ಬೆಂಗಳೂರು: ಡೇಟಿಂಗ್‌ ವೆಬ್‌ಸೈಟ್‌ನಲ್ಲಿ ಹುಡುಗಿಯರ ಹೆಸರಲ್ಲಿ ನಕಲಿ ಪ್ರೊಫೈಲ್‌ ಸೃಷ್ಟಿಸಿ, ಹುಡುಗರಿಂದ ಹಣ ಸುಲಿದು ವಂಚನೆ ಮಾಡುತ್ತಿದ್ದ ಆರೋಪಿಯೊಬ್ಬನನ್ನು ಸಿಸಿಬಿ ಸೈಬರ್‌ ಕ್ರೈಂ ಠಾಣೆ ಪೊಲೀಸರು ಬಂಧಿಸಿದ್ದಾರೆ.
ವೈಟ್‌ಫೀಲ್ಡ್‌ ವಿನಾಯಕ ಲೇಔಟ್‌ ಇಮ್ಮಡಿಹಳ್ಳಿ ಮುಖ್ಯರಸ್ತೆಯ ನಿವಾಸಿ ಸಾಗರ್‌ ರಾವ್‌ ಬಿನ್‌ ಸುರೇಶ್‌ ರಾವ್‌ (25) ಬಂಧಿತ ಆರೋಪಿ. ಸುಂದರ ಸುಂದರ ಹುಡುಗಿಯರ ಪೋಟೋಗಳನ್ನು ಅಪ್‌ಲೋಡ್‌ ಮಾಡಿ ನಕಲಿ ಪ್ರೊಫೈಲ್‌ ಸೃಷ್ಟಿಸುತ್ತಿದ್ದ ಆರೋಪಿಯು, ಡೇಟಿಂಗ್‌ಗೆ ಬರುವಂತೆ ಆಹ್ವಾನ ನೀಡುತ್ತಿದ್ದ. ಹುಡುಗರು ಒಪ್ಪಿದರೆ, ಮುಂಗಡ ಹಣ ಪಡೆದು ಯಾಮಾರಿಸುತ್ತಿದ್ದ.
ಬಿಕಾಂ ಪದವೀಧರನಾಗಿರುವ ಆರೋಪಿಯು, ನಿರುದ್ಯೋಗಿಯಾಗಿದ್ದು, ಸುಲಭವಾಗಿ ಹಣ ಮಾಡುವ ಉದ್ದೇಶದಿಂದ ವಂಚನೆ ಮಾಡುತ್ತಿದ್ದ. ಮೊದಲಿಗೆ ‘ಫ್ರೀ ಡೇಟಿಂಗ್‌ ಡಾಟ್‌ ಕಾಮ್‌’ ಎನ್ನುವ ವೆಬ್‌ಸೈಟ್‌ ಮೂಲಕ ಮೋಸ ಮಾಡಲು ಶುರು ಮಾಡಿದ್ದ ಸಾಗರ್‌, ಡೇಟಿಂಗ್‌ ಆ್ಯಪ್‌ಗಳ ಮೂಲಕವೂ ಹಲವರಿಗೆ ವಂಚಿಸಿದ್ದಾನೆ.
ಉತ್ತರ ಭಾರತದ ಯುವತಿಯರ ಹೆಸರಿನಲ್ಲಿ ಖಾತೆ ತೆರೆಯುತ್ತಿದ್ದ ಸಾಗರ್‌, ಯುವಕರನ್ನು ಡೇಟಿಂಗ್‌ಗೆ ಕರೆಯುತ್ತಿದ್ದ. ಹೊಸದಾಗಿ ಸೈಟ್‌ಗೆ ಬಂದ ಹುಡುಗರು, ಈತ ಹಾಕಿರುವ ಫೋಟೊ ನೋಡಿ ಚಾಟಿಂಗ್‌ ಶುರು ಮಾಡುತ್ತಿದ್ದರು. ತಕ್ಷಣ ಅವರ ಮೊಬೈಲ್‌ ನಂಬರ್‌ ಪಡೆಯುತ್ತಿದ್ದ ಆರೋಪಿ, ವಾಟ್ಸ್‌ಆ್ಯಪ್‌ ಚಾಟ್‌ ಶುರು ಮಾಡುತ್ತಿದ್ದ. ಆದರೆ, ಹುಡುಗರು ಕರೆ ಮಾಡಿದರೆ ಮಾತ್ರ ತಪ್ಪಿಯೂ ಸ್ವೀಕರಿಸುತ್ತಿರಲಿಲ್ಲ. ಬರೇ ಚಾಟಿಂಗ್‌ ಸಾಕು ಎಂದು ಹೇಳಿ ಸುಮ್ಮನಾಗುತ್ತಿದ್ದ. ಅಲ್ಲದೆ, ನೇರವಾಗಿ ಭೇಟಿಯಾಗು ಎಂದು ಯುವಕರು ಹೇಳಿದರೆ, ಮುಂಗಡವಾಗಿ ಹಣ ಪಡೆದು ಅವರ ನಂಬರ್‌ ಬ್ಲಾಕ್‌ ಮಾಡುತ್ತಿದ್ದ.
