ರಾಜ್ಯ ಬಿಜೆಪಿಗೆ ಶಾ ಭರ್ಜರಿ ಸರ್ಜರಿ! ರಾಜ್ಯಾಧ್ಯಕ್ಷ ಸ್ಥಾನಕ್ಕೆ ಕಟೀಲು! ರಾಜ್ಯಪಾಲರಾಗಿ ಯಡಿಯೂರಪ್ಪ!!

ರಾಜ್ಯದಲ್ಲಿ ಬಿಜೆಪಿಯನ್ನು ತಳಮಟ್ಟದಿಂದ ಹೊಸತಾಗಿ ಕಟ್ಟಿ ನಿಲ್ಲಿಸಲು ಹೈಕಮಾಂಡ್ ಪಣತೊಟ್ಟಂತಿದೆ. ಸಮ್ಮಿಶ್ರ ಸರ್ಕಾರವನ್ನು ಯಶಸ್ವಿಯಾಗಿ ಉರುಳಿಸಿ ಹೊಸ ಸರ್ಕಾರ ರಚನೆಯ ಹುಮ್ಮಸ್ಸಿನಲ್ಲಿದ್ದ ಬಿಎಸ್​ವೈ ಪಡೆಗೆ ಸಿಎಂ ಕ್ಯಾಂಡಿಡೇಟ್​ ಬದಲಾಯಿಸುವ ಮೂಲಕ ಶಾಕ್​ ನೀಡಿದ್ದು ಈಗ ಹೈಕಮಾಂಡ್​ ರಾಜ್ಯಾಧ್ಯಕ್ಷ ಸ್ಥಾನದಿಂದಲೂ ಬಿಎಸ್​ವೈರನ್ನು ಹೊರಗಿಡಲಿದೆ. ಬಿಜೆಪಿ ಮುಂದಿನ ಪ್ಲ್ಯಾನ್​ ಏನು ಇಲ್ಲಿದೆ ಡಿಟೇಲ್ಸ್​.

ಹೌದು ಅದಾಗಲೇ ವೈಟ್ ಸಫಾರಿಯೊಂದಿಗೆ ಪ್ರಮಾಣ ವಚನಕ್ಕೆ ಸಜ್ಜಾಗಿದ್ದ ಬಿಎಸ್​ವೈಗೆ ಹೈಕಮಾಂಡ್​​ ಸಖತ್ ಶಾಕ್​ ನೀಡಿದೆ. ಅಚ್ಚರಿಯ ಬೆಳವಣಿಗೆಯಲ್ಲಿ ಶಾಸಕ ಮಾಧುಸ್ವಾಮಿಯನ್ನು ಸಿಎಂ ಮಾಡಲು ಹೊರಟಿದೆ. ಅಷ್ಟೇ ಅಲ್ಲ ಈ ಬೆಳವಣಿಗೆಯಿಂದ ನೊಂದಿರುವ ಬಿಎಸ್​ವೈಗೆ ರಾಜ್ಯಪಾಲ ಸ್ಥಾನ ನೀಡಿ ಮನವೊಲಿಸಲಾಗುತ್ತದೆ.

ಇನ್ನು ಬಿಎಸ್​ವೈ ರಾಜ್ಯಪಾಲರಾಗಿ ನಿಯುಕ್ತರಾದರೇ ಖಾಲಿಯಾಗುವ ರಾಜ್ಯಾಧ್ಯಕ್ಷ ಸ್ಥಾನಕ್ಕೆ ಕರಾವಳಿಗೆ ಪ್ರಾಧಾನ್ಯತೆ ನೀಡಲು ಚಿಂತನೆ ನಡೆಸಿರುವ ಬಿಜೆಪಿ ರಾಜ್ಯಾಧ್ಯಕ್ಷರ ಹೊಣೆಗಾರಿಕೆಯನ್ನು ನಳಿನ್ ಕುಮಾರ್ ಕಟೀಲು ಹೆಗಲೇರಿಸಲು ನಿರ್ಧರಿಸಿದೆ.

ಆದರೆ ಇದ್ಯಾವುದಕ್ಕೂ ಬಿಎಸ್​ವೈ ಒಪ್ಪದೇ ತಮ್ಮನ್ನೇ ಸಿಎಂ ಮಾಡಬೇಕೆಂದು ಆಗ್ರಹಿಸಿದ್ದಾರೆ. 6 ತಿಂಗಳಾದ್ರೂ ನಾನು ಸಿಎಂ ಆಗಿರುತ್ತೇನೆ. ಆಮೇಲೆ ನಿಮಗೆ ಬೇಕಾದವರನ್ನು ಆಯ್ಕೆ ಮಾಡಿ ಎಂದು ಬಿಎಸ್​ವೈ ಹೈಕಮಾಂಡ್​ಗೆ ಒತ್ತಾಯಿಸಿದ್ದಾರೆ. ಆದರೆ ಇದಕ್ಕೆ ಒಪ್ಪದ ಹೈಕಮಾಂಡ್ ನಿಮ್ಮನ್ನು ಮಹಾರಾಷ್ಟ್ರದ ರಾಜ್ಯಪಾಲರನ್ನಾಗಿ ನೇಮಿಸುತ್ತೇವೆ. ನಿಮ್ಮ ಪುತ್ರನಿಗೆ ಸಚಿವ ಸಂಪುಟದಲ್ಲಿ ಸ್ಥಾನ ನೀಡುತ್ತೇನೆ ಎಂದು ಮನವೊಲಿಸಿದೆ.

ಆದರೆ ಇದಕ್ಕೆ ಬಿಎಸ್​ವೈ ಒಪ್ಪಿಲ್ಲ. ಹೀಗಾಗಿ ಬಿಎಸ್​ವೈ ತಂಡಕ್ಕೆ ಖಡಕ್​ ಎಚ್ಚರಿಕೆ ನೀಡಿರುವ ಹೈಕಮಾಂಡ್​ ಅತೃಪ್ತರನ್ನು ಇಟ್ಟುಕೊಂಡು ಸರ್ಕಾರ ರಚಿಸುವುದು ಅಷ್ಟು ಸುಲಭದ ಕೆಲಸವಲ್ಲ. ನಮ್ಮ ಪ್ರಸ್ತಾಪ ನಿಮಗೆ ಒಪ್ಪಿಯಾಗದೇ ಇದ್ದರೇ ಚುನಾವಣೆಗೆ ಹೋಗೋಣ ಎಂದು ಸ್ಪಷ್ಟವಾಗಿ ಆದೇಶಿಸಿದೆ ಎನ್ನಲಾಗುತ್ತಿದೆ. ಹೀಗಾಗಿ ಕಮಲ ಪಾಳಯದಲ್ಲಿ ಇದೀಗ ತಲ್ಲಣ ಆರಂಭಗೊಂಡಿದೆ.