ಅಮೆರಿಕದಲ್ಲಿ ಕೊರೋನಾಗೆ 50,000 ಸಾವಿನ ಸಂಖ್ಯೆ; ಪ್ರತಿದಿನ ಅಂದಾಜು 2 ಸಾವಿರ ನಾಗರಿಕರ ಸಾವು

ಮಾರಕ ಕೊರೋನಾ ವೈರಸ್ ಸಾಂಕ್ರಾಮಿಕ ಸೋಂಕಿನಿಂದ ಅಮೆರಿಕದಲ್ಲಿ ಮೃತಪಟ್ಟವರ ಸಂಖ್ಯೆ ಶುಕ್ರವಾರ 50 ಸಾವಿರ ಗಡಿ ದಾಟಿದೆ ಎಂದು ಜಾನ್ಸ್​ ಹಾಪ್​ಕಿನ್ಸ್​ ವಿವಿ ಮಾಹಿತಿ ನೀಡಿದೆ.

ಮಹಾಮಾರಿ ಕೊರೋನಾ ವೈರಸ್​ ಜಾಗತಿಕ ಬಿಕ್ಕಟ್ಟು ಆರಂಭವಾದ ದಿನದಿಂದ ಈವರೆಗೆ ಅಮೆರಿಕದಲ್ಲಿ 50,031 ಜನರು ಕೋವಿಡ್ -19ಗೆ ಬಲಿಯಾಗಿದ್ದಾರೆ. ಹಾಗೂ 8,70,000 ಪ್ರಕರಣಗಳು ಖಚಿತಗೊಂಡಿವೆ.

ಜಾಗತಿಕವಾಗಿ ಕೊರೋನಾ ವೈರಸ್​ ಪರಿಣಾಮ ಅಮೆರಿಕದ ಮೇಲೆ ದಟ್ಟವಾಗಿ ಬೀರಿದೆ. ಕಳೆದ 24 ಗಂಟೆಯಲ್ಲಿ 3,176 ಜನರು ಕೋವಿಡ್​-19ನಿಂದ ಮೃತಪಟ್ಟೊದ್ದಾರೆ. ಜಾನ್ಸ್​ ಹಾಪ್​ಕಿನ್ಸ್​ ವಿವಿ ಪ್ರಕಾರ, ಈ ಸಾಂಕ್ರಾಮಿಕ ಆರಂಭವಾದ ದಿನದಿಂದ ಈವರೆಗೂ ಇಷ್ಟು ಜನರು ಮೃತಪಟ್ಟಿದ್ದು ಇದೇ ದಿನ ಮೊದಲು ಎಂದು ತಿಳಿಸಿದೆ.

ರಾಯಿಟರ್ಸ್ ಸುದ್ದಿಸಂಸ್ಥೆ ಪ್ರಕಾರ, ಈ ತಿಂಗಳಲ್ಲಿ ಪ್ರತಿದಿನ ಕನಿಷ್ಠ ಎರಡು ಸಾವಿರ ಜನರು ಮಾರಕ ಸೋಂಕಿನಿಂದ ಮೃತಪಡುತ್ತಿದ್ದಾರೆ ಎಂದು ತಿಳಿಸಿದೆ.

ಇದರ ನಡುವೆಯೂ ಅಮೆರಿಕ ಜಾರ್ಜಿಯಾ ಮತ್ತು ಟೆಕ್ಸಾಸ್​ ರಾಜ್ಯಗಳಲ್ಲಿ ಲಾಕ್​ಡೌನ್​ ನಿಯಮಗಳನ್ನು ತೆಗೆದುಹಾಕಿದ ಬಳಿಕ ಕೆಲ ವ್ಯವಹಾರಗಳು ಆರಂಭವಾಗಿವೆ.

ಅಮೆರಿಕದಲ್ಲಿ ಸಾವಿನ ಪ್ರಮಾಣ ಇನ್ನೂ ಹೆಚ್ಚಾಗಿದೆ ಎಂದು ಹೇಳಲಾಗುತ್ತಿದೆ. ಏಕೆಂದರೆ ಈವರೆಗೂ ಆಸ್ಪತ್ರೆ ಮತ್ತು ನರ್ಸಿಂಗ್​ ಹೋಮ್​ಗಳಲ್ಲಿ ಮೃತಪಟ್ಟವರ ಸಂಖ್ಯೆ ಲೆಕ್ಕ ಹಾಕಲಾಗಿದೆಯೇ ಹೊರತು ಮನೆಗಳಲ್ಲಿ ಸತ್ತವರ ಸಂಖ್ಯೆ ಎಣಿಕೆ ಮಾಡಿಲ್ಲ. ಅಮೆರಿಕದ ಕೇಂದ್ರಬಿಂದುವಾಗಿರುವ ನೂಯಾರ್ಕ್​ನಲ್ಲಿ ಶೇ.40ರಷ್ಟು ಸಾವುಗಳು ಸಂಭವಿಸಿದೆ. ಆನಂತರ ನ್ಯೂಜೆರ್ಸಿ, ಮಿಚಿಗನ್ ಹಾಗೂ ಮ್ಯಾಸಚೂಸೆಟ್ಸ್​ನಲ್ಲಿ ಹೆಚ್ಚು ಸಾವು ಸಂಭವಿಸಿದೆ.