ನವದೆಹಲಿ(ಅ.01): ಅತ್ಯಾಚಾರ ಆರೋಪ ಎದುರಿಸುತ್ತಿರುವ ನೇಪಾಳ ಸ್ಪೀಕರ್ ಕೃಷ್ಣ ಬಹದೂರ್ ಮಹರಾ ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದಾರೆ. ಫೆಡರಲ್ ಪಾರ್ಲಿಮೆಂಟ್ ಸೆಕ್ರೆಟರಿಯಟ್ನಲ್ಲಿ ಕೆಲಸ ಮಾಡುತ್ತಿರುವ ಮಹಿಳೆಯೊಬ್ಬರು, ತಮ್ಮ ಮೇಲೆ ನೇಪಾಳ ಸಂಸತ್ತಿನ ಸ್ಪೀಕರ್ ಅತ್ಯಾಚಾರ ಎಸಗಿರುವುದಾಗಿ ಆರೋಪಿಸಿದ್ದರು. ಈ ಹಿನ್ನೆಲೆಯಲ್ಲಿ ಇಂದು ಸ್ಪೀಕರ್ ಕೃಷ್ಣ ಬಹದೂರ್ ಮಹರಾ ರಾಜೀನಾಮೆ ಪತ್ರ ಸಲ್ಲಿಸಿದ್ದಾರೆ.
ಈ ಹಿಂದೆ ಹಮ್ರೋ ಕುರಾ ಆನ್ಲೈನ್ ಎಂಬ ನ್ಯೂಸ್ ಪೋರ್ಟಲ್ನಲ್ಲಿ ಸಂತ್ರಸ್ತೆ ಮಹಿಳೆ ವಿಡಿಯೋ ಬಿಡುಗಡೆ ಮಾಡಿದ್ದರು. “ನನಗೆ ಸ್ಪೀಕರ್ ಸುಮಾರು ವರ್ಷಗಳಿಂದ ಗೊತ್ತು. ಹಲವು ಬಾರಿ ನನ್ನ ಜೊತೆಗೆ ಅಸಭ್ಯವಾಗಿಯೂ ವರ್ತಿಸಿದ್ದಾರೆ. ನಾನು ಎಷ್ಟು ಬಾರಿ ಹೇಳಿದರೂ ಕೇಳಲಿಲ್ಲ” ಎಂದು ಸಂತ್ರಸ್ತೆ ವಿಡಿಯೋದಲ್ಲಿ ಹೇಳಿಕೊಂಡಿದ್ದಾರೆ.
“ನಾನು ಇದೇ ಸೆಪ್ಟೆಂಬರ್ 23ನೇ ತಾರೀಕು ನನ್ನ ಮನೆಯಲ್ಲಿದೆ. ಈ ವೇಳೆ ಸ್ಪೀಕರ್ ದಿಢೀರ್ ಮನೆಗೆ ಬಂದರು. ಬಳಿಕ ಏಕಾಏಕಿ ನನ್ನ ಮೇಲೆ ಅತ್ಯಾಚಾರ ಎಸಗಿದರು. ನಾನು ಎಷ್ಟೇ ಕೇಳಿಕೊಂಡರೂ ಬಿಡಲಿಲ್ಲ. ಬದಲಿಗೆ ನಿಂದಿಸಿ ಮಾನಸಿಕವಾಗಿ ಹಿಂಸಿಸಿದರು” ಎಂದು ಆರೋಪಿಸಿದ್ದಾರೆ.
ಇನ್ನು ಮಹಿಳೆ ಆರೋಪನ್ನು ಸ್ಪೀಕರ್ ನಿರಾಕರಿಸಿದ್ದರು. ಅಲ್ಲದೇ ಈ ಬಗ್ಗೆ ತನಿಖೆ ನಡೆಯಲಿ. ನನಗೆ ಈ ಪ್ರಕರಣದಲ್ಲಿ ನ್ಯಾಯ ಸಿಗಲಿದೆ ಎಂದು ಗೊತ್ತಿದೆ. ಅತ್ಯಾಚಾರ ಆರೋಪಕ್ಕೆ ಗುರಿಯಾಗಿರುವ ನಾನು, ನನ್ನ ಸ್ಥಾನಕ್ಕೆ ರಾಜೀನಾಮೆ ಸಲ್ಲಿಸುತ್ತಿದ್ದೇನೆ ಎಂದು ಸ್ಪೀಕರ್ ಕೃಷ್ಣ ಬಹದೂರ್ ಮಹರಾ ಉಪ ಸ್ಪೀಕರ್ ಶಿವಮಯ ತುಂಬಹಂಫೆಗೆ ರಾಜೀನಾಮೆ ಪತ್ರ ರವಾನಿಸಿದ್ದಾರೆ.
ನೇಪಾಳ ಪೊಲೀಸರು ಸ್ಪೀಕರ್ ವಿರುದ್ಧ ಎಫ್ಐಆರ್ ದಾಖಲಿಸಿಕೊಂಡಿದ್ದಾರೆ. ಇನ್ನೇನು ತನಿಖೆ ನಡೆಸಬೇಕೆನ್ನುವ ಹೊತ್ತಲೇ ಸ್ಪೀಕರ್ ಕೃಷ್ಣ ಬಹದೂರ್ ಮಹರಾ ರಾಜೀನಾಮೆ ನೀಡಿರುವುದು ಚರ್ಚಾ ಕೇಂದ್ರವಾಗಿದೆ.
Comments are closed.