ನ್ಯೂಜಿಲೆಂಡ್ ಮಸೀದಿಯಲ್ಲಿ ಪ್ರಾರ್ಥನೆ ವೇಳೆ ಗುಂಡಿನ ದಾಳಿ; ಸಾವಿನ ಸಂಖ್ಯೆ 49ಕ್ಕೆ ಏರಿಕೆ

ಕ್ರೈಸ್ಟ್ ಚರ್ಚ್: ಇಲ್ಲಿನ ಮಸೀದಿಯೊಂದರಲ್ಲಿ ಶುಕ್ರವಾರ ಬಂದೂಕುಧಾರಿಗಳು ಪ್ರಾರ್ಥನೆಯ ವೇಳೆ ನಡೆಸಿದ ಗುಂಡಿನ ದಾಳಿಯಲ್ಲಿ ಕನಿಷ್ಠ 49 ಮಂದಿ ಸಾವನ್ನಪ್ಪಿದ್ದು, ಇದನ್ನು ಭಯೋತ್ಪಾದಕ ಕೃತ್ಯ ಎಂದು ಕಿವೀಸ್ ಪ್ರಧಾನಿ ಬಣ್ಣಿಸಿದ್ದಾರೆ.

ಇದು ಕಿವೀಸ್ ಇತಿಹಾಸದಲ್ಲೇ ನಡೆದ ಅತ್ಯಂತ ಭಯಾನಕ ಸಾಮೂಹಿಕ ಹತ್ಯಾ ಘಟನೆ ಎಂದು ಹೇಳಲಾಗುತ್ತಿದ್ದು, ಘಟನೆಯ ಹಿನ್ನೆಲೆಯಲ್ಲಿ ಬಾಂಗ್ಲಾ ದೇಶ ಹಾಗೂ ನ್ಯೂಜಿಲೆಂಡ್ ನಡುವೆ ನಡೆಯಬೇಕಿದ್ದ ಟೆಸ್ಟ್ ಪಂದ್ಯವನ್ನೂ ರದ್ದುಪಡಿಸಲಾಗಿದೆ.

ಮಸೀದಿ ಶೂಟಿಂಗ್ ಪ್ರಕರಣಗಳಲ್ಲಿ, ಕನಿಷ್ಠ 49 ಮಂದಿ ಸಾವನ್ನಪ್ಪಿದ್ದಾರೆ, 20ಕ್ಕೂ ಹೆಚ್ಚು ಮಂದಿ ತೀವ್ರವಾಗಿ ಗಾಯಗೊಂಡಿದ್ದಾರೆ ಎಂದು ನ್ಯೂಜಿಲೆಂಡ್ ಪ್ರಧಾನಿ ಜಸಿಂಡಾ ಆರ್ಡರ್ನ್ ಅವರು ತಿಳಿಸಿದ್ದಾರೆ. ಶೂಟಿಂಗ್ ನಡೆದ ಸ್ಥಳದಲ್ಲಿ ಎಲ್ಲೆಲ್ಲೂ ರಕ್ತ ಗೋಚರಿಸುತ್ತಿದ್ದು, ಜನರು ಭಯಭೀತರಾಗಿದ್ದಾರೆ.

ಸಾಮಾಜಿಕ ಜಾಲತಾಣದಲ್ಲಿ ಈ ಘಟನೆಯ ಲೈವ್ ವೀಡಿಯೋ ಕ್ಲಿಪ್ಪಿಂಗ್ ಹರಿದಾಡಿದ್ದು, ಇದನ್ನು ಹಂತಕನೇ ರೆಕಾರ್ಡ್ ಮಾಡಿದ್ದನೆಂದು ಹೇಳಲಾಗುತ್ತಿದೆ. ಈ ವೀಡಿಯೊದ ಪ್ರಕಾರ, ಒಬ್ಬ ಹಂತಕ ಮಸೀದಿಯೊಂದಕ್ಕೆ ನುಗ್ಗಿ ಒಳಗಿದ್ದವರ ಮೇಲೆ ಯದ್ವಾ ತದ್ವಾ ಗುಂಡು ಹಾರಿಸಿದ್ದಾನೆ.

