ಬೆಂಗಳೂರು: ಜಗತ್ತಿನಾದ್ಯಂತ ತಂತ್ರಜ್ಞಾನ ಶರವೇಗದಲ್ಲಿ ಸಾಗುತ್ತಿದೆ. ತಂತ್ರಜ್ಞಾನದ ಉನ್ನತಿಯ ಜತೆಜತೆಗೆ ಮಾನವನ ಖಾಸಗೀಯತೆ ಕ್ಷೀಣಿಸುತ್ತಾ ಸಾಗಿದೆ. ಇವತ್ತಿನ ಡಿಜಿಟಲ್ ಪ್ರಪಂಚದಲ್ಲಿ ಪ್ರತಿಯೊಬ್ಬ ವ್ಯಕ್ತಿಯ ಖಾಸಗಿ ವಿಚಾರಗಳು ಸಾರ್ವಜನಿಕ ಆಸ್ತಿಯಾಗುತ್ತಾ ಸಾಗುತ್ತಿದೆ.
ದಿನೇದಿನೇ ಹ್ಯಾಕರ್ಗಳ ಸಂಖ್ಯೆ ಹೆಚ್ಚುತ್ತಲೇ ಹೋಗುತ್ತಿದೆ. ಹಳ್ಳಿ ಹೈದನಿಂದ ಹಿಡಿದು ನಗರದ ಪ್ರತಿಷ್ಠಿತ ಶ್ರೀಮಂತರವರೆಗೂ ಫೇಸ್ಬುಕ್, ವಾಟ್ಸ್ಆ್ಯಪ್ ಬಳಸುತ್ತಿದ್ದಾರೆ. ಬಳಕೆದಾರರ ಸಂಖ್ಯೆ ಹೆಚ್ಚುತ್ತಾ ಹೋದಂತೆ ಸಾಮಾಜಿಕ ಜಾಲತಾಣಗಳಲ್ಲಿ ಕ್ರೈಮ್ಗಳ ಸಂಖ್ಯೆ ಜಾಸ್ತಿಯಾಗುತ್ತಲೇ ಇವೆ. ಆದರೆ ಇಷ್ಟು ದಿನಗಳ ಕಾಲ ಎಲ್ಲರಲ್ಲೂ ಇದ್ದ ಒಂದೇ ಒಂದು ನಂಬಿಕೆ ಎಂದರೆ, ವಾಟ್ಸ್ಆ್ಯಪ್ ಕಾಲ್ ಮತ್ತು ವಾಟ್ಸ್ಆ್ಯಪ್ ಚಾಟ್ಗಳನ್ನು ಹ್ಯಾಕ್ ಮಾಡಲು ಸಾಧ್ಯವಿಲ್ಲ. ಆದರೆ ಈ ನಂಬಿಕೆಯೂ ಈಗ ಹುಸಿಯಾಗಿದೆ.
ಇಷ್ಟು ದಿನ ಫೇಸ್ಬುಕ್ ಅನ್ನು ಬೆನ್ನು ಬಿಡದಂತೆ ಕಾಡಿದ್ದ ಹ್ಯಾಕರ್ಗಳ ಕಾಟ ಈಗ ವಾಟ್ಸ್ಆ್ಯಪ್ ಮೇಲೆ ಬಿದ್ದಂತಿದೆ. ಇದರಿಂದ ಆಘಾತಕ್ಕೊಳಗಾದ ಜನರಲ್ಲಿ ವಾಟ್ಸ್ಆ್ಯಪ್ ನಮಗೆ ಸೇಫ್ ಇದೆಯೇ, ಇಲ್ಲವೇ? ಎಂಬ ಪ್ರಶ್ನೆ ಹುಟ್ಟಿಸಿದೆ. ಈ ವಿಚಾರದ ಬಗ್ಗೆ ಮಾಧ್ಯಮಗಳು ನಿರಂತರವಾಗಿ ಸುದ್ದಿ ಮಾಡುತ್ತಲೇ ಬಂದಿವೆ. ಈ ಬೆನ್ನಲ್ಲೇ ಇದೀಗ ವಾಟ್ಸ್ಆ್ಯಪ್ ಹ್ಯಾಕಿಂಗ್ ಬಗ್ಗೆ ಇಸ್ರೇಲ್ ಸರ್ಕಾರ ಇಷ್ಟು ದಿನ ಯಾರಿಗೂ ತಿಳಿಯದ ರಹಸ್ಯ ಸಂಗತಿಗಳನ್ನು ಬೆಳಕಿಗೆ ತಂದಿದೆ.
