ಮಂಗನಿಗೆ ಮದ್ಯ ಕುಡಿಸಿದ ಯುವಕರು !

ಹುಬ್ಬಳ್ಳಿ: ಇಲ್ಲಿನ ಉಣಕಲ್ಲನ ಬಾರ್‌ವೊಂದಕ್ಕೆ ಮಧ್ಯಾಹ್ನ ಆಗಮಿಸಿದ ಅಪರೂಪದ ಅತಿಥಿಗೆ ಯುವಕರು ಮದ್ಯ ಸೇವೆ ಮಾಡಿ ಕೆಲ ಕಾಲ ಸಂಭ್ರಮಿಸಿದ ಪ್ರಸಂಗ ಬುಧವಾರ ನಡೆದಿದೆ.

ಈ ಮಧ್ಯೆ ಮದ್ಯ ಸೇವಿಸಿದ ಅತಿಥಿ ಅಲ್ಲಿಯೇ ಮಲಗಿ ವಿಶ್ರಾಂತಿ ತೆಗೆದುಕೊಂಡು ಹೋಗಿದ್ದು ವಿಶೇಷವಾಗಿತ್ತು.ಅಂದ ಹಾಗೆ ಆ ಅತಿಥಿ ಬೇರೆ ಯಾರೂ ಅಲ್ಲ ಮಂಗ!

ಬಾರ್‌ದಲ್ಲಿ ಯುವಕರು ಮದ್ಯ ಸೇವಿಸುತ್ತಿದ್ದ ವೇಳೆ ಹೊರಭಾಗದಲ್ಲಿ ಕಬ್ಬಿಣದ ಪೈಪ್‌ ಮೇಲೆ ಬಂದು ಕುಳಿತ ಮಂಗ ಕುತೂಹಲದಿಂದ ವೀಕ್ಷಿಸುತ್ತಿತ್ತು. ಆಗ ಯುವಕರು ತಾವು ಸೇವಿಸುತ್ತಿದ್ದ ಮದ್ಯದ ಪ್ಲಾಸ್ಟಿಕ್‌ ಗ್ಲಾಸ್‌ನಿಂದ ಮಂಗನಿಗೆ ಕುಡಿಸಿದರು.

ಹಾಗೇ ಕಿಟಕಿಯಿಂದ ಒಳಗೆ ಬಂದ ಮಂಗ ಕೌಂಟರ್‌ ಸಮೀಪ ಕುಳಿತಿತು. ಇದರಿಂದ ಪ್ರೇರಿತರಾದ ಯುವಕರು ಗ್ಲಾಸ್‌ಗೆ ಮದ್ಯ, ನೀರು ಸೇರಿಸಿ ಮಂಗಕ್ಕೆ ಕುಡಿಸಲು ಆರಂಭಿಸಿದರು. ಇನ್ನೊಂದೆಡೆ ಕೆಲ ಯುವಕರು ತಮ್ಮ ಪೋನ್‌ಗಳಲ್ಲಿ ಈ ದೃಶ್ಯ ಚಿತ್ರೀಕರಿಸುತ್ತಿದ್ದರೂ ಸ್ವಲ್ಪವೂ ವಿಚಲಿತಗೊಳ್ಳದ ಕೋತಿ ಮದ್ಯ ಸೇವನೆಯಲ್ಲಿ ತಲ್ಲೀನವಾಗಿತ್ತು. ಇದರ ಮಜಾ ತೆಗೆದುಕೊಳ್ಳುತ್ತ ಯುವಕರು ಸುಮಾರು 2 ಕ್ವಾರ್ಟರ್‌ನಷ್ಟು ಮದ್ಯ ಕುಡಿಸಿದರು. ನಶೆ ಹೆಚ್ಚಾಗಿ ಮಂಗವು ಕೆಲ ಕಾಲ ಅಲ್ಲಿಯೇ ಮಲಗಿ ನಂತರ ಎದ್ದು ಹೋಯಿತು ಎಂದು ಪ್ರತ್ಯಕ್ಷದರ್ಶಿಗಳು ಹೇಳಿದ್ದಾರೆ.