ಬೆಂಗಳೂರು: ಭಾರತ ಮತ್ತು ಜಪಾನ್ ಸಂಸ್ಕೃತಿಗಳ ಸಮ್ಮಿಲನಕ್ಕೆ ನಗರದ ನ್ಯಾಷನಲ್ ಗ್ಯಾಲರಿ ಆಫ್ ಮಾಡರ್ನ್ ಆರ್ಟ್ನ ಸಭಾಂಗಣ ಮಂಗಳವಾರ ಸಾಕ್ಷಿಯಾಯಿತು! ಜಪಾನ್ ಭಾಷೆ, ಸಂಸ್ಕೃತಿ ಮತ್ತು ಬೆಂಗಳೂರಿಗರ ನಡುವಣ ಕೊಂಡಿಯಾಗಿರುವ ಜಪಾನೀಸ್ ಲಾಂಗ್ವೇಜ್ ಸ್ಕೂಲ್ನ (ಜೆಎಲ್ಎಸ್) 30ನೇ ವಾರ್ಷಿಕೋತ್ಸವ ಕಾರ್ಯಕ್ರಮದಲ್ಲಿ ಈ ಅಪರೂಪದ ಸನ್ನಿವೇಶ ಸೃಷ್ಟಿಯಾಯಿತು.
ಬೆಂಗಳೂರು ಜನತೆಗೆ ಜಪಾನಿನ ಭಾಷೆ ಮತ್ತು ಅಲ್ಲಿನ ಸಂಸ್ಕೃತಿಯ ಪರಿಚಯ ಮಾಡಿಸುವ ಉದ್ದೇಶದಿಂದ ಜಪಾನಿ ಭಾಷಾ ತಜ್ಞ ಎಚ್. ಗಣೇಶ್ ಅವರು 1984ರಲ್ಲಿ ಸ್ಥಾಪಿಸಿದ್ದ ಜಪಾನೀಸ್ ಲಾಂಗ್ವೇಜ್ ಸ್ಕೂಲ್, 30ನೇ ವಸಂತಗಳನ್ನು ಪೂರೈಸುತ್ತಿರುವ ಸಂಭ್ರಮವನ್ನು ಹಂಚಿಕೊಳ್ಳಲು ಆ ಶಿಕ್ಷಣ ಸಂಸ್ಥೆಯ ಆಡಳಿತ ಮಂಡಳಿಯು ಸರಳ ಸಮಾರಂಭವನ್ನು ಹಮ್ಮಿಕೊಂಡಿತ್ತು.
ನಗರದಲ್ಲಿರುವ ಜಪಾನಿನ ಕಾನ್ಸುಲೇಟ್ನ ಮುಖ್ಯಸ್ಥ ನೊಬುವಾಕಿ ಯಮಮೊಟೊ ಅವರು ಮುಖ್ಯ ಅತಿಥಿಯಾಗಿ ಭಾಗವಹಿಸಿದ್ದರು.
ಜಪಾನೀಸ್ ಲಾಂಗ್ವೇಜ್ ಸ್ಕೂಲ್ ಮಾಡುತ್ತಿರುವ ಕಾರ್ಯವನ್ನು ಶ್ಲಾಘಿಸಿದ ಅವರು, ‘ವಿದೇಶಗಳಲ್ಲಿ ಜಪಾನ್ ಭಾಷೆಗಳನ್ನು ಪ್ರಚುರ ಪಡಿಸುವುದು ನಮ್ಮ ಸರ್ಕಾರದ ನೀತಿಗಳಲ್ಲಿ ಒಂದು. ಭಾರತೀಯರು ಹೆಚ್ಚಿನ ಸಂಖ್ಯೆಯಲ್ಲಿ ಜಪಾನಿ ಭಾಷೆ ಕಲಿಯುತ್ತಿರುವುದು ಸಂತಸ ತಂದಿದೆ ಭಾರತದ ಪ್ರವಾಸಿಗರು ಹೆಚ್ಚಿನ ಸಂಖ್ಯೆಯಲ್ಲಿ ಜಪಾನಿಗೆ ಭೇಟಿ ನೀಡಬೇಕು’ ಎಂದು ಆಶಿಸಿದರು.