ವಾಟ್ಸ್ಆ್ಯಪ್ ಹ್ಯಾಕಿಂಗ್ ವಿಚಾರದ ಸುತ್ತ ಚರ್ಚೆ ನಡೆಯುತ್ತಿದಂತೆಯೇ ಇಸ್ರೇಲ್ ರಾಷ್ಟ್ರೀಯ ಸೈಬರ್ ಭದ್ರತಾ ಪ್ರಾಧಿಕಾರ ಎಚ್ಚೆತ್ತುಕೊಂಡಿತ್ತು. ಬಳಿಕ ಇಸ್ರೇಲ್ ಅಧಿಕಾರಿಗಳು ಹ್ಯಾಕಿಂಗ್ ಜಾಲವನ್ನು ಪತ್ತೆ ಹಚ್ಚಲು ಮುಂದಾಗಿದ್ದಾರೆ. ಈ ವೇಳೆ ಹ್ಯಾಕರ್ಗಳು ಹೇಗೆ ವಾಟ್ಸ್ಆ್ಯಪ್ ಹ್ಯಾಕ್ ಮಾಡುತ್ತಿದ್ದರು ಎಂಬ ಮಾಹಿತಿ ಲಭ್ಯವಾಗಿದೆ. ಈ ಬಗ್ಗೆ ವಿದೇಶಿ ನ್ಯೂಸ್ ವೆಬ್ ಪೋರ್ಟಲ್ವೊಂದು ವರದಿ ಮಾಡಿದೆ.
ವಾಟ್ಸ್ಆ್ಯಪ್ ಹ್ಯಾಕ್ ಬಗ್ಗೆ ವರದಿ:
‘ZDNet’ ಎಂಬ ವೆಬ್ ಪೋರ್ಟಲ್ ಮಾಡಿದ ವರದಿ ಪ್ರಕಾರ, ಮೊಬೈಲ್ ಸರ್ವೀಸ್ ಪ್ರೊವೈಡರ್ಗಳನ್ನು ಬಳಸಿ ವಾಟ್ಸ್ಆ್ಯಪ್ ಅನ್ನು ಹ್ಯಾಕ್ ಮಾಡಲಾಗುತ್ತಿದೆ. ಹ್ಯಾಕರ್ಗಳು ಮೊದಲು ವಾಯ್ಸ್ಮೇಲ್ಗಳನ್ನು ಟಾರ್ಗೆಟ್ ಮಾಡುತ್ತಾರೆ. ಬಳಿಕ ಅದನ್ನೇ ಗುರಿಯಾಗಿಸಿಕೊಂಡು, ಯಾರು ಡಿಫಾಲ್ಟ್ ಸೆಕ್ಯುರಿಟಿ ಕೋಡ್ ಬದಲಿಸಿರುವುದಿಲ್ಲವೋ, ಅಂತವರಿಗೇ ಗಾಳ ಹಾಕುತ್ತಾರೆ ಎಂದು ವರದಿಯಲ್ಲಿ ತಿಳಿಸಲಾಗಿದೆ.
ಹ್ಯಾಕ್ ಆಗುತ್ತಿರುವುದು ಹೇಗೆ?:
ವಾಟ್ಸ್ಆ್ಯಪ್ ಬಳಕೆದಾರರ ಫೋನ್ ನಂಬರ್‌ ಕದಿಯುವ ಹ್ಯಾಕರ್ಗಳು, ತುಂಬಾ ಸಿಂಪಲ್ ಆಗಿ ಎಲ್ಲವನ್ನು ಮುಗಿಸಿಬಿಡುತ್ತಾರೆ. ಮೊದಲು ಬಳಕೆದಾರರ ನಂಬರ್‌ನಿಂದ ಮತ್ತೊಂದು ಖಾತೆಗೆ ವೆರಿಫೈ ಮಾಡಲು ಯತ್ನಿಸುತ್ತಾರೆ. ಈ ವೇಳೆ, ಹ್ಯಾಕರ್ ತಪ್ಪಾದ ಕೋಡ್ವೊಂದನ್ನು ನಮೂದಿಸುತ್ತಾರೆ. ಹಲವಾರು ಬಾರಿ ತಪ್ಪು ಕೋಡ್ಗಳನ್ನು ಟೈಪ್ ಮಾಡಿದ ಕೂಡಲೇ ವಾಟ್ಸ್‌ಆಪ್ ವಾಯ್ಸ್ ಮೇಲ್ ಮೂಲಕ ಪಾಸ್ವರ್ಡ್ ಕದಿಯಬಹುದಾಗಿದೆ.
