ಟೆಕ್ಸಾಸ್: ಅವರು ಮಕ್ಕಳಾಗಿದ್ದಾಗಿನಿಂದಲೂ ಪರಸ್ಪರ ಇಷ್ಟಪಡುತ್ತಿದ್ದರು. ವಯಸ್ಕರಾದ ಬಳಿಕ ವಿವಾಹ ಬಂಧನಕ್ಕೆ ಒಳಗಾಗಿದ್ದರು. ನೋಂದಣಿ ಮದುವೆಯಾಗಿದ್ದ ಅವರಿಬ್ಬರೂ ಕೋರ್ಟ್ ಆವರಣದಿಂದ ಹೊರಬಂದು ವಿವಾಹ ಆರತಕ್ಷತೆಗೆ ನಡೆಯಲಿದ್ದ ತಾಣಕ್ಕೆ ತೆರಳುವ ಸಂದರ್ಭದಲ್ಲಿ ಬೃಹತ್ ಟ್ರಕ್ ರೂಪದಲ್ಲಿ ಬಂದ ವಿಧಿ ಅವರಿಬ್ಬರ ಪ್ರಾಣವನ್ನು ಸೆಳೆದುಕೊಂಡು ಹೋಗಿದೆ.
ಟೆಕ್ಸಾಸ್ನ ಮಾರ್ಗನ್ (19) ಮತ್ತು ಬಾರ್ಡೆಕ್ಸ್ (20) ಮೃತ ದಂಪತಿ. ತಾವಿಬ್ಬರೂ ವೈವಾಹಿಕ ಬಂಧನಕ್ಕೆ ಒಳಗಾದ ಸಂತಸದಲ್ಲಿದ್ದರು. ಪರಸ್ಪರ ಚುಂಬಿಸಿ ಸಂತಸವನ್ನು ಹಂಚಿಕೊಳ್ಳಲು ನವದಂಪತಿಗೆ ಅವಕಾಶ ಮಾಡಿಕೊಟ್ಟೆ. ಬಳಿಕ ಅವರಿಬ್ಬರೂ ತಮ್ಮ ಕಾರಿನಲ್ಲಿ ವಿವಾಹ ಆರತಕ್ಷತೆ ನಡೆಯಲಿದ್ದ ತಾಣಕ್ಕೆ ತೆರಳಲು ಮುಂದಾದರು. ಆರೆಂಜ್ ಕೌಂಟಿ ಜಸ್ಟೀಸ್ ಆಫ್ ದ ಪೀಸ್ ಜಾಯ್ ಡ್ಯುಬೋಸ್-ಸಿಮಾಂಟನ್ ಆವರಣದಿಂದ ಹೊರಹೋಗುತ್ತಿದ್ದ ನವದಂಪತಿಯಿದ್ದ ಕಾರಿಗೆ ಎಡಬದಿಯಿಂದ ಬಂದ ಟ್ರಕ್ ಒಂದು ಡಿಕ್ಕಿ ಹೊಡೆಯಿತು ಎಂದು ಆರೆಂಜ್ ಪೊಲೀಸ್ ಕ್ಯಾಪ್ಟನ್ ಕೀತ್ ಲಾಂಗ್ಲೋಯಿಸ್ ತಿಳಿಸಿದ್ದಾರೆ.
ಭಾರಿ ಟ್ರಾಕ್ಟರ್ ಅನ್ನು ಹೊತ್ತು ಸಾಗುತ್ತಿದ್ದ ಟ್ರಕ್ ಅಪ್ಪಳಿಸಿದ ರಭಸಕ್ಕೆ ನವದಂಪತಿಯಿದ್ದ ಕಾರು ಗಾಳಿಯಲ್ಲಿ ಹಲವು ಬಾರಿ ಪಲ್ಟಿ ಹೊಡೆದು ಬಿದ್ದಿತು. ನವದಂಪತಿಯಿಬ್ಬರು ಕೈಕೈ ಹಿಡಿದು ಸ್ಥಳದಲ್ಲೇ ಮೃತಪಟ್ಟಿದ್ದರು ಎಂದು ಹೇಳಿದ್ದಾರೆ.
ಟ್ರಕ್ ಚಾಲಕನನ್ನು ಬಂಧಿಸಲಾಗಿದೆ. ಸಂಚಾರ ನಿಯಮದ ಉಲ್ಲಂಘನೆಯಾಗಿರುವ ಲಕ್ಷಣಗಳು ಕಾಣುತ್ತಿಲ್ಲ. ಚಾಲಕ ಮದ್ಯಪಾನ ಮಾಡಿರಲಿಲ್ಲ. ಮಾದಕವಸ್ತು ಸೇವಿಸಿರಲಿಲ್ಲ. ಆದರೂ ಆತನ ರಕ್ತ ಪರೀಕ್ಷೆ ಮಾಡಿಸಲಾಗಿದ್ದು, ಮುಂದಿನ ಕ್ರಮ ಕೈಗೊಳ್ಳಲಾಗುತ್ತಿದೆ ಎಂದು ತಿಳಿಸಿದ್ದಾರೆ.
Comments are closed.