ಸಾಗರ್‌ ರಾವ್‌ನ ಮೋಸದ ಗಾಳಕ್ಕೆ ಬೀಳುತ್ತಿದ್ದ 10 ಯುವಕರಲ್ಲಿ ಇಬ್ಬರಾದರೂ ಹಣ ಕಳುಹಿಸುತ್ತಿದ್ದರು. ಆದರೆ, ಹಣ ಸಿಕ್ಕಿದ ಬಳಿಕ ಸಾಗರ್‌, ಸಿಮ್‌ ಬದಲಿಸಿಬಿಡುತ್ತಿದ್ದ ಅಥವಾ ನಂಬರ್‌ ಬ್ಲಾಕ್‌ ಮಾಡುತ್ತಿದ್ದ. ಆದರೆ, ಮರ್ಯಾದೆಗೆ ಅಂಜಿ ಯಾರೂ ದೂರು ಕೊಡುತ್ತಿರಲಿಲ್ಲ. ಈ ಮಧ್ಯೆ ವ್ಯಕ್ತಿಯೊಬ್ಬರು ”ನನ್ನ ಮಗ ನನ್ನ ಖಾತೆಯಿಂದ 71 ಸಾವಿರ ರೂ. ವರ್ಗಾವಣೆ ಮಾಡಿ ಮೋಸ ಹೋಗಿದ್ದಾನೆ,” ಎಂದು ದೂರು ನೀಡಿದ್ದರು. ಅದರ ಆಧಾರದಲ್ಲಿ ತನಿಖೆ ನಡೆಸಿದ ಪೊಲೀಸರು ಆರೋಪಿಯನ್ನು ಬಂಧಿಸಿದ್ದಾರೆ.
”ಪ್ರತಿನಿತ್ಯ ಈ ರೀತಿಯ ಪ್ರಕರಣಗಳು ನಡೆಯುತ್ತಿವೆ. ವಂಚನೆಗೆ ಒಳಗಾದವರು ಮರ್ಯಾದೆಗೆ ಹೆದರಿ ದೂರು ನೀಡುವುದಿಲ್ಲ. ಇದರಿಂದಾಗಿ ಸೈಬರ್‌ ಕ್ರೈಂಗಳ ಪ್ರಮಾಣ ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿವೆ. ಮೋಸದ ಜಾಲದ ಬಗ್ಗೆ ಎಚ್ಚರಿಕೆ ವಹಿಸುವುದು ಒಳ್ಳೆಯದು,” ಎಂದು ಸೈಬರ್‌ ಠಾಣೆ ಅಧಿಕಾರಿಗಳು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.
ವಯಸ್ಸಾದವರೇ ಹೆಚ್ಚು
ಸಾಗರ್‌ ರಾವ್‌ ವಂಚನೆಗೆ ಬಳಸಿಕೊಂಡಿದ್ದ ವೆಬ್‌ಸೈಟ್‌ನಲ್ಲಿ ನೋಂದಣಿ ಆಗಿರುವವರಲ್ಲಿ 60 ವರ್ಷ ದಾಟಿದ ವಯಸ್ಕರೇ ಜಾಸ್ತಿ. ಅವರು ಕೂಡ ಯುವಕರ ಫೋಟೋವನ್ನು ಅಪ್‌ಲೋಡ್‌ ಮಾಡಿ, ಕಡಿಮೆ ವಯಸ್ಸು ಹಾಕಿ ಆಕರ್ಷಕ ಪ್ರೊಫೈಲ್‌ ಸೃಷ್ಟಿಸಿಕೊಂಡವರು. ”60 ವರ್ಷ ದಾಟಿದವರೆಲ್ಲರೂ ನವಯುವಕರಂತೆ ಚಾಟ್‌ ಮಾಡುತ್ತಿದ್ದರು. ನಾವೇ ಬುದ್ಧಿವಂತರು ಎಂದು ಅಂದುಕೊಳ್ಳುತ್ತಿದ್ದ ಅವರಿಗೆ, ಇನ್ಯಾರೋ ಮೋಸ ಮಾಡುತ್ತಿದ್ದರು. ಹಣ ಕಳೆದುಕೊಂಡ ಬಳಿಕ ಠಾಣೆ ಮೆಟ್ಟಿಲೇರುತ್ತಿದ್ದರು,” ಎಂದು ಸೈಬರ್‌ ಕ್ರೈಂ ಅಧಿಕಾರಿಗಳು ಮಾಹಿತಿ ನೀಡಿದರು.