ರಾತ್ರಿ ವೇಳೆ ಹ್ಯಾಕಿಂಗ್ ಸಾಧ್ಯತೆ ಹೆಚ್ಚು:
ನೀವು ಸಾಮಾನ್ಯವಾಗಿ ಮಲಗಿರುವಾಗ ಹ್ಯಾಂಕಿಗ್ ಸಾಧ್ಯತೆ ಹೆಚ್ಚು. ಹ್ಯಾಕರ್ಗಳು ಹಲವು ಬಾರಿ ತಪ್ಪಾದ ಕೋಡ್ವೊಂದನ್ನು ನಮೂದಿಸುತ್ತಾರೆ. ಇದು ಸುಲಭವಾಗಿ ಹ್ಯಾಕ್ ಮಾಡಲು ಸಹಕಾರಿಯಾಗುತ್ತದೆ. ಸರಿಯಾದ ಕೋಡ್ ಒತ್ತಿದರೆ ನಿಮಗೆ ಗೊತ್ತಾಗುವ ಸಾಧ್ಯತೆಗಳು ಹೆಚ್ಚಿವೆ. ಹೀಗಾಗಿ ನೀವು ಮೊಬೈಲ್ ಎತ್ತಿಟ್ಟು ಮಲಗಿರುವಾಗಲೇ ವಾಯ್ಸ್ಮೇಲ್ ಮೂಲಕ ಪಾಸ್ವರ್ಡ್ನ್ನು ಸುಲಭವಾಗಿ ಪಡೆಯುತ್ತಾರೆ.
ಡಿಫಾಲ್ಟ್ ಪಿನ್ ಹ್ಯಾಕ್: ಹ್ಯಾಕರ್ಗಳು ಈ ಪ್ರಕ್ರಿಯೆ ಪೂರ್ಣಗೊಳಿಸಿದ ನಂತರ ಡಿಫಾಲ್ಟ್ನಲ್ಲಿರುವ ಬಳಕೆದಾರರ ಖಾತೆಯ ಪಿನ್ಗಳನ್ನು ಹ್ಯಾಕ್ ಮಾಡುತ್ತಾರೆ. ಸಾಮಾನ್ಯವಾಗಿ 0000 ಅಥವಾ 1234 ಪಾಸ್ವರ್ಡ್ ಇರುತ್ತದೆ. ಈ ರೀತಿಯ ಪಾಸ್ವರ್ಡ್ ಅನ್ನು ರಿಕವರ್ ಮಾಡುವ ಮೂಲಕ ವಾಟ್ಸ್‌ಆ್ಯಪ್ಗಳನ್ನು ಹ್ಯಾಕ್ ಮಾಡಬಹುದಾಗಿದೆ ಎನ್ನಲಾಗಿದೆ.
ಹ್ಯಾಕಿಂಗ್ನಿಂದ ಏನು ಲಾಭ?:
ಹ್ಯಾಕರ್ಗಳು ನಿಮ್ಮ ಅಕೌಂಟ್ಗಳನ್ನು ಕ್ರಿಮಿನಲ್ ಚಟುವಟಿಕೆಗಳಿಗೆ ಬಳಸಿಕೊಳ್ಳುತ್ತಾರೆ. ಬಳಕೆದಾರರ ಖಾಸಗಿ ಮಾಹಿತಿಗಳು ಕದಿಯುತ್ತಾರೆ. ಈ ಮೂಲಕ ನಿಮಗೆ ಬೆದರಿಕೆ ಹಾಕುತ್ತಾರೆ. ವಾಟ್ಸ್‌ಆ್ಯಪ್‌ನಲ್ಲಿ ನಿಮ್ಮ ಮಾಹಿತಿ ಅವರಿಗೆ ಸಿಕ್ಕರೆ ಮತ್ತಷ್ಟು ಸಂಕಷ್ಟವನ್ನು ನೀವು ಅನುಭವಿಸಬೇಕಾಗುತ್ತದೆ.
ಸುರಕ್ಷತೆಗಾಗಿ ಇದನ್ನು ಫಾಲೋ ಮಾಡಿ:
ನಿಮ್ಮ ವಾಟ್ಸ್ಆ್ಯಪ್ ಅನ್ನು ಎಚ್ಚರಿಕೆಯಿಂದ ಬಳಸಿ. ಪ್ರತಿ ವಾರಕ್ಕೊಮ್ಮೆ ಡಿಫಾಲ್ಟ್ ಸೆಕ್ಯೂರಿಟಿ ಕೋಡ್ ಬದಲಾಯಿಸಿ. ಮಲಗುವಾಗ ಮೊಬೈಲ್ ನಿಮ್ಮ ಬಳಿಯೇ ಇರಲಿ. ಇದೆಲ್ಲದರ ಹೊರತಾಗಿ ಯಾರ ಕೈಗೂ ನಿಮ್ಮ ಮೈಬೈಲ್ ಕೊಡಬೇಡಿ. ಹಾಗಿದ್ದಲ್ಲಿ ಮಾತ್ರ ವಾಟ್ಸ್ಆ್ಯಪ್ ಹಾಕಿಂಗ್ನಿಂದ ಪಾರಾಗಬಹುದು.
Comments are closed.