ಬೆಂಗಳೂರು: ಖಾಸಗಿ ಆಸ್ಪತ್ರೆ ವೈದ್ಯರೊಬ್ಬರ ಪತ್ನಿ ಅಪಾರ್ಟ್‌ಮೆಂಟ್‌ನ ಐದನೇ ಮಹಡಿಯಿಂದ ಬಿದ್ದು ಸಾವನ್ನಪ್ಪಿರುವ ಘಟನೆ ಆರ್‌.ಆರ್‌.ನಗರ ಪೊಲೀಸ್‌ ಠಾಣೆ ವ್ಯಾಪ್ತಿಯಲ್ಲಿ ನಡೆದಿದೆ.
ಚಾಮರಾಜಪೇಟೆ ಮಕ್ಕಳ ಕೂಟ ಸಮೀಪ ಇರುವ ಪ್ರತಿಷ್ಠಿತ ಖಾಸಗಿ ಆಸ್ಪತ್ರೆಯಲ್ಲಿ ವೈದ್ಯರಾಗಿರುವ ಅವಿನಾಶ್‌ ಅಗರವಾಲ್‌ ಅವರ ಪತ್ನಿ ಸೋನಾಲ್‌ ಅಗರವಾಲ್‌ (25) ಮೃತಪಟ್ಟವರು. ಉತ್ತರಹಳ್ಳಿಯಲ್ಲಿರುವ ಮಂತ್ರಿ ಆಫೈನ್‌ ಅಪಾರ್ಟ್‌ಮೆಂಟ್‌ನ ಐದನೇ ಮಹಡಿಯಿಂದ ಬಿದ್ದು ಸಾವನ್ನಪ್ಪಿದ್ದಾರೆ. ಭಾನುವಾರ ರಾತ್ರಿ 8 ಗಂಟೆ ವೇಳೆಗೆ ಈ ಘಟನೆ ನಡೆದಿದ್ದು, ಹಲವು ಅನುಮಾನಗಳಿಗೆ ಎಡೆಮಾಡಿಕೊಟ್ಟಿದೆ.
ಹೊರ ರಾಜ್ಯದವರಾದ ದಂಪತಿ ನಾಲ್ಕು ವರ್ಷಗಳ ಹಿಂದೆ ಬೆಂಗಳೂರಿಗೆ ಬಂದಿದ್ದರು ಎನ್ನಲಾಗಿದ್ದು, ಕೆಲವು ತಿಂಗಳ ಹಿಂದಷ್ಟೇ ಮಂತ್ರಿ ಅಪಾರ್ಟ್‌ಮೆಂಟ್‌ಗೆ ಬಂದಿದ್ದರು. ‘ಇ’ ಬ್ಲಾಕ್‌ನಲ್ಲಿ ದಂಪತಿ ನೆಲೆಸಿದ್ದರು. ಇದೇ ಬ್ಲಾಕ್‌ನ 5ನೇ ಮಹಡಿಯಲ್ಲಿರುವ ತಮ್ಮ ಫ್ಲ್ಯಾಟ್‌ ಎದುರಿನ ಫ್ಲ್ಯಾಟ್‌ನ ಬಾಲ್ಕನಿಯಿಂದ ಬಿದ್ದು ಸೋನಾಲ್‌ ಸಾವನ್ನಪ್ಪಿದ್ದಾರೆ.
ರಾತ್ರಿ 8 ಗಂಟೆ ವೇಳೆಗೆ ಸೋನಾಲ್‌ ಬಾಲ್ಕನಿಯಿಂದ ಬೀಳುತ್ತಿದ್ದಂತೆ ಕಾವಲು ಸಿಬ್ಬಂದಿ ಮತ್ತು ಅಪಾರ್ಟ್‌ಮೆಂಟ್‌ ನಿವಾಸಿಗಳು ಪೊಲೀಸರಿಗೆ ಮಾಹಿತಿ ರವಾನಿಸಿದ್ದರು. ಸ್ಥಳಕ್ಕೆ ಬಂದ ಅಧಿಕಾರಿಗಳು ಪರಿಶೀಲನೆ ನಡೆಸುವ ವೇಳೆ ಅವರಿಗೆ ಶಾಕ್‌ ಕಾದಿತ್ತು.
