ಮದುವೆ ಹಲವರ ಜೀವನದಲ್ಲಿ ಬರುವ ಸುಮಧುರವಾದ ಕ್ಷಣ. ಗಂಡು- ಹೆಣ್ಣಿಗೆ ಎಂದೂ ಮರೆಯಲಾಗದ ಕೆಲವು ಸುಮಧುರ ಕ್ಷಣಗಳಿಗೆ ಸಾಕ್ಷಿಯಾಗುವ ವೇದಿಕೆ. ಹಾಗಾಗಿ ಅನೇಕರು ತಮ್ಮ ವಿವಾಹವನ್ನು ಅದ್ಧೂರಿಯಾಗಿ ಮಾಡಿಕೊಳ್ಳುತ್ತಾರೆ. ಫಿಲಿಫೈನ್ಸ್ನಲ್ಲಿ ನವ ಜೋಡಿ ಇದೇ ರೀತಿಯ ಕನಸು ಕಂಡಿತ್ತು. ಮದುವೆಗೆ ಭಾರೀ ಸಿದ್ಧತೆ ಮಾಡಿಕೊಂಡಿತ್ತು ಈ ಜೋಡಿ.
ಮದುವೆ ಮನೆ ಪೂರ್ತಿ ಹೂವಿನ ಅಲಂಕಾರ, ಭಾರೀ ಭೋಜನ, ಬಂದ ಅತಿಥಿಗಳನ್ನು ಸತ್ಕರಿಸಲು ವಿಶೇಷ ಸಿಬ್ಬಂದಿ. ಹೀಗೆ ನಾನಾ ಸಿದ್ಧತೆಗಳನ್ನು ಮಾಡಿಕೊಳ್ಳಲಾಗಿತ್ತು. ಅದೇ ರೀತಿ, ಮದುವೆ ನಂತರ ಆರತಕ್ಷತೆಯಲ್ಲಿ ಕೇಕ್ ಕತ್ತರಿಸುವ ಉದ್ದೇಶ ಇಟ್ಟುಕೊಂಡಿತ್ತು ಈ ನವ ದಂಪತಿ. ಅದಕ್ಕಾಗಿ ಬರಬ್ಬೋರಿ 5 ಲಕ್ಷ ರೂ. ಮೊತ್ತದ ಕೇಕ್ ಆರ್ಡರ್ ಮಾಡಿತ್ತು. ಆರಕ್ಷತೆಗೆ ಕೇಕ್ ಕೂಡ ಬಂದಿತ್ತು.
ಬಂದ ಅತಿಥಿಗಳ ಸಮ್ಮುಖದಲ್ಲಿ ದೊಡ್ಡ ಮೊತ್ತದ ಕೇಕ್ ಕತ್ತರಿಸಲು ದಂಪತಿ ಮುಂದೆ ಬಂದರು. ಚಾಕು ಹಿಡಿದು ಕೇಕ್ ಕತ್ತರಿಸಿದರು. ಈ ವೇಳೆ ದಂಪತಿಗೆ ಆಘಾತ ಹಾಗೂ ರುಚಿಯಾದ ಕೇಕ್ಅನ್ನು ಸವಿಯಬೇಕು ಎಂದು ಗಂಟೆಗಟ್ಟಲೆ ಕಾದಿದ್ದ ಅತಿಥಿಗಳಿಗೆ ನಿರಾಶೆ ಕಾದಿತ್ತು. ಕಾರಣ, ಕೇಕ್ ಒಳಗೆ ಇದ್ದಿದ್ದು, ಥರ್ಮಾಕೋಲ್!
ಈ ಘಟನೆ ನವ ದಂಪತಿಗೆ ಮುಜುಗರ ತಂದಿತ್ತು. ಮದುವೆ ಮಂಟಪದಲ್ಲಿ ನೆರೆದಿದ್ದ ಬಂಧುಗಳು ಮತ್ತು ಗೆಳೆಯರು ಈ ಘಟನೆ ನೋಡಿ ನಕ್ಕರೆ, ಇನ್ನೂ ಕೆಲವರು ಬೇಸರ ವ್ಯಕ್ತಪಡಿಸಿದರು. ಇನ್ನು ಕೇಕ್ ತಿನ್ನಬೇಕು ಎಂದು ಆಸೆ ಇಟ್ಟುಕೊಂಡು ಕಾದು ಕೂತವರು ಅಂಗಡಿಯವರಿಗೆ ಹಿಡಿಶಾಪ ಹಾಕಿದರು .
ಈ ಘಟನೆ ನೋಡುತ್ತಿದ್ದಂತೆ, ಮದುವೆ ಹುಡಗಿ ಮುಖದಲ್ಲಿ ನಗು, ಸಂತಸ ಮಾಯವಾಗಿ, ಬೇಸರ ಮೂಡಿತ್ತು. ನಗು ಮಾಯವಾಗಿ ಅಳುವಿನ ಕಟ್ಟೆ ಒಡೆಯಿತು. ವಧು ಸ್ಥಳದಲ್ಲೇ ಕುಸಿದು ಒಂದೇ ಸಮನೆ ಅಳಲು ಆರಂಭಿಸಿದ್ದಳು. ಅಂಗಡಿಯವರು ಮಾಡಿದ ಮೋಸಕ್ಕೆ ಈ ದಂಪತಿ ಈಗ ಪೊಲೀಸ್ ಠಾಣೆಯ ಮೆಟ್ಟಿಲೇರಿದ್ದಾರೆ. ತಮಗಾದ ಅವಮಾನಕ್ಕೆ ಪರಿಹಾರ ನೀಡುವಂತೆ ಆಗ್ರಹಿಸಿದ್ದಾರೆ.
Comments are closed.