ನಿವೃತ್ತ ಐಪಿಎಸ್ ಅಧಿಕಾರಿ ಜೀಜಾ ಹರಿಸಿಂಗ್, ಸ್ಕೂಲ್ನ ಹಳೆ ವಿದ್ಯಾರ್ಥಿ, ವೃತ್ತಿಯಲ್ಲಿ ವೈದ್ಯರಾಗಿರುವ ಸುಧೀರ್ ವಿನೇಕರ್ ಅವರು ಸ್ಕೂಲ್ನ ಸಂಸ್ಥಾಪಕ ಎಚ್.ಗಣೇಶ್ ಅವರೊಂದಿಗಿನ ಒಡನಾಟವನ್ನು ಸ್ಮರಿಸಿದರು. ಎಚ್. ಗಣೇಶ್ ಪುತ್ರರಾದ ಮನಮೋಹನ್ ಗಣೇಶ್, ಪ್ರಸನ್ನ ಕುಮಾರ್ ಮಾತನಾಡಿದರು. ಕಾರ್ಯಕ್ರಮದ ಕೊನೆಯಲ್ಲಿ ವಿದುಷಿ ಗೀತಾ ನಾವಳೆ ಅವರ ವೀಣಾ ವಾದನ ಮತ್ತು ‘ರಾಯಲ್ ಎಕೋ’ ಎಂಬ ಜಪಾನಿ ತಂಡ ನಡೆಸಿಕೊಟ್ಟ ಗಾಯನ ಕಾರ್ಯಕ್ರಮ ಇಡೀ ಸಮಾರಂಭವನ್ನು ಮತ್ತಷ್ಟು ಕಳೆ ಕಟ್ಟುವಂತೆ ಮಾಡಿತು.
ಕರ್ನಾಟಕದಲ್ಲಿ 300 ಜಪಾನ್ ಕಂಪೆನಿಗಳು
ಕಾರ್ಯಕ್ರಮದಲ್ಲಿ ಜಪಾನ್ ಮತ್ತು ಭಾರತದ ನಡುವಣ ದ್ವಿಪಕ್ಷೀಯ ಸಂಬಂಧಗಳ ಬಗ್ಗೆ ವಿವರಣೆ ನೀಡಿದ ಜೆಸಿಎಸ್ಎಸ್ ಕನ್ಸಲ್ಟಿಂಗ್ ಪ್ರೈ. ಲಿ ನ ಮಸಕಾಜು ಕುಬೋಕಿ, 30 ವರ್ಷಗಳ ಅವಧಿಯಲ್ಲಿ ಎರಡೂ ರಾಷ್ಟ್ರಗಳ ನಡುವಣ ವ್ಯಾಪಾರ ಸಂಬಂಧದಲ್ಲಿ ಆಗಿರುವ ಪ್ರಗತಿಯನ್ನು ಅಂಕಿ ಸಂಖ್ಯೆಗಳ ಸಮೇತ ವಿವರಿಸಿದರು. 1980ರಲ್ಲಿ ಉಭಯ ರಾಷ್ಟ್ರಗಳ ನಡುವಣ ದ್ವಿಪಕ್ಷೀಯ ವ್ಯಾಪಾರ ಮೌಲ್ಯ ₨10,540 ಕೋಟಿ ಇದ್ದರೆ, 2013ರಲ್ಲಿ ಈ ಮೌಲ್ಯ ₨1,01,060ಕ್ಕೆ ಏರಿತ್ತು ಎಂದರು.
2003ರಲ್ಲಿ ಜಪಾನಿನ 231 ಕಂಪೆನಿಗಳು ಭಾರತದಲ್ಲಿ ಕಾರ್ಯನಿರ್ವಹಿಸುತ್ತಿದ್ದವು. 2013ರಲ್ಲಿ ಈ ಸಂಖ್ಯೆ 1072ಕ್ಕೆ ಏರಿದೆ ಎಂದರು. ಕರ್ನಾಟಕದಲ್ಲಿ 2008ರಲ್ಲಿ 104 ಕಂಪೆನಿಗಳಿದ್ದವು. ಈಗ 300 ಕಂಪೆನಿಗಳಿವೆ. ಸದ್ಯ ಭಾರತದಲ್ಲಿ 7885 ಜಪಾನಿ-ಯರು ನೆಲೆಸಿದ್ದು, ಬೆಂಗಳೂರಿನಲ್ಲೇ 1,120 ಮಂದಿ ಇದ್ದಾರೆ ಎಂದು ವಿವರಿಸಿದರು.