ಒಳ ಉಡುಪಿನಲ್ಲಿ ಡಾಲರ್‌
ಸೋನಾಲ್‌ ಅವರ ಒಳ ಉಡುಪಿನಲ್ಲಿ ಡಾಲರ್‌ಗಳು, ಚಿನ್ನಾಭರಣ, ಮತ್ತು ನಗದು ಸಿಕ್ಕಿದೆ. ಜತೆಗೆ ತಮ್ಮ ಫ್ಲ್ಯಾಟ್‌ನ ಕೀ ಕೂಡ ಸಿಕ್ಕಿದೆ. ಇವರು ಎದುರಿನ ಫ್ಲ್ಯಾಟ್‌ಗೆ ಏಕೆ ಹೋಗಿದ್ದರು? ಘಟನೆ ನಡೆದ ವೇಳೆಯಲ್ಲಿ ಅಪಾರ್ಟ್‌ಮೆಂಟ್‌ನಲ್ಲಿ ಯಾರಾದರೂ ಇದ್ದರೇ ಎನ್ನುವುದನ್ನು ತಿಳಿಸಲು ಪೊಲೀಸ್‌ ಅಧಿಕಾರಿಗಳು ನಿರಾಕರಿಸಿದ್ದಾರೆ.
ಕಳ್ಳತನ ಶಂಕೆ
ಸೋನಾಲ್‌ ಅವರು ಕಳ್ಳತನ ಮಾಡುವ ಉದ್ದೇಶದಿಂದೇನಾದರೂ ಎದುರಿನ ಫ್ಲ್ಯಾಟ್‌ಗೆ ಹೋಗಿದ್ದರೇ? ಆ ಫ್ಲ್ಯಾಟ್‌ನಲ್ಲಿದ್ದ ಡಾಲರ್‌ ಮತ್ತು ಚಿನ್ನಾಭರಣಗಳನ್ನು ಕದಿಯುತ್ತಿದ್ದಾಗಲೇ ಮಾಲೀಕರು ಬಂದಿದ್ದರಿಂದ ಹೆದರಿ ತಪ್ಪಿಸಿಕೊಳ್ಳುವ ಪ್ರಯತ್ನದಲ್ಲಿದ್ದಾಗ ಕೆಳಗೆ ಬಿದ್ದು ಸಾವನ್ನಪ್ಪಿದ್ದಾರೆಯೇ ? ಅಥವಾ ಆತ್ಮಹತ್ಯೆಯೇ? ಅಥವಾ ಕೊಲೆಯೋ ಎನ್ನುವುದಿನ್ನೂ ಖಚಿತವಾಗಿಲ್ಲ ಎಂದು ಪೊಲೀಸರು ತಿಳಿಸಿದ್ದಾರೆ.
ವಿಷಯ ತಿಳಿಯುತ್ತಿದ್ದಂತೆ ಪಶ್ಚಿಮ ವಿಭಾಗದ ಡಿಸಿಪಿ ರವಿ ಚನ್ನಣ್ಣನವರ್‌ ಸ್ಥಳಕ್ಕೆ ಧಾವಿಸಿ ಪರಿಶೀಲನೆ ನಡೆಸಿದ್ದಾರೆ. ಮೃತದೇಹವನ್ನು ಶವ ಪರೀಕ್ಷೆಗೆ ರವಾನಿಸಲಾಗಿದೆ.
ಈ ಬಗ್ಗೆ ‘ವಿಜಯ ಕರ್ನಾಟಕ’ ಜತೆ ಮಾತನಾಡಿದ ಡಿಸಿಪಿ, ‘‘ಘಟನೆ ಬಗ್ಗೆ ಹಲವು ಗೊಂದಲಗಳಿವೆ. ಆತ್ಮಹತ್ಯೆಯೋ ? ಅಥವಾ ಯಾರಾದರೂ ತಳ್ಳಿದ್ದಾರೋ ಎನ್ನುವುದಿನ್ನೂ ಗೊತ್ತಾಗಿಲ್ಲ. ಎಲ್ಲಾ ಕೋನಗಳಿಂದ ತನಿಖೆ ನಡೆಯುತ್ತಿದೆ’’ ಎಂದು ತಿಳಿಸಿದ್ದಾರೆ.
ಮೃತ ಸೋನಾಲ್‌ಗೆ ಮೂರು ತಿಂಗಳ ಮಗುವಿದ್ದು, ಘಟನೆ ವೇಳೆ ಈ ಮಗು ಸೋನಾಲ್‌ ಅವರ ಫ್ಲ್ಯಾಟ್‌ನಲ್ಲೇ ಇತ್ತು ಎಂದು ತಿಳಿದು ಬಂದಿದೆ.
Comments are closed.