ನವದೆಹಲಿ/ಇಸ್ಲಾಮಾಬಾದ್: ಪಠಾಣ್ಕೋಟ್ ವಾಯುನೆಲೆ ಮೇಲಿನ ದಾಳಿ ಪ್ರಕರಣಕ್ಕೆ ಸಂಬಂಧಿಸಿದಂತೆ ದೇಶಾದ್ಯಂತ ಜೈಷ್ ಎ ಮೊಹಮ್ಮದ್ ಸಂಘಟನೆಯ ಕಚೇರಿಗಳ ಮೇಲೆ ದಾಳಿ ನಡೆಸಿ 12ಕ್ಕೂ ಹೆಚ್ಚು ಉಗ್ರರನ್ನು ಬಂಧಿಸಿದ್ದ ಪಾಕಿಸ್ತಾನ ಬೆಳಕು ಹರಿಯುವುದರೊಳಗೆ ಬಣ್ಣ ಬದಲಿಸಿದೆ. ಜೈಷ್ ಮುಖ್ಯಸ್ಥ ಮಸೂದ್ ಅಜರ್ ಬಂಧನವನ್ನು ಪಾಕ್ ಮಾಧ್ಯಮಗಳು ದೃಢೀಕರಿಸಿದ ನಂತರವೂ ಈ ವಿಚಾರದ ಬಗ್ಗೆ ತನಗೆ ಮಾಹಿತಿಯೇ ಇಲ್ಲ ಎಂದು ಹೊಸ ನಾಟಕ ಆರಂಭಿಸಿದೆ.
ಪಠಾಣ್ಕೋಟ್ ದಾಳಿ ಪ್ರಕರಣಕ್ಕೆ ಸಂಬಂಧಿಸಿದಂತೆ ಹಲವರನ್ನು ಬಂಧಿಸಲಾಗಿದೆಯಾದರೂ ಪಾಕಿಸ್ತಾನದ ತನಿಖಾ ತಂಡ ಪಠಾಣ್ಕೋಟ್ಗೆ ಭೇಟಿಕೊಟ್ಟ ಬಳಿಕವಷ್ಟೇ ಉಗ್ರರ ವಿರುದ್ಧ ಕ್ರಮ ಕೈಗೊಳ್ಳುವುದಾಗಿ ವರಸೆ ಬದಲಿಸುವ ಮೂಲಕ ತನ್ನ ಇಬ್ಬಗೆ ನೀತಿಯನ್ನು ಮತ್ತೊಮ್ಮೆ ಪ್ರದರ್ಶಿಸಿದೆ.
ಉಗ್ರ ಮಸೂದ್ ಅಜರ್ನನ್ನು ಬಂಧಿಸಿರುವ ಬಗ್ಗೆ ಯಾವುದೇ ಮಾಹಿತಿ ಇಲ್ಲ ಎಂದು ಪಾಕಿಸ್ತಾನ ವಿದೇಶಾಂಗ ಸಚಿವಾಲಯ ಗುರುವಾರ ಪ್ರತಿಕ್ರಿಯಿಸಿದೆ. ಹೀಗಾಗಿ ಜೈಷ್ ಪ್ರಮುಖ ಉಗ್ರ ಮಸೂದ್ ಸೆರೆ ವಿಚಾರ ಸಾಕಷ್ಟು ಅನುಮಾನಕ್ಕೆ ಕಾರಣವಾಗಿದೆ.
ಗುಪ್ತ ಸ್ಥಳದಲ್ಲಿ ಮಸೂದ್?
ಉಗ್ರ ಸಂಘಟನೆ ಜೈಷ್ ಎ ಮೊಹಮ್ಮದ್ ಮುಖ್ಯಸ್ಥ ಮಸೂದ್ ಅಜರ್ನನ್ನು ವಶಕ್ಕೆ ಪಡೆದಿರುವ ಪಾಕ್ ಸರ್ಕಾರ, ಗುಪ್ತ ಸ್ಥಳವೊಂದರಲ್ಲಿ ಇರಿಸಿದೆ ಎನ್ನಲಾಗುತ್ತಿದೆ. ಬಂಧನ ವಿಚಾರ ಬಹಿರಂಗಗೊಂಡಲ್ಲಿ ಮಸೂದ್ನನ್ನು ಬಿಡಿಸಲು ಆತನ ಸಹಚರರು ಸಂಚು ರೂಪಿಸಬಹುದು ಎಂಬ ಆತಂಕದಿಂದ ಪಾಕ್ ಈ ಕ್ರಮ ಕೈಗೊಂಡಿದೆ. ಆತನನ್ನು ಮುಲ್ತಾನ್ನಲ್ಲಿ ಇಡಲಾಗಿದ್ದು, ಇನ್ನೆರಡು ದಿನದಲ್ಲಿ ಲಾಹೋರ್ಗೆ ಸ್ಥಳಾಂತರಿಸುವ ಸಾಧ್ಯತೆಯಿದೆ. ಇನ್ನಿತರ ಜೈಷ್ ಉಗ್ರರ ಬಂಧನಕ್ಕೆ ಪಾಕ್ ಸರ್ಕಾರ ಆದೇಶ ಹೊರಡಿಸಿದೆ ಎಂದು ಅಧಿಕಾರಿಯೊಬ್ಬರು ಪಾಕ್ ಮಾಧ್ಯಮಕ್ಕೆ ತಿಳಿಸಿದ್ದಾರೆ.
