ಬೆಂಗಳೂರು: ಹೆಸರಘಟ್ಟ ರಸ್ತೆ ಸಮೀಪದ ಇಂಡೋ ಡ್ಯಾನಿಷ್‌ ಫಾರ್ಮ್‌ನ ಬಳಿ ನಡೆದಿದ್ದ ಸಿದ್ದಗಂಗಮ್ಮ (45) ಎಂಬುವರ ಕೊಲೆ ಪ್ರಕರಣವನ್ನು ಭೇದಿಸಿರುವ ಸೋಲದೇವನಹಳ್ಳಿ ಪೊಲೀಸರು ಮೃತರ ಮಗ ಸೇರಿದಂತೆ ಮೂವರನ್ನು ಬಂಧಿಸಿದ್ದಾರೆ.
ಸಿದ್ದಗಂಗಮ್ಮ, ವ್ಯಕ್ತಿಯೊಬ್ಬರ ಜತೆ ಅನೈತಿಕ ಸಂಬಂಧ ಇಟ್ಟುಕೊಂಡಿದ್ದರು. ಈ ಸಂಗತಿ ತಿಳಿದು ಕೋಪಗೊಂಡಿದ್ದ ಅವರ ಮಗ ರವಿ ಮತ್ತು ಸಂಬಂಧಿ ರಾಮಣ್ಣ ಅವರು ಸಿದ್ದಗಂಗಮ್ಮನನ್ನು ಕೊಲೆ ಮಾಡಲು ವ್ಯಕ್ತಿಯೊಬ್ಬನಿಗೆ ₨ 1 ಲಕ್ಷ ಸುಪಾರಿ ಕೊಟ್ಟಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ.
ಸಿದ್ದಗಂಗಮ್ಮ ಪ್ರತಿನಿತ್ಯ ಹಸುಗಳನ್ನು ಮೇಯಿಸಲು ಡ್ಯಾನಿಷ್‌ ಫಾರ್ಮ್‌ನ ಬಳಿ ಹೋಗುತ್ತಿದ್ದ ಬಗ್ಗೆ ರವಿ, ಸುಪಾರಿ ಕೊಟ್ಟಿದ್ದ ವ್ಯಕ್ತಿಗೆ ಮಾಹಿತಿ ನೀಡಿದ್ದ. ಆ ಸುಳಿವು ಆಧರಿಸಿ ನ.17ರಂದು ಫಾರ್ಮ್‌ನ ಬಳಿ ಕಾದು ಕುಳಿತಿದ್ದ ಆರೋಪಿ, ಸಿದ್ದಗಂಗಮ್ಮ ಅವರ ತಲೆಯನ್ನು ಕಲ್ಲಿನಿಂದ ಜಜ್ಜಿ ಕೊಲೆ ಮಾಡಿದ್ದ ಎಂದು ಪೊಲೀಸರು ಹೇಳಿದ್ದಾರೆ.
ಕೃತ್ಯದ ಬಳಿಕ ಆರೋಪಿಯು ಸಿದ್ದಗಂಗಮ್ಮನ ಕತ್ತಿನಲ್ಲಿದ್ದ 50 ಗ್ರಾಂ ಚಿನ್ನದ ಸರ ಕಿತ್ತುಕೊಂಡು ಪರಾರಿಯಾಗಿದ್ದ. ದುಷ್ಕರ್ಮಿಗಳು ಚಿನ್ನಾಭರಣಕ್ಕಾಗಿ ಈ ಕೊಲೆ ಮಾಡಿದ್ದಾರೆ ಎಂಬಂತೆ ಬಿಂಬಿಸಿ ಪ್ರಕರಣದ ದಿಕ್ಕು ತಪ್ಪಿಸುವ ಉದ್ದೇಶಕ್ಕಾಗಿ ಆತ ಸರ ದೋಚಿದ್ದ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.
ರವಿ, ರಾಮಣ್ಣ ಮತ್ತು ಅವರಿಂದ ಸುಪಾರಿ ಪಡೆದಿದ್ದ ಆರೋಪಿಯನ್ನು ಬಂಧಿಸಿರುವ ಪೊಲೀಸರು ಸರ ಹಾಗೂ ಮೊಬೈಲ್‌ಗಳನ್ನು ಜಪ್ತಿ ಮಾಡಿದ್ದಾರೆ.
ತಪ್ಪೊಪ್ಪಿಗೆ: ‘ತಾಯಿಯು ವ್ಯಕ್ತಿಯೊಬ್ಬರ ಜತೆ ಅನೈತಿಕ ಸಂಬಂಧ ಇಟ್ಟುಕೊಂಡಿದ್ದರು. ಈ ವಿಷಯವಾಗಿ ಮನೆಯಲ್ಲಿ ಆಗಾಗ್ಗೆ ಜಗಳವಾಗುತ್ತಿತ್ತು. ಈ ಕಾರಣಕ್ಕಾಗಿ ಅವರನ್ನು ಕೊಲೆ ಮಾಡಿಸಿದೆ’ ಎಂದು ಆರೋಪಿ ರವಿ ಪೊಲೀಸರಿಗೆ ತಪ್ಪೊಪ್ಪಿಗೆ ಹೇಳಿಕೆ ಕೊಟ್ಟಿದ್ದಾನೆ.