ಶಂಕಿತ ವಾಹನಗಳಿಗೆ ಅಳವಡಿಸಲಾಗಿದ್ದ ಎರಡು ಸ್ಫೋಟಕ ಸಾಧನಗಳು ಪತ್ತೆಯಾಗಿದ್ದು, ಅವುಗಳನ್ನು ನಿಷ್ಕ್ರಿಯಗೊಳಿಸಲಾಗಿದೆ ಎಂದು ಹೇಳಿರುವ ಅವರು, ಇದೊಂದು ಭಯೋತ್ಪಾದಕ ದಾಳಿ ಎಂಬುದು ಸ್ಪಷ್ಟವಾಗುತ್ತದೆ. ನಮಗೆ ತಿಳಿದಿರುವ ಪ್ರಕಾರ, ಇದೊಂದು ಪೂರ್ವ ನಿಯೋಜಿತ ಕೃತ್ಯ ಎಂದು ತಿಳಿಸಿದ್ದಾರೆ.

ಈ ಘಟನೆಯ ಹಿನ್ನೆಲೆಯಲ್ಲಿ, ದೇಶದಲ್ಲಿರುವ ಎಲ್ಲ ಮಸೀದಿಗಳು ಬಾಗಿಲು ಹಾಕುವಂತೆ ನಿರ್ದೇಶಿಸಲಾಗಿದೆ ಎಂದು ಕಿವೀಸ್ ಪೊಲೀಸರು ತಿಳಿಸಿದ್ದಾರೆ.

ಭಾರತೀಯರಿಗಾಗಿ ಸಹಾಯವಾಣಿ
ನ್ಯೂಜಿಲೆಂಡ್‌ನಲ್ಲಿರುವ ಭಾರತೀಯರಿಗಾಗಿ ಸಹಾಯವಾಣಿ ತೆರೆಯಲಾಗಿದ್ದು, ಸಹಾಯಕ್ಕಾಗಿ ಭಾರತೀಯರು 021803899 ಅಥವಾ 021850033 ದೂರವಾಣಿ ಸಂಖ್ಯೆಯನ್ನು ಸಂಪರ್ಕಿಸಬಹುದಾಗಿದೆ.

ಘಟನೆಯ ಹಿನ್ನೆಲೆಯಲ್ಲಿ ಸುತ್ತಮುತ್ತಲಿನ ಶಾಲೆಗಳನ್ನು ಮುಚ್ಚಲು ಆದೇಶಿಸಲಾಗಿದೆ. ನಗರದಲ್ಲಿ ಕಟ್ಟೆಚ್ಚರ ವಹಿಸಲಾಗಿದ್ದು, ನಾಗರಿಕರು ಆತಂಕದಿಂದಿದ್ದಾರೆ. ನಗರದಾದ್ಯಂತ ಪೊಲೀಸ್ ಪಡೆಯನ್ನು ನಿಯೋಜಿಸಲಾಗಿದೆ.

ಶುಕ್ರವಾರ ನಡೆದ ಈ ಶೂಟೌಟ್‌ನಲ್ಲಿ “ಹಲವು ಮಂದಿ ಸಾವನ್ನಪ್ಪಿರಬಹುದು” ಎಂದು ಪೊಲೀಸರು ಹೇಳಿದ್ದಾರೆ. ನಾಲ್ವರನ್ನು ವಶಕ್ಕೆ ಪಡೆಯಲಾಗಿದ್ದು, ಇವರು ಶಂಕಿತರು ಎಂದು ಪೊಲೀಸ್ ಕಮಿಶನರ್ ಮೈಕ್ ಬುಶ್ ಹೇಳಿದ್ದಾರೆ.

“ನಮ್ಮ ಪ್ರಕಾರ, ಎರಡು ಸ್ಥಳಗಳಲ್ಲಿ ಶೂಟೌಟ್ ನಡೆದಿದೆ. ಡೀನ್ಸ್ ಅವೆನ್ಯೂನಲ್ಲಿರುವ ಮಸೀದಿಯಲ್ಲಿ ಹಾಗೂ ಮತ್ತೊಂದು ಲಿನ್‌ವುಡ್ ಅವೆನ್ಯೂವಿನಲ್ಲಿರುವ ಮಸೀದಿಯಲ್ಲಿ” ಎಂದು ಬುಶ್ ಹೇಳಿದ್ದು, ಕ್ರೈಸ್ಟ್‌ಚರ್ಚ್ ಕ್ಯಾಂಟರ್‌ಬೆರಿ ಪ್ರದೇಶದಲ್ಲಿ ಗಂಭೀರ ಪರಿಸ್ಥಿತಿ ಇದ್ದು, ನಾಗರಿಕರು ಬೀದಿಗೆ ಇಳಿಯಬಾರದು ಎಂದು ಎಚ್ಚರಿಸಿದ್ದಾರೆ. ಮುಂದಿನ ಸೂಚನೆ ನೀಡುವವರೆಗೂ ಮಸೀದಿಗೆ ಹೋಗುವವರು ಮನೆಯೊಳಗೇ ಕುಳಿತುಕೊಳ್ಳುವಂತೆಯೂ ಅವರು ನಾಗರಿಕರಿಗೆ ಸೂಚನೆ ನೀಡಿದ್ದಾರೆ.

