ವಾಷಿಂಗ್ಟನ್: ಇದೇ ವರ್ಷದ ಆರಂಭದಲ್ಲಿ ವಿಮಾನದಲ್ಲಿ ಮಲಗಿದ್ದ ಸಹ ಪ್ರಯಾಣಿಕ ಮಹಿಳೆಗೆ ಲೈಂಗಿಕ ಕಿರುಕುಳ ನೀಡಿದ ಆರೋಪದ ಮೇಲೆ ತಮಿಳುನಾಡಿನ ಟೆಕ್ಕಿಗೆ ಅಮೆರಿಕ ನ್ಯಾಯಾಲಯ 9 ವರ್ಷಗಳ ಜೈಲುಶಿಕ್ಷೆ ನೀಡಿದೆ.
ಎಚ್-1ಬಿ ವೀಸಾ ಅಡಿ ತಮಿಳುನಾಡಿನ ಪ್ರಭು ರಾಮಮೂರ್ತಿ 2015ರಲ್ಲಿ ಅಮೆರಿಕಕ್ಕೆ ತೆರಳಿದ್ದರು. ಒಂಭತ್ತು ವರ್ಷ ಜೈಲು ಶಿಕ್ಷೆ ಪೂರ್ಣಗೊಂಡ ಬಳಿಕ ರಾಮಮೂರ್ತಿಯನ್ನು ಗಡಿಪಾರು ಮಾಡುವಂತೆ ಫೆಡರಲ್ ಕೋರ್ಟ್ ಆದೇಶದಲ್ಲಿ ತಿಳಿಸಿದೆ.
ತೀರ್ಪು ನೀಡಿದ ನ್ಯಾಯಮೂರ್ತಿ ಟೆರೆನ್ಸ್ ಬೆರ್ಜ್ ಅವರು, ಇಂತಹ ಅಪರಾಧಗಳನ್ನು ತಡೆಗಟ್ಟಲು ಈ ಆದೇಶ ಪೂರಕವಾಗಲಿದೆ ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ. ಅಪರಾಧಿಗೆ 11 ವರ್ಷ ಜೈಲು ಶಿಕ್ಷೆ ವಿಧಿಸಬೇಕು ಎಂದು ಫೆಡರಲ್ ಫಿರ್ಯಾದುದಾರರು ಕೋರಿದ್ದರು.
ವಿಮಾನದಲ್ಲಿ ಪ್ರಯಾಣಿಸುವ ಪ್ರತಿಯೊಬ್ಬರಿಗೂ ಭದ್ರತೆ ಮತ್ತು ಸುರಕ್ಷತೆ ಅವರ ಹಕ್ಕಾಗಿದೆ. ಅಸಂಬದ್ಧ ನಡವಳಿಕೆ ತೋರುವವರನ್ನು ನಾವು ಯಾವುದೇ ಕಾರಣಕ್ಕೂ ಸಹಿಸಿಕೊಳ್ಳುವುದಿಲ್ಲ. ಈ ಪ್ರಕರಣದಲ್ಲಿ ಸಂತ್ರಸ್ತರು ಗಟ್ಟಿಯಾಗಿ ದನಿ ಎತ್ತಿ, ನ್ಯಾಯ ಕೇಳಿಕೊಂಡು ಬಂದಿದ್ದನ್ನು ನಾವು ಶ್ಲಾಘಿಸಬೇಕು ಎಂದು ಆದೇಶದ ನಂತರ ಯುಎಸ್ ಅಟಾರ್ನಿ ಮಾಥ್ಯೂ ಶಿಂಡರ್ ಅಭಿಪ್ರಾಯಪಟ್ಟಿದ್ದಾರೆ.
ಆಗಸ್ಟ್ನಲ್ಲಿ ರಾಮಮೂರ್ತಿಯನ್ನು ಆರೋಪಿಯನ್ನಾಗಿ ಮಾಡಿ, ಐದು ದಿನಗಳ ಕಾಲ ವಿಚಾರಣೆ ನಡೆಸಿ, ಇಂದು ಈ ತೀರ್ಪು ನೀಡಲಾಗಿದೆ.
ಸಂತ್ರಸ್ತೆ ಹೇಳಿಕೆ ಪ್ರಕಾರ, ಜನವರಿ 3ರಂದು ಲಾಸ್ ವೆಗಾಸ್ನಿಂದ ಡೆಟ್ರಾಯ್ಟ್ಗೆ ವಿಮಾನದಲ್ಲಿ ಪ್ರಯಾಣ ಮಾಡಲಾಗುತ್ತಿತ್ತು. ರಾಮಮೂರ್ತಿ ತನ್ನ ಹೆಂಡತಿ ಜೊತೆ ಕುಳಿತ್ತಿದ್ದರು. ಈ ವೇಳೆ ತನ್ನ ಪಕ್ಕದಲ್ಲಿ ಕುಳಿತಿದ್ದ ನನಗೆ ಲೈಂಗಿಕ ಕಿರುಕುಳ ನೀಡಿದ್ದರು ಎಂದು ಹೇಳಿಕೆ ದಾಖಲಿಸಿದ್ದರು.
ವಿಮಾನದಲ್ಲಿ ಪ್ರಯಾಣಿಸುವ ಪ್ರಯಾಣಿಕರ ಸುರಕ್ಷತೆ ಮತ್ತು ಭದ್ರತೆಗೆ ಈ ಆದೇಶವೇ ಸಾಕ್ಷಿಯಾಗಿದೆ. ಇತ್ತೀಚಿನ ವರ್ಷಗಳಲ್ಲಿ ವಿಮಾನದಲ್ಲಿ ಲೈಂಗಿಕ ಕಿರುಕುಳ ನೀಡಿದ ಆರೋಪದ ಮೇಲೆ ಸಾಕಷ್ಟು ಭಾರತೀಯ ಪ್ರಜೆಗಳನ್ನು ಬಂಧಿಸಲಾಗಿದೆ. ಇಂತಹ ಪ್ರಕರಣಗಳಿಗೆ ಗಂಭೀರ ಶಿಕ್ಷೆ ಕಟ್ಟಿಟ್ಟ ಬುತ್ತಿ ಎಂದು ಎಫ್ಬಿಐ ಹೇಳಿದೆ.
ತಮಿಳುನಾಡು ಮೂಲದವರಾದ ರಾಮಮೂರ್ತಿ ಪೋಷಕರು ರೈತರಾಗಿದ್ದಾರೆ. ತನ್ನ ಪದವಿ ಮುಗಿದ ಮೇಲೆ ರಾಮಮೂರ್ತಿ 2015ರ ಜುಲೈನಲ್ಲಿ ಅಮೆರಿಕದ ಐಟಿ ಕಂಪನಿಯಲ್ಲಿ ಕೆಲಸಕ್ಕೆ ಸೇರಿದ್ದರು.
Comments are closed.