ಫ್ರಾನ್ಸ್ನಲ್ಲಿ ಕೆಲ ದಿನಗಳ ಹಿಂದೆ ಭಯೋತ್ಪಾದನಾ ದಾಳಿ ನಡೆದ ನಂತರ ಫ್ರೆಂಚ್ ಪೊಲೀಸರು ಮುಸ್ಲಿಂ ಮಹಿಳೆಯನ್ನು ಬಂಧಿಸಿ, ಆಕೆಯ ತಲೆವಸ್ತ್ರವನ್ನು ಬಲವಂತವಾಗಿ ತೆಗೆಸಿ ಕ್ರೂರವಾಗಿ ಹಲ್ಲೆ ನಡೆಸಿದ್ದಾರೆ ಎಂಬ ಸಿಸಿಟಿವಿ ದೃಶ್ಯಾವಳಿ ಇಂಟರ್ನೆಟ್ನಲ್ಲಿ ಭಾರೀ ವೈರಲ್ ಆಗಿದೆ.
ಮೋಟಿವೇಷನಲ್ ಮುಸ್ಲಿಮ್ಸ್ ಎಂಬ ಫೇಸ್ಬುಕ್ ಪೇಜ್ ಪಾಶ್ಚಿಮಾತ್ಯ ಜಗತ್ತಿನ ಅಭಿವ್ಯಕ್ತಿ ಸ್ವಾತಂತ್ರ್ಯ ಮತ್ತು ಪ್ರಜಾಪ್ರಭುತ್ವವನ್ನು ಪ್ರಶ್ನಿಸಿ ಈ ವಿಡಿಯೋವನ್ನು ಪೋಸ್ಟ್ ಮಾಡಿದ್ದಾರೆ. ಇದೇ ವಿಡಿಯೋವನ್ನು ಮುಸ್ಲಿಂ ಮಹಿಳೆಯರ ಮೇಲೆ ಫ್ರಾನ್ಸ್ನಲ್ಲಿ ಹಲ್ಲೆ ನಡೆಸಲಾಗಿದೆ ಎಂದು ಆರೋಪಿಸಿ ಅನೇಕ ಮುಸ್ಲಿಂ ಬಳಕೆದಾರರು ಇದೇ ವಿಡಿಯೋವನ್ನು ಪೋಸ್ಟ್ ಮಾಡಿದ್ದಾರೆ.
ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿರುವ ಈ ವಿಡಿಯೋ ಫ್ರಾನ್ಸ್ನದ್ದಲ್ಲ. ಬದಲಾಗಿ ಕೆನಡಾದ ವಿಡಿಯೋ ಇದಾಗಿದೆ. ಪಶ್ಚಿಮ ಕೆನಡಾದ ಆಲ್ಬರ್ಟಾದ ಕ್ಯಾಲ್ಗರಿಯಲ್ಲಿ ಡಾಲಿಯಾ ಕಾಫಿ ಎಂಬ ಮಹಿಳೆಯನ್ನು ಬಂಧಿಸುವಾಗ 2017ರ ಡಿಸೆಂಬರ್ನಲ್ಲಿ ಈ ಭೀಕರ ಘಟನೆ ನಡೆದಿದೆ. ಅದೇ ವಿಡಿಯೋವನ್ನು ಮತ್ತೆ ಶೇರ್ ಮಾಡಲಾಗಿದ್ದು, ಫ್ರೆಂಚ್ ಪೊಲೀಸರು ಮುಸ್ಲಿಂ ಮಹಿಳೆಯ ಮೇಲೆ ದೌರ್ಜನ್ಯ ಎಸಗಿರುವುದು ಸುಳ್ಳು ಎಂಬುದು ಗೊತ್ತಾಗುತ್ತದೆ.
