ಮಂಗಳೂರು’ ನಗರಕ್ಕೆ ಅತಿ ಶೀಘ್ರದಲ್ಲೇ ಬರಲಿದೆ, ಹೈಟೆಕ್ ‘ಇ-ಟಾಯ್ಲೆಟ್’

ಮಂಗಳೂರು : ‘ಸ್ವಚ್ಛ ಹಾಗೂ ಆರೋಗ್ಯಯುತ ಮಂಗಳೂರು’ ಆಂದೋಲನಕ್ಕೆ ಮಂಗಳೂರು ಮಹಾನಗರ ಪಾಲಿಕೆ ಮುಂದಾಗಿದೆ. ನಗರದ ಜನನಿಭಿಡ ಪ್ರದೇಶಗಳಲ್ಲಿ ಹಾಗೂ ಬಸ್, ರಿಕ್ಷಾ ನಿಲ್ದಾಣಗಳ ಪಕ್ಕದಲ್ಲಿ ಸಾರ್ವಜನಿಕರಿಗೆ ಹೈಟೆಕ್ ಟಾಯ್ಲೆಟ್ ವ್ಯವಸ್ಥೆ ಮಾಡಲು ಪಾಲಿಕೆ ಮುಂದಾಗಿದೆ. ಇದಕ್ಕಾಗಿ ಹೈಟೆಕ್ ಸ್ವಯಂಚಾಲಿತ ‘ಇ-ಟಾಯ್ಲೆಟ್’ ಯೋಜನೆ ರೂಪಿಸಿದೆ.

ಏನಿದು ಇ-ಟಾಯ್ಲೆಟ್: ಮಂಗಳೂರು ನಗರದ ಪ್ರಮುಖ ಜನ ದಟ್ಟಣೆಯಿರುವ ಪ್ರದೇಶಗಳಲ್ಲಿ ಇ-ಟಾಯ್ಲೆಟ್ ಅಳವಡಿಸಲು ಉದ್ದೇಶಿಸಲಾಗಿದೆ. ನಗರದ ಪ್ರಮುಖ ರಸ್ತೆಗಳ ಬದಿಯಲ್ಲಿ ಈ ಆಕರ್ಷಕ ಪೆಟ್ಟಿಗೆಗಳು ಶೀಘ್ರದಲ್ಲಿ ತಲೆ ಎತ್ತಲಿವೆ.

ಪೆಟ್ಟಿಗೆಯಾಕಾರದಲ್ಲಿ ಅತ್ಯಾಕರ್ಷಕವಾಗಿರುವ ಈ ಟಾಯ್ಲೆಟ್‌ಗಳು ಸ್ವಯಂ ಚಾಲಿತವಾಗಿವೆ. ಕಾಯಿನ್ ಹಾಕಿದರೆ ಬಾಗಿಲು ತೆರದುಕೊಳ್ಳುತ್ತದೆ. ಮೂತ್ರ ಮಾಡಿ ಹೊರಗೆ ಬಂದಾಗ ಸ್ವಯಂ ರೀತಿಯಲ್ಲಿ ಬಾಗಿಲು ಲಾಕ್ ಆಗುತ್ತದೆ. ಒಳಗಡೆ ಸ್ವಯಂ ಚಾಲಿತವಾಗಿ ಶುಚಿಗೊಳ್ಳುತ್ತದೆ. ಜತೆಗೆ ಪರಿಮಳದ ಸ್ಪ್ರೇ ಸಿಂಪಡಿನೆಯಾಗುತ್ತದೆ. ಟಾಯ್ಲೆಟ್‌ನ ಮೇಲುಗಡೆ ನೀರಿನ ವ್ಯವಸ್ಥೆ ಇರುತ್ತದೆ. ಇದರ ತ್ಯಾಜ್ಯ ನೀರು ಹೊರಗೆ ಹೋಗುವುದಕ್ಕೆ ನೇರವಾಗಿ ಒಳರಂಡಿಗೆ ಸಂಪರ್ಕ ಕಲ್ಪಿಸಲಾಗುತ್ತದೆ. ಇದಕ್ಕೆ ಅಗತ್ಯ ಬೆಳಕಿನ ವ್ಯವಸ್ಥೆಯನ್ನು ಸೋಲಾರ್ ಮೂಲಕ ಮಾಡುವ ಅವಕಾಶ ಇದೆ. ಒಳಚರಂಡಿ ವ್ಯವಸ್ಥೆ ಯಿರುವ ಕಡೆ ಮಾತ್ರ ಇಂತಹ ‘ಇ-ಟಾಯ್ಲೆಟ್’ ವ್ಯವಸ್ಥೆ ಮಾಡಲು ಉದ್ದೇಶಿಸಲಾಗಿದೆ.

