ಪೇಜಾವರ ಶ್ರೀಗಳ ಆರೋಗ್ಯ ಸುಧಾರಿಸುತ್ತಿದೆ: ಅನಗತ್ಯ ಸುಳ್ಳು ವದಂತಿ ಬೇಡ- ಡಾ. ವೀರೇಂದ್ರ ಹೆಗ್ಗಡೆ

ಉಡುಪಿ: ಉಸಿರಾಟದ ಸಮಸ್ಯೆಯಿಂದ ಬಳಲಿ ಸದ್ಯ ಮಣಿಪಾಲ ಕೆಎಂಸಿ ಆಸ್ಪತ್ರೆಯಲ್ಲಿ ದಾಖಲಾಗಿರುವ ಪೇಜಾವರ ಶ್ರೀಗಳ ಆರೋಗ್ಯವನ್ನು ಧರ್ಮಸ್ಥಳ ಧರ್ಮಾಧಿಕಾರಿ ಡಾ.ಡಿ‌.ವೀರೇಂದ್ರ‌ ಹೆಗ್ಗಡೆ ಶನಿವಾರ ವಿಚಾರಿಸಿದರು.

ಈ ವೇಳೆ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ವೈದ್ಯರ ಪ್ರಕಾರ ಶ್ರೀಗಳು ನಿಧಾನ ಚೇತರಿಕೆ ಕಾಣುತಿದ್ದಾರೆ ಎಂದು‌ ಭರವಸೆ ನೀಡಿದ್ದಾರೆ. ಅವರ ವಯೋಧರ್ಮ ಅನುಸಾರ ಆರೋಗ್ಯ ಸುಧಾರಣೆ ನಿಧಾನಗತಿಯಲ್ಲಿದೆ ಎಂದು ವೈದ್ಯರು ಅಭಿಪ್ರಾಯಪಟ್ಟಿದ್ದರು. ಶ್ರೀಗಳಿಗೆ ಬೇರೆ ಯಾವುದೆ ಖಾಯಿಲೆ ಇಲ್ಲ ಹೀಗಾಗಿ ಚಿಕಿತ್ಸೆಗೆ ಉತ್ತಮವಾಗಿ ಸ್ಪಂದಿಸುತಿದ್ದಾರೆ. ಶ್ರೀಗಳ ಆರೋಗ್ಯ ಬೇಗ ಸುಧಾರಣೆ ಆಗಬೇಕು. ನಮಗೆ‌ ಅವರು ಮಾರ್ಗದರ್ಶನ ನೀಡಬೇಕು ಎಂದರು.

ಪೇಜಾವರ ಶ್ರೀಗಳ ಆರೋಗ್ಯದ ಬಗ್ಗೆ ವದಂತಿಗಳನ್ನು ನಂಬಬಾರದು. ವೈದ್ಯರ ಹೇಳಿಕೆ ಹಾಗೂ ಮಾಧ್ಯಮ, ಪತ್ರಿಕೆಗಳ ಮೂಲಕ ಶ್ರೀಗಳ ಆರೋಗ್ಯ ಸಂದೇಶ ತಿಳಿದುಕೊಳ್ಳಬೇಕು ಎಂದು ಮನವಿ ಮಾಡಿದರು.