ಕರ್ನಾಟಕ

ದೇಶ ತೊರೆದ ನಿತ್ಯಾನಂದ!

Pinterest LinkedIn Tumblr


ಬೆಂಗಳೂರು: ಸಾಲು ಸಾಲು ಉದ್ಯಮಿಗಳು ದೇಶ ತೊರೆದ ನಂತರ ಈಗ ಸನ್ಯಾಸಿಯ ಸರದಿ ಬಂದಿದೆ. ವಿವಾದಾತ್ಮಕ ‘ದೇವಮಾನವ’ ಸ್ವಾಮಿ ನಿತ್ಯಾನಂದ ದೇಶ ತೊರೆದಿದ್ದಾರೆ ಎಂಬ ಅನುಮಾನ ವ್ಯಕ್ತವಾಗಿದೆ. ಮದ್ಯ ದೊರೆ ವಿಜಯ್​ ಮಲ್ಯ, ನೀರವ್​ ಮೋದಿ ಹಾಗೂ ಮೆಹುಲ್​​ ಚೋಕ್ಸಿ ಬಳಿಕ ನಿತ್ಯಾನಂದ ದೇಶ ಬಿಟ್ಟು ಪರಾರಿಯಾಗಿದ್ದಾರೆ ಎಂಬ ಮಾತುಗಳು ಉನ್ನತ ಮೂಲಗಳಿಂದ ಕೇಳಿ ಬರುತ್ತಿದೆ.

ನಿತ್ಯಾನಂದ ಕಳೆದ ಸೆಪ್ಟೆಂಬರ್​ನಲ್ಲಿ ಬಹಿರಂಗವಾಗಿ ಕಾಣಿಸಿಕೊಂಡಿದ್ದರು. ನಂತರದ ದಿನಗಳಲ್ಲಿ ದೇಶದಲ್ಲಿ ಎಲ್ಲಿಯೂ ಕಾಣಸಿಕೊಂಡಿಲ್ಲ ಎನ್ನಲಾಗಿದೆ. ತನ್ನ ಮೇಲಿನ ಕೋರ್ಟ್​ ಕೇಸ್​ಗಳಿಗೆ ಹೆದರಿ ಪಲಾಯನ ಮಾಡಿದ್ದಾರೆ ಎಂಬ ಅನುಮಾನ ಮೂಲಗಳಿಂದ ವ್ಯಕ್ತವಾಗಿದೆ. ಅತ್ಯಾಚಾರದ ಆರೋಪ ಹೊತ್ತು ಜೈಲು ಪಾಲಾಗಿದ್ದ ಈತನ ವಿರುದ್ದ ವಿವಿಧ ಠಾಣೆಗಳಲ್ಲಿ ಪ್ರಕರಣ ದಾಖಲಾಗಿವೆ. ಪ್ರಕರಣದ ತನಿಖೆ ತೀವ್ರಗೊಳ್ಳುತ್ತಿದ್ದಂತೆ ನಿತ್ಯಾನಂದ ಓಡಿ ಹೋಗಿದ್ದಾರೆ ಎಂದು ತನಿಖಾಧಿಕಾರಿಗಳು ಸಂಶಯ ವ್ಯಕ್ತಪಡಿಸಿದ್ದಾರೆ.

ಕಳೆದ 3 ತಿಂಗಳಿಂದ ಕಾಣೆ:

ಕಳೆದ 3 ತಿಂಗಳಿಂದ ಯಾರ ಕಣ್ಣಿಗೂ ಕಾಣಿಸಿಲ್ಲ, ಬಿಡದಿ ಮಠದಿಂದ ಕಾಲ್ಕಿತ್ತಿದ್ದಾರೆ ಎನ್ನಲಾಗಿದೆ. ವಾರಣಾಸಿಯಲ್ಲಿ ಚಾತುರ್ಮಾಸದ ಪರಿಕ್ರಮದಲ್ಲಿ ಇದ್ದಾರೆ ಎಂದು ಆಶ್ರಮದ ಸನ್ಯಾಸಿಗಳು ಹೇಳುತ್ತಿದ್ದಾರೆ. ಆದರೆ ಅಲ್ಲಿಯೂ ಇಲ್ಲ ಎಂಬುದು ಪೊಲೀಸರ ಅನುಮಾನ. ಸಿಐಡಿ ಅಧಿಕಾರಿಗಳಿಗೂ ಈ ಬಗ್ಗೆ ಅನುಮಾನ ವ್ಯಕ್ತವಾಗಿದೆ.

