ರಾಜ್ಯದಲ್ಲೂ 1 ಕೆಜಿ ಉಪ್ಪು 80ರಿಂದ 200 ರೂ.ಗೆ ಮಾರಾಟವಾಯ್ತು!

ಬೆಂಗಳೂರು/ಕಲಬುರಗಿ: ಉತ್ತರ ಪ್ರದೇಶದಲ್ಲಿ ಉಪ್ಪಿನ ಅಭಾವದ ವದಂತಿ ರಾಜ್ಯಕ್ಕೂ ತಟ್ಟಿದೆ. ರಾಜ್ಯದ 5 ಜಿಲ್ಲೆಗಳಲ್ಲಿ ಉಪ್ಪಿನ ದರದಲ್ಲಿ ಭಾರೀ ಏರಿಕೆಯಾಗಿದೆ. ಕೆಲ ಜಿಲ್ಲೆಗಳಲ್ಲಿ ಅಧಿಕಾರಿಗಳು ದಾಳಿ ನಡೆಸಿ ಹೆಚ್ಚು ದರ ಪಡೆದರೆ ಕಠಿಣ ಕ್ರಮ ಕೈಗೊಳ್ಳುವುದಾಗಿ ಎಚ್ಚರಿಕೆ ನೀಡಿದ್ದಾರೆ. ಬಳಿಕ ಸಾಮಾನ್ಯ ದರದಲ್ಲೇ ಉಪ್ಪು ಮಾರಾಟವಾಗುತ್ತಿದೆ.

ಬೆಂಗಳೂರಲ್ಲೇನಾಯ್ತು?: ನಗರದ ಕೆಲವೆಡೆ 1 ಕೆಜಿಗೆ 10 ರೂಪಾಯಿ ಏರಿಕೆಯಾಗಿದ್ದು, 10 ರೂ. ಇದ್ದ ಉಪ್ಪು ಈಗ 20 ರೂಪಾಯಿಗೆ ಏರಿಕೆಯಾಗಿದೆ. ಮಹಾರಾಷ್ಟ್ರದಲ್ಲಿ ಏಕಾಏಕಿ ಡಿಮ್ಯಾಂಡ್ ಅದ್ರಿಂದ ದರ ಏರಿಕೆ ಎಂದು ವ್ಯಾಪಾರಿಗಳು ಮಾಹಿತಿ ನೀಡುತ್ತಿದ್ದರೂ, ಈ ಮಾಹಿತಿ ಸುಳ್ಳು ಎಂದು ಬಹಿರಂಗವಾಗಿದೆ. ಕಾರಣ ಇಂದು ಮಧ್ಯಾಹ್ನ ಕೇಂದ್ರ ಹಣಕಾಸು ಸಚಿವರು ನಡೆಸಿದ ಸುದ್ದಿಗೋಷ್ಠಿಯಲ್ಲಿ ದೇಶದಲ್ಲಿ ಉಪ್ಪಿನ ಅಭಾವ ಇಲ್ಲ. ಇದು ಕೇವಲ ವದಂತಿ ಎಂದು ಸ್ಪಷ್ಟನೆ ನೀಡಿದ್ದಾರೆ.

ಬಿಜಾಪುರದಲ್ಲಿ ಕೆಜಿಗೆ 80: ಮುದ್ದೇಬಿಹಾಳ ಹಾಗೂ ಸಿಂದಗಿ ತಾಲೂಕಿನಲ್ಲಿ ಉಪ್ಪಿಗಾಗಿ ಜನ ಮುಗಿ ಬಿದ್ದರು. ಮುದ್ದೇಬಿಹಾಳ ತಾಲೂಕಿನ ತಾಳಿಕೋಟೆ ಪಟ್ಟಣದಲ್ಲಿ ಕೆಜಿ ಉಪ್ಪು 80 ರೂಪಾಯಿಗೆ ಮಾರಾಟವಾದರೆ, ಸಿಂದಗಿ ತಾಲೂಕಿನ ಕೆಲ ಭಾಗಗಳಲ್ಲಿ 90 ರೂಪಾಯಿಗೆ ಕೆಜಿ ಉಪ್ಪನ್ನು ವ್ಯಾಪಾರಿಗಳು ಮಾರಾಟ ಮಾಡುತ್ತಿದ್ದರು.