ಇಎಸ್‌ಎಸ್ ಕಂಪನಿ: ಸೌದಿ ಮೂಲದ 9001-2008 ಸರ್ಟಿಫೈಡ್ ಪಡೆದ ಕೇರಳದಲ್ಲಿರುವ ಇಎಸ್‌ಎಸ್ ಕಂಪನಿ ಇಂತಹ ಹೈಟೆಕ್ ಟಾಯ್ಲೆಟ್‌ಗಳನ್ನು ನಿರ್ಮಿಸುತ್ತಿದೆ. ಇದೇ ಸಂಸ್ಥೆಯೊಂದಿಗೆ ಮಂಗಳೂರು ಮಹಾನಗರ ಪಾಲಿಕೆ ಈ ಯೋಜನೆಯನ್ನು ಅನುಷ್ಠಾನಗೊಳಿಸಲು ಚರ್ಚಿಸಿದೆ. ಸಂಸ್ಥೆ ಮುಖ್ಯಸ್ಥರು ಈಗಾಗಲೇ ಮಂಗಳೂರು ಮಹಾನಗರ ಪಾಲಿಕೆಗೆ ಮೊದಲ ಸುತ್ತಿನ ಮಾತುಕತೆ ನಡೆಸಿದ್ದಾರೆ.

ರಸ್ತೆ ಬದಿಯಲ್ಲಿ ಅಳವಡಿಸಲಾಗುವ ಈ ಟಾಯ್ಲೆಟ್‌ನ ಬಾಕ್ಸ್‌ನ ನಾಲ್ಕು ಕಡೆಗಳಲ್ಲೂ ಜಾಹೀರಾತು ಪ್ರಕಟಿಸುವ ಅವಕಾಶ ಕಲ್ಪಿಸಲಾಗುತ್ತದೆ. ಇದರಿಂದ ಟಾಯ್ಲೆಟ್ ನಿರ್ಮಿಸಲು ಹೂಡಿಕೆ ಮಾಡುವ ಮೊತ್ತವನ್ನು ಈ ಮೂಲಕ ಸಂಗ್ರಹಿಸಲಾಗುತ್ತದೆ. ಇದರಿಂದ ಪಾಲಿಕೆಗೆ ನಿರ್ವಹಣೆ ಹೊರತುಪಡಿಸಿ ಹೆಚ್ಚು ಹಣಕಾಸಿನ ಹೊಣೆ ಬೀಳುವುದಿಲ್ಲ.

* ಮಂಗಳೂರು ನಗರಕ್ಕೆ ದೂರದೂರಿನಿಂದ ಬಸ್ಸು ನಲ್ಲಿ ಬಂದಿಳಿದಾಗ ಶೌಚಾಲಯಕ್ಕೆ ಹೋಗಲು ರಸ್ತೆ ಬದಿಯಲ್ಲಿ ಸೂಕ್ತ ಟಾಯ್ಲೆಟ್ ವ್ಯವಸ್ಥೆ ಇಲ್ಲ. ಹಾಗೆಯೇ ನಗರದ ಪ್ರಮುಖ ರಿಕ್ಷಾ ಪಾರ್ಕ್, ಜನನಿಭಿಡ ಪ್ರದೇಶಗಳಲ್ಲಿ ಶೌಚಕ್ಕೆ ಹೋಗಲು ಅಗತ್ಯ ಟಾಯ್ಲೆಟ್‌ಗಳು ಇಲ್ಲ. ವಿಶೇಷವಾಗಿ ನಗರ ಪ್ರದೇಶದಲ್ಲಿ ಮಹಿಳೆಯರಿಗೆ ತೀವ್ರ ತೊಂದರೆಯಾಗುತ್ತಿದೆ. ಸ್ವಚ್ಛ ಹಾಗೂ ಆರೋಗ್ಯಯುತ ಮಂಗಳೂರು ಪರಿಕಲ್ಪನೆಯಲ್ಲಿ ರಸ್ತೆ ಬದಿಗಳಲ್ಲಿ ಆಕರ್ಷಕ ರೀತಿಯ ಟಾಯ್ಲೆಟ್‌ಗಳನ್ನು ನಿರ್ಮಿಸುವ ಯೋಜನೆ ಹಮ್ಮಿಕೊಳ್ಳಲಾಗಿದೆ. ಇದು ಕಾಯಂ ಟಾಯ್ಲೆಟ್‌ಗಳಲ್ಲ. ಇದನ್ನು ಬೇಕಾದ ಕಡೆ ಶಿಫ್ಟ್ ಮಾಡಬಹುದು. ನಗರ ಸುಂದರೀಕರಣಕ್ಕೆ ಪೂರಕವಾಗಿ ಇದನ್ನು ಅಲ್ಲಲ್ಲಿ ಅಳವಡಿಸಲು ಉದ್ದೇಶಿಸಲಾಗಿದೆ.

ವರದಿ ಕೃಪೆ : VK. ವರದಿ : ರವೀಂದ್ರ ಶೆಟ್ಟಿ ಮಂಗಳೂರು,