ವಿಡಿಯೊವನ್ನು ಕೀಫ್ರೇಮ್ಗಳಾಗಿ ವಿಂಗಡಿಸಿ ಗೂಗಲ್ ಕ್ರೋಮ್ನ InVID ಎಕ್ಸ್ಟೆನ್ಷನ್ನಲ್ಲಿ ರಿವರ್ಸ್ ಇಮೇಜ್ ಆಗಿ ಹುಡುಕಾಡಿದಾಗ ವಿಡಿಯೋ ಕೆನಡಾದ್ದು ಎಂಬುದು ಗೊತ್ತಾಗಿದೆ. ರಿವರ್ಸ್ ಸರ್ಚಿಂಗ್ ಫಲಿತಾಂಶಗಳು ಅನೇಕ ಸುದ್ದಿಯ ವರದಿಗಳನ್ನು ನಮ್ಮ ಮುಂದಿಡುತ್ತವೆ.
2017ರ ಡಿಸೆಂಬರ್ನಲ್ಲಿ ರಾತ್ರಿ 10 ಗಂಟೆಯ ಕರ್ಫ್ಯೂ ಉಲ್ಲಂಘಿಸಿದ್ದಕ್ಕಾಗಿ 26 ವರ್ಷದ ಡಾಲಿಯಾ ಕಾಫಿ ಎಂಬ ಮಹಿಳೆಯನ್ನು ಕೆನಡಾದಲ್ಲಿ ಬಂಧಿಸಲಾಗಿತ್ತು. ಮಹಿಳೆಯನ್ನು ಪೊಲೀಸ್ ಕಾನ್ಸ್ಟೆಬಲ್ ಅಲೆಕ್ಸ್ ಡನ್ ಎಂಬಾತ ಎಳೆದೊಯ್ದಿದ್ದ ಎಂದು ವರದಿಗಳಲ್ಲಿ ಹೇಳಲಾಗಿದೆ.
ಪೊಲೀಸ್ ಠಾಣೆಯಲ್ಲಿನ ಸಿಸಿಟಿವಿ ದೃಶ್ಯಾವಳಿಗಳಿಂದ ಮಹಿಳೆಯ ಮೇಲೆ ಹಿಂಸಾತ್ಮಕ ದೌರ್ಜನ್ಯ ನಡೆಸಲಾಗಿದೆ ಎಂಬುದು ಗೊತ್ತಾಗಿತ್ತು. ತನ್ನ ಚಿತ್ರ ತೆಗೆದುಕೊಳ್ಳಲು ಪೊಲೀಸರು ಬಂದಾಗ ಆಕೆ ಗೋಡೆ ಕಡೆ ತಿರುಗಿ ನಿಲ್ಲುತ್ತಾಳೆ. ಆಗ ಪೋಲೀಸ್ ಅವಳ ಸ್ಕಾರ್ಫ್ ಕಿತ್ತುಹಾಕಲು ಮುಂದಾಗಿದ್ದು, ಬಳಿಕ ಮುಖಕ್ಕೆ ಹೊಡೆದಿದ್ದಾನೆ. ಈ ಘಟನೆಯ ಸಂಪೂರ್ಣ ತುಣುಕನ್ನು ಅಕ್ಟೋಬರ್ 27, 2020ರ ಗ್ಲೋಬಲ್ ನ್ಯೂಸ್ ವರದಿಯಲ್ಲಿ ವೀಕ್ಷಿಸಬಹುದು.
ಮುಸ್ಲಿಂ ಮಹಿಳೆಯ ಮುಖದ ಸ್ಕಾರ್ಫ್ನ್ನು ಫ್ರೆಂಚ್ ಪೊಲೀಸರು ಬಲವಂತವಾಗಿ ತೆಗೆದುಹಾಕಿದ್ದಾರೆ ಎಂಬ ಸುಳ್ಳು ಸುದ್ದಿಯೊಂದಿಗೆ ಕೆನಡಾದ ಹಳೇ ವೀಡಿಯೊವನ್ನು ಸಾಮಾಜಿಕ ಜಾಲತಾಣದಲ್ಲಿ ಶೇರ್ ಮಾಡಲಾಗುತ್ತಿದೆ ಎಂಬುದನ್ನು ಟೈಮ್ಸ್ ಫ್ಯಾಕ್ಟ್ ಚೆಕ್ ಕಂಡುಹಿಡಿದಿದೆ.
Comments are closed.