ಕರ್ನಾಟಕ

ಬೆಂಗಳೂರು ಟ್ರಾಫಿಕ್‌ ಪೊಲೀಸ್‌ ಫೇಸ್‌ಬುಕ್‌ ಪೇಜ್‌ಗೆ ಪ್ರಶಸ್ತಿ!

Pinterest LinkedIn Tumblr


ಬೆಂಗಳೂರು: ನಗರದ ಟ್ರಾಫಿಕ್‌ ಪೊಲೀಸರು ನಿರ್ವಹಿಸುತ್ತಿರುವ ಫೇಸ್‌ಬುಕ್‌ ಪೇಜ್‌ಗೆ, ದೇಶದ ‘ಟಾಪ್‌ ರ‍್ಯಾಂಕ್’ ಫೇಸ್‌ಬುಕ್‌ ಪೇಜ್‌ ಎಂಬ ಪ್ರಶಸ್ತಿಯ ಮನ್ನಣೆ ಸಿಕ್ಕಿದೆ. ಈ ಸಂಬಂಧ ಟ್ರಾಫಿಕ್‌ ಪೊಲೀಸರಿಗೆ ಫೇಸ್‌ಬುಕ್‌ ತಂಡ ಶುಭಾಶಯಗಳನ್ನು ಕಳುಹಿಸಿದೆ.

ದೇಶದ ವಿವಿಧ ರಾಜ್ಯಗಳ ಸರಕಾರಿ ಇಲಾಖೆಗಳು, ವಿಭಾಗಗಳು, ರಾಜಕೀಯ ಪಕ್ಷಗಳ ಕುರಿತು ಫೇಸ್‌ಬುಕ್‌ ಇತ್ತೀಚೆಗೆ ಡೇಟಾ ಬಿಡುಗಡೆ ಮಾಡಿದೆ. 2017ರ ಜ.1ರಿಂದ ಡಿ.31ರ ಅವಧಿಯಲ್ಲಿ ಫೇಸ್‌ಬುಕ್‌ ಪೇಜ್‌ಗಳ ಜನಪ್ರಿಯತೆಯನ್ನು ಪರಿಶೀಲಿಸಿದೆ. ಜತೆಗೆ ಪೇಜ್‌ನಲ್ಲಿ ಸಾರ್ವಜನಿಕರ ಜತೆ ಸಂವಹನ, ಅದಕ್ಕೆ ಬರುವ ಪ್ರತಿಕ್ರಿಯೆಗಳು, ಶೇರ್‌ ಮತ್ತು ರೀಚ್‌ ಕೂಡಾ ಮೌಲ್ಯಮಾಪನ ಮಾಡಲಾಗಿದೆ.

ದೇಶದ ವಿವಿಧ ನಗರಗಳ ಟ್ರಾಫಿಕ್‌ ಪೊಲೀಸ್‌ ಪೇಜ್‌ಗಳಲ್ಲಿ ಬೆಂಗಳೂರು ಟ್ರಾಫಿಕ್‌ ಪೊಲೀಸ್‌ ಪೇಜ್‌ ನಂ.1 ಸ್ಥಾನ ಪಡೆದಿದೆ. ಸರಕಾರಿ ಸಂಸ್ಥೆಯ ಪೇಜ್‌ಗಳಲ್ಲಿ ಟಾಪ್‌ ಮೂರರಲ್ಲಿ ಗುರುತಿಸಿಕೊಂಡಿದೆ ಎಂದು ಫೇಸ್‌ಬುಕ್‌ ತಿಳಿಸಿದೆ.

4.90 ಲಕ್ಷಕ್ಕೂ ಅಧಿಕ ಜನರು ಪಾಲೋ ಮಾಡುತ್ತಿರುವ ಟ್ರಾಫಿಕ್‌ ಪೊಲೀಸ್‌ ಪೇಜ್‌ನಲ್ಲಿ ಸಾಕಷ್ಟು ಜನ ಪ್ರತಿದಿನ ದೂರು ನೀಡುತ್ತಾರೆ. ಪೇಜ್‌ ನಿರ್ವಹಿಸಲೆಂದು ಇರುವ ತಂಡವು ಸಾರ್ವಜನಿಕರ ದೂರುಗಳನ್ನು ಸಂಬಂಧಪಟ್ಟ ಠಾಣೆಗಳಿಗೆ ತಲುಪಿಸುತ್ತಿದೆ. ಅಲ್ಲದೇ, ಟ್ರಾಫಿಕ್‌ ನಿಯಮಗಳ ಕುರಿತು ಜಾಗೃತಿ ಕಾರ್ಯಕ್ರಮಗಳು, ತೆಗೆದುಕೊಂಡಿರುವ ಕ್ರಮಗಳು, ಸಂಚಾರ ಪೊಲೀಸರ ಸಾಧನೆಗಳು ಕೂಡಾ ಪೇಜ್‌ನಲ್ಲಿ ಅಪ್‌ಲೋಡ್‌ ಮಾಡಲಾಗುತ್ತದೆ.

‘‘ಸರ್ವೇ ನಡೆಸಿರುವ ಫೇಸ್‌ಬುಕ್‌, ನಮ್ಮ ಪೇಜ್‌ ಅನ್ನು ಗುರುತಿಸಿರುವುದು ಸಂತಸದ ವಿಚಾರ. ಇದರ ಶ್ರೇಯಸ್ಸು ಸಂಚಾರ ನಿಯಂತ್ರಣದಲ್ಲಿ ತೊಡಗುವ ಎಲ್ಲ ಸಿಬ್ಬಂದಿ ಮತ್ತು ಅಧಿಕಾರಿಗಳಿಗೆ ಹೋಗುತ್ತದೆ’’ ಎಂದು ಸಂಚಾರ ವಿಭಾಗದ ಹೆಚ್ಚುವರಿ ಪೊಲೀಸ್‌ ಆಯುಕ್ತ ಆರ್‌. ಹಿತೇಂದ್ರ ತಿಳಿಸಿದರು.

Comments are closed.