಾಂತಿ ಪಾಠ

ಸ್ಥಳಕ್ಕೆ ಬಂದಿಳಿದ ಸಮ್ಮೇಳನಾಧ್ಯಕ್ಷ ಕಲ್ಕುಳಿ ವಿಠಲ ಹೆಗ್ಡೆಗೆ ಮೈಸೂರು ಪೇಟ ತೊಡಿಸಿ, ಶಾಲು ಹೊದಿಸಿ, ಹಾರ ಹಾಕಿ ಸ್ವಾಗತಿಸಲಾಯಿತು. ಆವರಣದೊಳಗೆ ವಾದ್ಯ ಮೇಳೈಸಿತು. ಪುಸ್ತಕ ಮಳಿಗೆಗಳಿಗೆ ಭೇಟಿ ನೀಡಿದ ಹೆಗ್ಡೆ ಅವರನ್ನು ನೂರಾರು ಜನ ಸುತ್ತುವರಿದು ವಾದ್ಯಕ್ಕೆ ಹೆಜ್ಜೆ ಹಾಕಿದರು. ಅಲ್ಲಿಂದ ವೇದಿಕೆವರೆಗೂ ಹೆಗಲಮೇಲೆ ಹೊತ್ತು ಜೈಕಾರ ಹಾಕುತ್ತ ಕರೆತಂದರು.

ಧ್ವನಿವರ್ಧಕ ಬಳಸುವಂತಿಲ್ಲ. ಬೇಕಿದ್ದರೆ ಸಭಾಂಗಣದೊಳಗೆ ಮೈಕ್‌ ಹಾಕಿಕೊಂಡು ಸಮ್ಮೇಳನ ಮಾಡಿ ಎಂದು ಪೊಲೀಸರು ತಾಕೀತು ಮಾಡಿದ್ದರು. ವೇದಿಕೆ ಏರಿದ ಮಾಜಿ ಸಚಿವ ಕಿಮ್ಮನೆ ರತ್ನಾಕರ್‌, ‘‘35 ವರ್ಷ ವಕೀಲಿಕೆ ಮಾಡಿದ್ದೇನೆ. ನನಗೆ ಕಾನೂನಿನ ಅರಿವಿದೆ. ನೀವು ಮೈಕ್‌ ಹಾಕಿ’’ ಎಂದು ಧ್ವನಿವರ್ಧಕದ ವ್ಯವಸ್ಥೆ ಮಾಡಿಸಿದರು.

ಆರಂಭದಲ್ಲೇ ಮೈಕ್‌ ಹಿಡಿದ ಕಿಮ್ಮನೆ ರತ್ನಾಕರ್‌, ಇದು ಕನ್ನಡದ ಹಬ್ಬ. ಖಾಸಗಿ ಜಾಗದ ಆವರಣದಲ್ಲಿನಡೆಯುತ್ತಿದೆ. ಎಲ್ಲಿಮೈಕ್‌ ಹಾಕಬೇಕು, ಹಾಕಬಾರದು ಎಂಬುದರ ಅರಿವು ನನಗಿದೆ. ಅಷ್ಟಕ್ಕೂ ಪೊಲೀಸರು ಕೇಸು ಹಾಕುವುದಾದರೆ ಮೊದಲು ನನ್ನ ಮೇಲೇ ಹಾಕಲಿ. ಅದನ್ನು ನಾನು ಎದುರಿಸುತ್ತೇನೆ ಎಂದರು.

ಹೊರಗೆ ಪ್ರತಿಭಟನೆ ಮಾಡುವವರ ಬಗ್ಗೆ ತಲೆ ಕೆಡಿಸಿಕೊಳ್ಳಬೇಡಿ. ಶಾಂತಿ, ಸಹನೆ, ತಾಳ್ಮೆಯಿಂದ ಮಾತ್ರ ಗೆಲ್ಲಲು ಸಾಧ್ಯ. ಬುದ್ಧ, ಬಸವ, ಗಾಂಧಿ ಎಲ್ಲರೂ ಶಾಂತಿಯಿಂದಲೇ ಗೆದ್ದರು. ಸರ್ವಾಧಿಕಾರಿ ಹಿಟ್ಲರ್‌ನಂತಹವರಿಗೆ ಕೊನೆಗೆ ಜಾಗ ಇರುವುದಿಲ್ಲ. ಹಿಟ್ಲರ್‌ ವರ್ತನೆ ಮಾಡುವವರಿಗೆ ಜನರೇ ದಾರಿ ತೋರಿಸುತ್ತಾರೆ ಎಂದು ಕಿಮ್ಮನೆ ಕನ್ನಡಾಭಿಮಾನಿಗಳಿಗೆ ಶಾಂತಿಯ ಪಾಠ ಹೇಳಿದರು.

ಸಮ್ಮೇಳನ ಬೇಕು, ಸಮ್ಮೇಳನಾಧ್ಯಕ್ಷರು ಬೇಡ ಎಂದು ಘೋಷಣೆ ಕೂಗುತ್ತಿದ್ದವರನ್ನು ಪೊಲೀಸರು ಬಂಧಿಸಿ ಕರೆದೊಯ್ದರು. ಕೆಲವೇ ನಿಮಿಷದಲ್ಲಿ ಮತ್ತೊಂದಿಷ್ಟು ಜನ ಆಗಮಿಸಿ ಧಿಕ್ಕಾರ ಕೂಗಿದರು. ಈ ಪ್ರಕ್ರಿಯೆ ನಿರಂತರವಾಗಿ ನಡೆಯಿತು.

ಸಹಸ್ರಾರು ಸಂಖ್ಯೆಯಲ್ಲಿನೆರೆದಿದ್ದ ಜನ ಮೊದಮೊದಲು ಕುತೂಹಲದಿಂದ ಅತ್ತ ನೋಡಿದರೂ ನಂತರ ಸಮ್ಮೇಳನದೊಳಗೆ ತನ್ಮಯರಾದರು. ಪೊಲೀಸ್‌ ಠಾಣೆ ಎದುರು ಪ್ರತಿಭಟಿಸಿದವರಿಗೆ ಜಿಲ್ಲಾಧಿಕಾರಿ ಡಾ. ಬಗಾದಿ ಗೌತಮ್‌, ಎಸ್ಪಿ ಹರೀಶ್‌ ಪಾಂಡೆ ಸಹನೆಯಿಂದ ವರ್ತಿಸುವಂತೆ ಮನವಿ ಮಾಡಿದರು.

ಅನುಮತಿ ಇಲ್ಲದೆ ಸಮ್ಮೇಳನ ನಡೆಸುತ್ತಿರುವುದನ್ನು ತಡೆಯುವಂತೆ ಪಟ್ಟು ಹಿಡಿದಾಗ, ನೀವೂ ಅನುಮತಿ ಇಲ್ಲದೆ ಪ್ರತಿಭಟನೆ ಮಾಡುತ್ತಿದ್ದೀರಿ ಎಂದು ತಿರುಗೇಟು ನೀಡಿದರು.

Comments are closed.