ಹಲವು ನಾಮ
ಸಾಗರ್‌ ರಾವ್‌ ಹಲವು ಹೆಸರುಗಳ ಮೂಲಕ ಚಾಟ್‌ ಮಾಡುತ್ತಿದ್ದ. ಶಿಲ್ಪಾ, ಸೋನಿಯಾ ಜೈನ್‌, ಮನೀಶಾ ಜೈನ್‌ ಅವುಗಳಲ್ಲಿ ಪ್ರಮುಖವಾದದ್ದು. ಉತ್ತರ ಭಾರತೀಯ ಯುವತಿಯರ ಹೆಸರನ್ನು ಇಟ್ಟುಕೊಂಡು ಚಾಟ್‌ ಮಾಡಿದರೆ ಸ್ಥಳೀಯ ಯುವಕರು ಬೇಗ ಗಾಳಕ್ಕೆ ಬೀಳುತ್ತಾರೆ ಎನ್ನುವುದು ಆತನ ಉದ್ದೇಶವಾಗಿತ್ತು.
ಹುಡುಗಿಯರ ಜತೆ ಮಾತುಕತೆ
ಪ್ರೊಫೈಲ್‌ ನೋಡಿ ಕರೆ ಮಾಡುವ ಯುವತಿಯರ ಜತೆ ಮಾತ್ರ ಮಾತನಾಡುತ್ತಿದ್ದ ಸಾಗರ್‌, ಯುವಕರು ಕರೆ ಮಾಡಿದರೆ, ‘ನೋ ಕಾಲ್‌-ಓನ್ಲೀ ಚಾಟ್‌’ ಎಂದು ಮೆಸೇಜ್‌ ಕಳುಹಿಸುತ್ತಿದ್ದ. ಹುಡುಗಿಯರಂತೆ ಚಾಟ್‌ ಮಾಡುವುದರಲ್ಲಿ ಪಳಗಿದ್ದ ಆತ ಸುಲಭವಾಗಿ ಯಾಮಾರಿಸಿ ಹಣ ವರ್ಗಾಯಿಸಿಕೊಂಡಿದ್ದ. ಹಣ ತನ್ನ ಖಾತೆಗೆ ಜಮೆ ಆದ ಬಳಿಕ ‘ಯಾವಾಗ , ಎಲ್ಲಿ ಭೇಟಿ ಆಗಬೇಕು ಎನ್ನುವುದನ್ನು ನಾನೇ ತಿಳಿಸುತ್ತೇನೆ ಎಂದು ಹೇಳಿ, ಮೊಬೈಲ್‌ ಆಫ್‌ ಮಾಡುತ್ತಿದ್ದ.
ಪ್ರೇಯಸಿಗೆ ಉಡುಗೊರೆ
ಸಾಗರ್‌ಗೆ ಪ್ರೇಯಸಿಯೂ ಇದ್ದಾಳೆ. ಚಾಟಿಂಗ್‌ ಸೈಟ್‌ ಮೂಲಕ ಹುಡುಗರಿಂದ ಪೀಕಿದ ಹಣದಲ್ಲಿ ತನ್ನ ನಿಜ ಜೀವನದ ಪ್ರೇಯಸಿಗೆ ದುಬಾರಿ ಉಡುಗೊರೆಗಳನ್ನು ಕೊಡಿಸುತ್ತಿದ್ದ. ಅಲ್ಲದೆ ಆಕೆಯ ಬಳಿ, ತಾನು ಕನ್ಸಲ್ಟೆಂಟ್‌ ಕಂಪನಿಯೊಂದರಲ್ಲಿ ಕೆಲಸ ಮಾಡುತ್ತಿದ್ದೇನೆ ಎಂದು ಸುಳ್ಳು ಹೇಳಿದ್ದ.
ವಂಚಕನೂ ವಂಚನೆಗೆ ಒಳಗಾಗಿದ್ದ
ಡೇಟಿಂಗ್‌ ವೆಬ್‌ಸೈಟ್‌ಗಳಲ್ಲಿ ಪರಿಣತನಾಗಿದ್ದ ಸಾಗರ್‌ ಕೂಡ ಒಮ್ಮೆ ಮೋಸ ಹೋಗಿದ್ದ. ಆಕರ್ಷಕ ಫೊಟೋ ನೋಡಿದ್ದ ಆತ ಮರುಳಾಗಿ ಹಣ ಕಳೆದುಕೊಂಡಿದ್ದ. ಅದನ್ನೇ ಪಾಠವಾಗಿ ಕಲಿತ ಆತ, ಅದನ್ನೇ ಹಣ ಗಳಿಸುವ ದಾರಿಯನ್ನಾಗಿ ಮಾಡಿಕೊಂಡಿದ್ದ. ಸುಲಭವಾಗಿ ಹಣ ದೊರೆಯುವುದು ಗೊತ್ತಾದ ಬಳಿಕ, ಅದನ್ನೇ ವೃತ್ತಿಯನ್ನಾಗಿ ಮಾಡಿಕೊಂಡಿದ್ದ.
Comments are closed.