ರಾಮನಗರ ಕೋರ್ಟ್​​ನಲ್ಲಿ ನಡೆಯುತ್ತಿರುವ ವಿಚಾರಣೆಗೂ ಹಾಜರಾಗುತ್ತಿಲ್ಲ. ಜಾಮೀನು ರಹಿತ ಬಂಧನ ವಾರೆಂಟ್​ ಜಾರಿಯಾಗಿದ್ದರೂ ನಿತ್ಯಾನಂದನಿಗೆ ವಾರೆಂಟ್​ ಜಾರಿ ಮಾಡಲು ಪೊಲೀಸರಿಗೆ ಸಾಧ್ಯವಾಗುತ್ತಿಲ್ಲ. ಎಷ್ಟೇ ಹುಡುಕಾಟ ನಡೆಸಿದರೂ ನಿತ್ಯಾನಂದ ಸಿಕ್ಕಿಲ್ಲ. ಬಂಧನ ವಾರೆಂಟ್​ ಪ್ರಶ್ನಿಸಿ ಆತನ ಪರ ವಕೀಲರು ಹೈಕೋರ್ಟ್​ನಲ್ಲಿ ಅರ್ಜಿ ಸಲ್ಲಿಸಿದ್ದಾರೆ. 3 ತಿಂಗಳಿಂದ ವಾದ ಪ್ರತಿವಾದ ನಡೆದು ಆದೇಶ ಕಾಯ್ದಿರಿಸಿದೆ. ಹೈಕೋರ್ಟ್​ ಆದೇಶ ಬರುವ ಮುನ್ನವೇ ನಿತ್ಯಾನಂದ ದೇಶ ಬಿಟ್ಟು ಓಡಿ ಹೋಗಿದ್ದಾರೆ ಎನ್ನಲಾಗಿದೆ.

ನೇಪಾಳ ಮಾರ್ಗವಾಗಿ ಪಲಾಯನ:

ನಿತ್ಯಾನಂದ ದೇಶದ ಯಾವುದೇ ಏರ್​ಪೋರ್ಟ್​​ನಿಂದ ದೇಶ ಬಿಟ್ಟು ಹೋಗಿರುವ ಬಗ್ಗೆ ಸಾಕ್ಷಿಗಳು ಇಲ್ಲ. ಏಕೆಂದರೆ ಆತನ ಪಾಸ್​ಪೋರ್ಟ್​​ ಅವಧಿ ಕಳೆದ 3 ತಿಂಗಳ ಹಿಂದೆಯೇ ಮುಗಿದು ಹೋಗಿದೆ ಎಂದು ವಿದೇಶಾಂಗ ಇಲಾಖೆ ಖಚಿತಪಡಿಸಿದೆ. ಹೀಗಾಗಿ ಆತ ವಿಮಾನದ ಮೂಲಕ ಹೋಗಲು ಸಾಧ್ಯವಿಲ್ಲ. ಭಾರತದಿಂದ ನೇಪಾಳಕ್ಕೆ ರಸ್ತೆ ಮಾರ್ಗವಾಗಿ ಹೋಗಿ, ಅಲ್ಲಿಂದ ಬೇರೆ ಕಡೆಗೆ ಹಾರಿದ್ದಾರೆ ಎಂದು ಸಿಐಡಿ ಅಧಿಕಾರಿಗಳು ಅಂದಾಜು ಮಾಡಿದ್ದಾರೆ.

ದ್ವೀಪದಲ್ಲಿರುವ ಶಂಕೆ:

ಬಲ್ಲ ಮೂಲಗಳ ಪ್ರಕಾರ ನೀರವ್​​ ಮೋದಿಯಂತೆಯೇ ನಿತ್ಯಾನಂದ ಕೂಡ ಐಷಾರಾಮಿ ದ್ವೀಪದಲ್ಲಿ ಆಶ್ರಯ ಪಡೆಯುತ್ತಿದ್ದಾರೆ ಎನ್ನಲಾಗುತ್ತಿದೆ. ಕೆರೆಬಿಯನ್​ ದ್ವೀಪ ಸಮೂಹದಲ್ಲಿ ದೊಡ್ಡ ಮೊತ್ತದ ಹಣ ನೀಡಿದರೆ ಅಲ್ಲಿನ ಪೌರತ್ವ ಸಿಗುತ್ತದೆ. ಹೀಗಾಗಿ ಕೆಮ್ಯಾನ್​ ಐಲ್ಯಾಂಡ್​ನಲ್ಲಿ ಆಶ್ರಯ ಪಡೆದು ಅಲ್ಲಿಂದಲೇ ಆನ್​ಲೈನ್​ನಲ್ಲಿ ಧರ್ಮೋಪದೇಶ ಮಾಡುತ್ತಿದ್ದಾರೆ ಎಂಬ ಅನುಮಾನಗಳು ವ್ಯಕ್ತವಾಗಿವೆ.

Comments are closed.