ಬೆಂಗಳೂರು: ನಾಯಂಡಹಳ್ಳಿಯಲ್ಲಿ ಮೊನ್ನೆ ಮೆಟ್ರೊ ಕಾಮಗಾರಿಗೆ ಬಳಸಿದ ಕಬ್ಬಿಣದ ಸರಳು ಕೆಳಕ್ಕೆ ಉರುಳಿ ಬಿದ್ದಿತು. ಇದಾದ ಬಳಿಕ ಮಂಗಳವಾರ ರಾತ್ರಿ ಮೈಸೂರು ರಸ್ತೆಯ ಮೆಟ್ರೊ ಪಿಲ್ಲರ್ಗಳು ವಾಟ್ಸ್ಆ್ಯಪ್ನಲ್ಲಿ ಕುಸಿತಗೊಂಡು ನಗರದ ಜನರಲ್ಲಿ ಕೆಲಕಾಲ ತೀವ್ರ ಆತಂಕ ಸೃಷ್ಟಿಸಿತು.
ಮೆಟ್ರೊ ಪಿಲ್ಲರ್ಗಳು ಕುಸಿದು ರೈಲು ಉರುಳಿ ಬಿದ್ದಿದ್ದು ವಾಟ್ಸಾಪ್ ಮತ್ತು ಜಾಲತಾಣಗಳಲ್ಲಿ ಮಾತ್ರ. ಇದನ್ನೇ ಕೆಲ ಸುದ್ದಿವಾಹಿನಿಗಳು ಬ್ರೇಕಿಂಗ್ ನ್ಯೂಸ್ ಆಗಿ ಬಿತ್ತರಿಸಿದ್ದು ಮತ್ತಷ್ಟು ಆತಂಕಕ್ಕೆ ಕಾರಣವಾಯಿತು. ಇದು ಸಾಲದು ಎಂಬಂತೆ ಸಾಮಾಜಿಕ ಜಾಲತಾಣದಲ್ಲಿ ವೀಡಿಯೊ ತುಣುಕೊಂದು (ಹಳೆಯ ತುಣುಕು) ಹರಿದಾಡಿ ಅವಾಂತರ ಸೃಷ್ಟಿಸಿತು. ಇದು ಸುಳ್ಳೆಂದು ಗೊತ್ತಿಲ್ಲದೆ ಜನರು ನಾಯಂಡಹಳ್ಳಿ ಕಡೆ ಇರುವ ಸ್ನೇಹಿತರು, ಸಂಬಂಧಿಕರಿಗೆ ಕರೆ ಮಾಡಿ ವಿಚಾರಿಸಿದರು. ಮೈಸೂರು ರಸ್ತೆಯಲ್ಲಿ ಹೋಗುವಾಗ ಹುಷಾರಾಗಿರಿ ಎಂಬ ಸಲಹೆ ನೀಡಿದರು. ಈ ಸುದ್ದಿ ಪೊಲೀಸ್ ಠಾಣೆಗಳಿಗೆ, ಪೊಲೀಸ್ ಕಂಟ್ರೋಲ್ ರೂಮ್ ಹಾಗೂ ಬಿಎಂಆರ್ಸಿಎಲ್ಗೂ ಕೂಡ ಜನರು ಕರೆ ಮಾಡಿ ಈ ಸುದ್ದಿ ನಿಜವೇ ಎಂದು ಖಚಿತಪಡಿಸಿಕೊಂಡರು. ‘ವಿಕ’ ಕಚೇರಿಗೂ ಕರೆಗಳು ಬಂದವು. ಕೊನೆಗೆ ವಾಸ್ತವ ಸಂಗತಿ ತಿಳಿದು ಜನರು ನಿಟ್ಟುಸಿರುಬಿಟ್ಟರು.