ಸ್ಫೋಟಕಗಳು ಪತ್ತೆ
ಮಸೀದಿ ಪಕ್ಕದಲ್ಲೇ ಇದ್ದ ವಾಹನವೊಂದರಲ್ಲಿ ಸುಧಾರಿತ ಸ್ಫೋಟಕ ಸಾಧನಗಳು (IED) ಕಂಡುಬಂದಿದ್ದು, ಅವುಗಳನ್ನು ವಶಕ್ಕೆ ಪಡೆದು, ನಿಷ್ಕ್ರಿಯಗೊಳಿಸಲಾಗಿದೆ ಎಂದು ಕ್ರೈಸ್ಟ್ ಚರ್ಚ್ ಪೊಲೀಸರು ತಿಳಿಸಿದ್ದಾರೆ.

ಶುಕ್ರವಾರದ ಪ್ರಾರ್ಥನಾ ಸಮಯದಲ್ಲಿ ಮಸೀದಿಗಳು ಜನನಿಬಿಡವಾಗಿರುತ್ತವೆ. ಹೆಚ್ಚಿನ ಮುಸ್ಲಿಮರು ತಮ್ಮ ಉದ್ಯೋಗದ ಮಧ್ಯೆ ಬಿಡುವು ಪಡೆದು ಪ್ರಾರ್ಥನೆಗೆ ಸೇರುತ್ತಾರೆ. ಸ್ಥಳೀಯ ಕಾಲಮಾನ ಅಪರಾಹ್ನ 1.40ರ ಅವಧಿಯಲ್ಲಿ ಈ ಶೂಟೌಟ್ ನಡೆದಿದೆ. ಈ ಹಿನ್ನೆಲೆಯಲ್ಲಿ ಮಸೀದಿಗಳಿಗೆ ಭೇಟಿ ನೀಡದಂತೆ ಅಲ್ಲಿನ ಮುಸ್ಲಿಮರಿಗೆ ಪೊಲೀಸರು ಸಲಹೆ ನೀಡಿದ್ದಾರೆ.

ದಾಳಿ ನಡೆದ ಕೆಲವು ಕ್ಷಣಗಳ ಮೊದಲು, ಶೂಟರ್‌ಗಳಲ್ಲಿ ಒಬ್ಬನಿಗೆ ಸೇರಿದ್ದೆನ್ನಲಾದ ಫೇಸ್‌ಬುಕ್ ಪುಟದಲ್ಲಿ, 87 ಪುಟಗಳ ದಾಖಲೆಯೊಂದಕ್ಕೆ ಲಿಂಕ್ ನೀಡಲಾಗಿದೆ. ಅದರಲ್ಲಿ ವಲಸೆ-ವಿರೋಧಿ, ಮುಸ್ಲಿಂ-ವಿರೋಧಿ ಬರಹಗಳಿವೆ.

ನಾಲ್ವರು ವಶದಲ್ಲಿ
2 ಮಸೀದಿಗಳಲ್ಲಿ ನಡೆದ ಶೂಟೌಟ್ ಪ್ರಕರಣಕ್ಕೆ ಸಂಬಂಧಿಸಿದಂತೆ, 3 ಪುರುಷರು ಹಾಗೂ ಒಬ್ಬ ಮಹಿಳೆಯನ್ನು ವಶಕ್ಕೆ ಪಡೆದು ತೀವ್ರ ವಿಚಾರಣೆಗೊಳಪಡಿಸಲಾಗುತ್ತಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಉಗ್ರವಾದದ ಆತಂಕವಿರುವುದರಿಂದ ಈ ಕುರಿತಾಗಿ ಕ್ಷಿಪ್ರ ತನಿಖೆ ಆರಂಭವಾಗಿದೆ. ಹೆಚ್ಚಿನ ಮಾಹಿತಿ ನಿರೀಕ್ಷಿಸಲಾಗುತ್ತಿದೆ.