ಮಾತುಕತೆಗೆ ಅಲ್ಪವಿರಾಮ…
ನಿರೀಕ್ಷೆಯಂತೆ ಶುಕ್ರವಾರ ನಡೆಯಬೇಕಿದ್ದ ಭಾರತ-ಪಾಕಿಸ್ತಾನದ ವಿದೇಶಾಂಗ ಸಚಿವಾಲಯ ಕಾರ್ಯದರ್ಶಿಗಳ ಮಾತುಕತೆ ತಾತ್ಕಾಲಿಕವಾಗಿ ಮುಂದೂಡಿಕೆಯಾಗಿದೆ. ಉಭಯ ದೇಶಗಳ ರಾಜತಾಂತ್ರಿಕ ಅಧಿಕಾರಿಗಳು ಪರಸ್ಪರ ಚರ್ಚೆ ನಡೆಸಿ ಈ ನಿರ್ಧಾರ ಕೈಗೊಂಡಿದ್ದು, ಮಾತುಕತೆಯ ಮುಂದಿನ ದಿನಾಂಕವನ್ನು ಸದ್ಯದಲ್ಲೇ ನಿಗದಿ ಪಡಿಸಲಾಗುವುದು ಎಂದು ವಿದೇಶಾಂಗ ಸಚಿವಾಲಯ ವಕ್ತಾರ ವಿಕಾಸ್ ಸ್ವರೂಪ್ ಹೇಳಿದ್ದಾರೆ. ಪಠಾಣ್ಕೋಟ್ ದಾಳಿ ತನಿಖೆ ಆರಂಭಿಸಿರುವ ಪಾಕಿಸ್ತಾನ ಕೆಲ ಉಗ್ರರನ್ನು ಬಂಧಿಸಿ, ವಿಚಾರಣೆ ಆರಂಭಿಸಿರುವುದು ಸ್ವಾಗತಾರ್ಹ. ಪಾಕ್ ಕೈಗೊಂಡಿರುವ ತನಿಖೆಗೆ ಭಾರತ ಅಗತ್ಯ ನೆರವು ನೀಡಲಿದೆ. ಕೇಂದ್ರ ಸರ್ಕಾರ ನೀಡಿರುವ ಸಾಕ್ಷ್ಯಳನ್ನು ಒಪ್ಪಿಕೊಂಡು, ಪಠಾಣ್ಕೋಟ್ ದಾಳಿಯ ಸೂತ್ರಧಾರರ ವಿರುದ್ಧ ಪಾಕಿಸ್ತಾನ ಸರ್ಕಾರ ಕಠಿಣ ಕ್ರಮ ಜರುಗಿಸಬೇಕು ಎಂದು ಅವರು ಒತ್ತಾಯಿಸಿದ್ದಾರೆ.
ಭಾರತದ ಮೇಲೆ ಪ್ರತೀಕಾರ
ಪಾಕಿಸ್ತಾನ ಸರ್ಕಾರ ಉಗ್ರರ ವಿರುದ್ಧ ಕಾರ್ಯಾಚರಣೆ ಆರಂಭಿಸಿರುವ ಬೆನ್ನಲ್ಲೇ ಜೈಷ್ ಎ ಮೊಹಮ್ಮದ್ ಆಡಿಯೋ ಒಂದನ್ನು ಬಿಡುಗಡೆ ಮಾಡಿದ್ದು, ಭಾರತ ಹಾಗೂ ಪಾಕಿಸ್ತಾನ ವಿರುದ್ಧ ಪ್ರತೀಕಾರ ತೀರಿಸಿಕೊಳ್ಳು ವುದಾಗಿ ಎಚ್ಚರಿಸಿದೆ. ಮಸೂದ್ ಬರೆದಿರುವ ಲೇಖನವನ್ನು ಬೇರೆ ವ್ಯಕ್ತಿಯೊಬ್ಬ ವಾಚಿಸಿರುವ ಧ್ವನಿ ಮುದ್ರಿಕೆ ಇದಾಗಿದೆ. ಜೈಷ್ ಎ ಮೊಹಮ್ಮದ್ನ ಆನ್ಲೈನ್ ಮುಖವಾಣಿಯಲ್ಲೂ ಈ ಲೇಖನ ಪ್ರಕಟವಾಗಿದೆ.