ತಪ್ಪು ಮಾಹಿತಿ ಹರಡದಿರಿ: ಬಿಎಂಆರ್ಸಿಎಲ್ ಮನವಿ
ನಾಯಂಡಹಳ್ಳಿಯಲ್ಲಿ ಮೆಟ್ರೊ ಕಂಬದ ಆಧಾರಕ್ಕೆ ಇಟ್ಟಿದ್ದ ಕಬ್ಬಿಣದ ಸರಳುಗಳು ಬಿದ್ದ ಘಟನೆಯನ್ನು ತಪ್ಪಾಗಿ ಅರ್ಥೈಸಿ ಆತಂಕ ಉಂಟುಮಾಡಬಾರದು ಎಂದು ಬಿಆಂಆರ್ಸಿಎಲ್ ಮನವಿ ಮಾಡಿದೆ.
ಮೆಟ್ರೊ ಎರಡನೇ ಹಂತದ ಯೋಜನೆಯಲ್ಲಿ ನಾಯಂಡಹಳ್ಳಿಯಲ್ಲಿ ನಿಲ್ದಾಣ ಹಾಗೂ ಎತ್ತರಿಸಿದ ಮಾರ್ಗ ನಿರ್ಮಾಣವಾಗುತ್ತಿದೆ. ಇದರ ಕಂಬಕ್ಕೆ ಆಧಾರವಾಗಿ ಕಬ್ಬಿಣದ ಸರಳಿನ ಆಕೃತಿಯನ್ನು ಅಳವಡಿಸಲಾಗಿದೆ. ಡಿ.30 ರಂದು ರಾತ್ರಿ 10.15 ಗಂಟೆಗೆ ದೊಡ್ಡ ಗಾತ್ರದ ಟ್ರಕ್ ಹಾದುಹೋಗುವಾಗ ಈ ಸರಳಿಗೆ ತಗಲಿದ್ದರಿಂದ ಸರಳು ಉರುಳಿ ಕೆಳಕ್ಕೆ ಬಿದ್ದಿದೆ. ಆದರೆ ಇದು ನಾಯಂಡಹಳ್ಳಿಯಲ್ಲಿ ನಡೆದಿದೆಯೇ ಹೊರತು ಮೈಸೂರು ರಸ್ತೆ ಮೆಟ್ರೊ ನಿಲ್ದಾಣದಲ್ಲಿ ಅಲ್ಲ. ಈ ಘಟನೆಯಿಂದ ಮೆಟ್ರೊ ಪಿಲ್ಲರ್ಗೆ ಅಥವಾ ವ್ಯಕ್ತಿಗಳಿಗೆ ಯಾವುದೇ ಹಾನಿಯಾಗಿಲ್ಲ. ನಿಜಸಂಗತಿಯನ್ನು ತಿಳಿಯದೆ ಸಾಮಾಜಿಕ ಜಾಲತಾಣಗಳಲ್ಲಿ ಮೈಸೂರು ರಸ್ತೆಯ ನಿಲ್ದಾಣದ ಮಾರ್ಗವೇ ಬಿದ್ದುಹೋಗಿದೆ ಎಂದು ತಪ್ಪಾಗಿ ಬಿಂಬಿಸಲಾಗಿತ್ತು. ಈಗ ಇದನ್ನು ಮತ್ತೊಮ್ಮೆ ಜಾಲತಾಣಗಳಲ್ಲಿ ಹರಿಬಿಡಲಾಗಿದೆ ಎಂದು ಬಿಎಂಆರ್ಸಿಎಲ್ ತಿಳಿಸಿದೆ.
ಯಾವುದೇ ಆಧಾರವಿಲ್ಲದ ತಪ್ಪು ಮಾಹಿತಿಯನ್ನು ಹರಡಬಾರದು ಎಂದು ಬಿಎಂಆರ್ಸಿಎಲ್ ವ್ಯವಸ್ಥಾಪಕ ನಿರ್ದೇಶಕ ಮಹೇಂದ್ರ ಜೈನ್ ಕೋರಿದ್ದಾರೆ.
Comments are closed.