ಗೌರಿ ಹತ್ಯೆ: ಕಿಂಗ್​ಪಿನ್​ ಸ್ವಾಮೀಜಿ ಬಂಧಿಸುವ ಮೊದಲೇ ನಿಧನ

ಬೆಂಗಳೂರು: ರಾಜ್ಯವನ್ನೇ ಬೆಚ್ಚಿ ಬೀಳಿಸಿದ್ದ ಪತ್ರಕರ್ತೆ ಗೌರಿ ಹತ್ಯೆ ಕೇಸ್​ ಅಂತಿಮ ಘಟ್ಟ ತಲುಪಿದೆ.. ಇದೇ ತಿಂಗಳ ಕೊನೆಗೆ 4 ಸಾವಿರ ಪುಟಗಳ ಚಾರ್ಜ್​ಶೀಟ್​ ಸಲ್ಲಿಕೆ ಮಾಡಲು ಎಸ್​ಐಟಿ ತಂಡ ತಯಾರಿ ನಡೆಸಿದೆ. ಸೈದ್ದಾಂತಿಕ ಭಿನ್ನಾಭಿಪ್ರಾಯದ ಹಿನ್ನೆಲೆಯಲ್ಲಿ ಗೌರಿ ಅವರ ಹತ್ಯೆಗೆ ಸಂಚು ರೂಪಿಸಲಾಗಿತ್ತು ಎಂಬುದನ್ನ ಪ್ರಮುಖವಾಗಿ ಪ್ರಸ್ತಾಪಿಸುವ ನಿರೀಕ್ಷೆಯಿದೆಯಂತೆ. ಈ ಮೂಲಕ ಗೌರಿ ಹಂತಕರ ವಿರುದ್ಧ ಕಳೆದ 14 ತಿಂಗಳ ಕಾಲ ಎಸ್​ಐಟಿ ಕಾರ್ಯಾಚರಣೆ ಕೂಡ ಕೊನೆಗೊಳ್ಳುವ ಸಾಧ್ಯತೆಯಿದೆ. ಈ ಪ್ರಕರಣ ಸಂಬಂಧ ಕಳೆದ ಮೇ ತಿಂಗಳಲ್ಲಿ 650 ಪುಟಗಳ ಮೊದಲ ದೋಷಾರೋಪ ಪಟ್ಟಿಯನ್ನ ಎಸ್​​ಐಟಿ ಸಲ್ಲಿಸಿತ್ತು.

ಅದ್ರಲ್ಲಿ ಯಾವ ಆರೋಪಿ ಏನು ಕೃತ್ಯ ಮಾಡಿದ್ದಾನೆ ಅನ್ನೋ ಸಾಕ್ಷಿಯೂ ಇರಲಿದೆ.. ಸಂಚು ಮಾಡಿದ್ದು ಅಮೋಲ್​ ಕಾಳೆ ಆದರೆ, ಶೂಟ್​ ಮಾಡಿದ್ದು, ಶೂಟ್ ಮಾಡಲು ನೆರವಾಗಿದ್ದು ಪರಶುರಾಮ್​ ವಾಗ್ಮೋರೆ ಸೇರಿ ಒಟ್ಟು 17 ಜನ ಇದ್ದಾರೆ.

ಆದರೆ, ಪ್ರಕರಣದಲ್ಲಿ ಹಗಲೂರಾತ್ರಿ ಕೆಲಸ ಮಾಡಿ ಅನಿರೀಕ್ಷಿತ ಏರಿಳಿತ ಕಂಡ ತನಿಖೆಯಲ್ಲಿ ಬರೋಬ್ಬರಿ 18 ಆರೋಪಿಗಳನ್ನ ಬಂಧಿಸಿದ ಪೊಲೀಸರಿಗೆ ಅದೇನೋ ಸಮಾಧಾನವಾಗುತ್ತಿಲ್ಲವಂತೆ. ಪ್ರಕರಣದ ಒಬ್ಬ ಕಿಂಗ್​ಪಿನ್​ಗಾಗಿ ತಡಕಾಡುತ್ತಿದ್ದ ಎಸ್​ಐಟಿ ಪೊಲೀಸರಿಗೆ ಕೊನೆಗೂ ಆತ ಸಿಗಲೇ ಇಲ್ಲ. ಆತ ಸಿಕ್ಕಿರುತ್ತಿದ್ದರೆ ಪ್ರಕರಣ ಯಾವಾಗಲೋ ಮುಗಿದುಹೋಗಿರುತ್ತಿತ್ತು. ಆದರೆ, ಆತ ಯಾರ ಕೈಗೂ ಸಿಗದ ಸ್ಥಳಕ್ಕೆ ಹೋಗಿದ್ದಾರೆ. ಗೋವಾ ರಾಜ್ಯದ ಪಾಂಡಾದ ಒಬ್ಬ ಸ್ವಾಮೀಜಿಯೇ ಆ ಕಿಂಗ್​ಪಿನ್. ಅವರ ಸುಳಿವು ಸಿಕ್ಕು ಆಶ್ರಮಕ್ಕೆ ಪೊಲೀಸರು ದಾಳಿ ಮಾಡಬೇಕೆನ್ನುವಷ್ಟರಲ್ಲಿ ಆ ಸ್ವಾಮೀಜಿ ಸಾವನ್ನಪ್ಪಿದ್ದರು. ಇದೇ ಏಪ್ರಿಲ್ ತಿಂಗಳಲ್ಲಿ ನಿಧನ ಹೊಂದಿದ ಸ್ವಾಮೀಜಿ ಕೊನೆಗೂ ಪೊಲೀಸರ ಕೈಗೆ ಸಿಗಲೇ ಇಲ್ಲ.