ಸಂಘಟನೆಗಳ ಎಚ್ಚರಿಕೆಯ ಹೊರತಾಗಿ ಬೆಂಗಳೂರಿನಲ್ಲಿ ‘ಶೇಷಮ್ಮ ಶೇಷಮ್ಮ’ ಹಾಡಿಗೆ ಡ್ಯಾನ್ಸ್​ ಮಾಡಿದ ಸನ್ನಿ ಲಿಯೋನ್​

ಬೆಂಗಳೂರು: ಬಾಲಿವುಡ್​ ನಟಿ ಸನ್ನಿ ಲಿಯೋನ್​ ಬೆಂಗಳೂರಿಗೆ ಆಗಮಿಸಲಿದ್ದಾರೆ ಎಂಬ ಸುದ್ದಿ ಹೊರಬಿದ್ದಾಗಿನಿಂದ ಕಾರ್ಯಕ್ರಮದ ಬಗ್ಗೆ ನಿರೀಕ್ಷೆ ಹೆಚ್ಚಾಗಿತ್ತು. ಅವರನ್ನು ಬೆಂಗಳೂರಿಗೆ ಬರಲು ಬಿಡುವುದಿಲ್ಲ ಎಂದು ಒಂದೆರಡು ಸಂಘಟನೆಯವರು ಎಚ್ಚರಿಕೆಯನ್ನೂ ಕೊಟ್ಟಿದ್ದರು.

ಇಂದು ಸಂಜೆ ನಾಗವಾರದಲ್ಲಿರುವ ಮಾನ್ಯತಾ ಪಾರ್ಕ್​ನಲ್ಲಿ ನಡೆದ ‘ಫ್ಯೂಷನ್ ನೈಟ್’ ಕಾರ್ಯಕ್ರಮದಲ್ಲಿ ಸನ್ನಿ ಲಿಯೋನ್​ ಕನ್ನಡದ ಸಂಗೀತ ನಿರ್ದೇಶಕ ರಘು ದೀಕ್ಷಿತ್ ಅವರ ಹಾಡುಗಳಿಗೆ ಹೆಜ್ಜೆ ಹಾಕಿದರು. ಕನ್ನಡ ಹಾಡುಗಳಿಗೆ ಸೊಂಟ ಬಳುಕಿಸಿದ ಸನ್ನಿಯನ್ನು ನೋಡಲು ಸಾವಿರಾರು ಜನ ಜಮಾಯಿಸಿದ್ದರು. ‘ಶೇಷಮ್ಮ ಶೇಷಮ್ಮ’ ಹಾಡಿಗೆ ಡ್ಯಾನ್ಸ್​ ಮಾಡಿದ ಸನ್ನಿ ಲಿಯೋನ್​ ಜೊತೆಗೆ ಅಲ್ಲಿ ಜಮಾಯಿಸಿದ್ದ ಜನರೂ ಹೆಜ್ಜೆ ಹಾಕಿ ಸಂಭ್ರಮಿಸಿದರು.

ಎಲ್ಲರಿಗೂ ಕನ್ನಡದಲ್ಲಿಯೇ ರಾಜ್ಯೋತ್ಸವದ ಶುಭಾಶಯ ಕೋರಿದ ಸನ್ನಿ ಲಿಯೋನ್, ನಾನು ನಿಮ್ಮನ್ನು ತುಂಬ ಪ್ರೀತಿಸುತ್ತೇನೆ ಎಂದು ಕನ್ನಡದಲ್ಲಿಯೇ ಹೇಳಿದರು. ಸನ್ನಿ ಲಿಯೋನ್​ ಡ್ಯಾನ್ಸ್​ ಮಾಡುತ್ತಿದ್ದಾಗ ಅಭಿಮಾನಿಯೊಬ್ಬ ಬಾಟಲಿ ಎಸೆದ ಘಟನೆಯೂ ನಡೆಯಿತು. ಆತನನ್ನು ತಡೆದ ಸಿಬ್ಬಂದಿ ಹಾಗೆ ಮಾಡದಂತೆ ಎಚ್ಚರಿಕೆ ನೀಡಿದರು.