ಕರ್ನಾಟಕ

ಈ ಬಾರಿ ಮತಹಾಕಲು ಮತದಾನದ ಗುರುತಿನ ಚೀಟಿ ಬೇಡ

Pinterest LinkedIn Tumblr


ಬೆಂಗಳೂರು: ಈ ಬಾರಿ ಮತದಾನ ಮಾಡಲು ನಿಮ್ಮ ಬಳಿ ವೋಟರ್​ ಐಡಿ ಇರಬೇಕಿಲ್ಲ. ಯಾಕೆ ಗೊತ್ತೇ? ಪ್ರತೀ ಬಾರಿ ಮತದಾರ ಮತಗಟ್ಟೆಯ ಅಧಿಕಾರಿಗೆ ತನ್ನ ವೋಟರ್​ ಐಡಿ ತೋರಿಸಬೇಕಿತ್ತು. ಅದಾದ ನಂತರ ಮತದಾರರ ಪಟ್ಟಿಯಲ್ಲಿ ಹೆಸರಿದೆಯೇ ಎಂಬುದನ್ನು ನೋಡಿದ ನಂತರ ಚುನಾವಣಾಧಿಕಾರಿ ಮತಹಾಕಲು ಅನುಮತಿ ನೀಡುತ್ತಿದ್ದರು. ಆದರೆ ಈ ಬಾರಿ ವೋಟರ್​ ಐಡಿ ಇಲ್ಲದಿದ್ದರೂ ನೀವು ಮತಹಾಕಬಹುದು. ಹೇಗೆ? ಉತ್ತರ ಇಲ್ಲಿದೆ.

ಭಾನುವಾರ ಕೇಂದ್ರ ಚುನಾವಣಾ ಆಯೋಗದ ಆಯುಕ್ತ ಸುನೀಲ್​ ಅರೋರಾ ಪತ್ರಿಕಾಗೋಷ್ಠಿ ನಡೆಸಿ ಚುನಾವಣಾ ದಿನಾಂಕ ಘೋಷಿಸಿದ ಬೆನ್ನಲ್ಲೇ ಬೆಂಗಳೂರಿನಲ್ಲಿ ರಾಜ್ಯ ಚುನಾವಣಾ ಆಯುಕ್ತ ಸಂಜೀವ್​ ಕುಮಾರ್​ ಮಾಧ್ಯಮಗೋಷ್ಠಿ ನಡೆಸಿದರು. ಗೋಷ್ಠಿಯಲ್ಲಿ ಚುನಾವಣೆಯ ರೂಪುರೇಷೆಗಳ ಬಗ್ಗೆ ಮಾತನಾಡಿದ ಸಂಜೀವ್​ ಕುಮಾರ್​ ಈ ಬಾರಿ ಮತದಾನದ ವೇಳೆ ವೋಟರ್​ ಐಡಿ ತೋರಿಸುವುದು ಕಡ್ಡಾಯವಲ್ಲ ಎಂಬ ಮಾಹಿತಿ ನೀಡಿದ್ದಾರೆ.

ವೋಟರ್​ ಪಟ್ಟಿಯಲ್ಲಿ ಮತದಾರನ ಹೆಸರಿದ್ದರೆ ಸಾಕು ಜತೆಗೆ ಗುರುತಿನ ಚೀಟಿ ಯಾವುದಾದರೂ ಒಂದನ್ನು ತೋರಿಸಬೇಕು. ಗುರುತಿನ ಚೀಟಿಯಲ್ಲಿರುವ ಹೆಸರು, ಭಾವಚಿತ್ರ ಮತ್ತು ವೋಟರ್​ ಪಟ್ಟಿಯಲ್ಲಿರುವ ಹೆಸರಿಗೂ ಹೊಂದಿಕೆಯಾದರೆ ಮತದಾನ ಮಾಡಬಹುದು. ಈ ಹಿಂದೆ ವೋಟರ್​ ಐಡಿ ಕಳುವಾದರೆ ಅಥವಾ ತರುವುದನ್ನು ಮರೆತಿದ್ದರೆ ಮತದಾನ ಮಾಡಲು ಆಗುತ್ತಿರಲಿಲ್ಲ. ಆದರೀಗ ಚುನಾವಣಾ ಆಯೋಗದ ಹೊಸ ನೀತಿಯಿಂದ ಈ ಸಮಸ್ಯೆಗೆ ಪರಿಹಾರ ಸಿಕ್ಕಂತಾಗಿದೆ.

ಪ್ಯಾನ್​ ಕಾರ್ಡ್​, ಆಧಾರ್​ ಕಾರ್ಡ್​, ಪಾಸ್​ಪೋರ್ಟ್​, ಎಸ್​ಎಸ್​ಎಲ್​ಸಿ ಮಾರ್ಕ್ಸ್​ ಕಾರ್ಡ್​, ರೇಷನ್​ ಕಾರ್ಡ್​ ಡ್ರೈವಿಂಗ್​ ಲೈಸೆನ್ಸ್​, ಕೇಂದ್ರ/ರಾಜ್ಯ ಸರ್ಕಾರಿ ನೌಕರರ ಐಡಿ ಕಾರ್ಡ್​, ನರೇಗಾ ಉದ್ಯೋಗ ಕಾರ್ಡ್​, ಕಾರ್ಮಿಕ ಇಲಾಖೆಯಿಂದ ನೀಡಿದ ಹೆಲ್ತ್​ ಇನ್ಶೂರೆನ್ಸ್​ ಕಾರ್ಡ್​, ಪಿಂಚಣಿ ಕಾರ್ಡ್​, ಶಾಸಕ, ಸಂಸದರ ಐಡಿ ಕಾರ್ಡ್​ಗಳಲ್ಲಿ ಯಾವುದಾದರೂ ಒಂದನ್ನು ತೋರಿಸಿ ನೀವು ಮತ ಹಾಕಬಹುದು. ಇದರಿಂದ ಮರೆಗುಳಿಗಳಿಗೆ ಅಥವಾ ಚುನಾವಣೆ ಹತ್ತಿರವಿದೆ ಎಂಬ ಕ್ಷಣದಲ್ಲಿ ವೋಟರ್​ ಐಡಿ ಕಳೆದುಕೊಂಡವರಿಗೆ ತಮ್ಮ ಮತದಾನದ ಹಕ್ಕನ್ನು ಚಲಾಯಿಸಲು ಸಹಕಾರಿಯಾಗಲಿದೆ.

Comments are closed.