ಬೀಜಿಂಗ್: ಆಟಿಕೆಗಳಂತೆ ವಿದ್ಯುನ್ಮಾನ ಉಪಕರಣಗಳನ್ನು ಉತ್ಪಾದಿಸಿ ಜಗತ್ತಿನ ವಿವಿಧ ರಾಷ್ಟ್ರಗಳಲ್ಲಿ ಕಡಲೆಕಾಯಿ ಮಾರಿದಂತೆ ಬೀದಿಯಲ್ಲಿ ಮಾರಾಟ ಮಾಡುವ ಚೀನಕ್ಕೆ 70ರ ವಯಸ್ಸು ದಾಟಿದ ವೃದ್ಧರು ಬಹುದೊಡ್ಡ ಹೊರೆಯಂತೆ.
ಇದಕ್ಕೆ ಇದಾಹರಣೆ ಎಂದರೆ, ಚೀನದ ಸಿಚುಯಾನ್ ಪ್ರಾಂತ್ಯದ ತೋಂಗ್‌ಜಿಯಾಂಗ್ ಜಿಲ್ಲೆಯ ಸ್ಥಳೀಯ ಸರಕಾರವೊಂದು 70 ದಾಟಿದ ವೃದ್ಧರು ಹುಟ್ಟು ಹಬ್ಬ ಆಚರಿಸಿಕೊಳ್ಳುವುದನ್ನು ನಿಷೇಧಿಸಿದೆ. ಇದಕ್ಕೆ, ವೃದ್ಧರು ಸಮುದಾಯಕ್ಕೆ ಹೊರೆ ಎಂಬ ಕಾರಣ ನೀಡಿದೆ.
ವೃದ್ಧರಿಗಾಗಿ ಬರ್ತಡೇ ಪಾರ್ಟಿಗಳನ್ನು ಆಯೋಜಿಸುವುದು ಅವರ ಕುಟುಂಬಗಳಿಗೆ ಭಾರಿ ಹಣಕಾಸಿನ ಹೊರೆಯಾಗುತ್ತದೆ. ಪಾರ್ಟಿಗೆ ಬಂದವರಿಗೆ ಊಟ ಹಾಕುವುದೇ ಜೇಬು ಖಾಲಿ ಮಾಡುವ ಕೆಲಸ ಅಲ್ಲದೆ, ಗಿಫ್ಟ್ ಕೊಡಲೇಬೇಕಾದ ಅನಿವಾರ್ಯತೆ ಬಂದವರದ್ದು ಎಂದು ತೋಂಗ್‌ಜಿಯಾಂಗ್ ಜಿಲ್ಲೆಯ ಅಧಿಕಾರಿಯೊಬ್ಬರು ಹೇಳಿರುವುದನ್ನು ಉಲ್ಲೇಖಿಸಿ ಹಾಂಕಾಂಗ್ ಮೂಲದ ಸೌತ್ ಚೀನ ಮಾರ್ನಿಂಗ್ ವರದಿ ಮಾಡಿದೆ.
70 ವರ್ಷ ದಾಟಿದವರು ಬರ್ತಡೇ ಮಾಡಿಕೊಳ್ಳಬಾರದು ಎಂದು ಷರತ್ತು ಹಾಕಿರುವ ಸರಕಾರ, ಇಂಥವರು 10 ವರ್ಷಗಳಲ್ಲಿ ಒಮ್ಮೆ ತಮ್ಮ ಹುಟ್ಟುಹಬ್ಬಗಳಲ್ಲಿ ಹೂವಿನ ಗುಚ್ಛ ತೆಗೆದುಕೊಳ್ಳಬಹುದು ಎಂಬ ವಿನಾಯಿತಿ ನೀಡಿದೆ.
ಸ್ಥಳೀಯ ಸಂಸ್ಥೆಯ ಈ ವಿಚಿತ್ರ ಕಾನೂನನ್ನು ಜನ ವಿರೋಧಿಸಿದ್ದಾರೆ. ಹಿರಿಯರ ದೀರ್ಘಾಯಸ್ಸನ್ನು ಸಂಭ್ರಮಿಸುವುದಕ್ಕೆ ಅಡ್ಡಗಾಲು ಹಾಕಿರುವುದನ್ನು ಟೀಕಿಸಿದ್ದಾರೆ. ಜನರ ಟೀಕೆಗೆ ಕಿವಿಗೊಟ್ಟಿರುವ ಸ್ಥಳೀಯ ಸರಕಾರ ತನ್ನ ಆದೇಶವನ್ನು ಪರಿಶೀಲಿಸುವುದಾಗಿ ಭರವಸೆ ಕೊಟ್ಟಿದೆಯಂತೆ. ಆದರೆ, ಪರಿಶೀಲನೆ ನಂತರ ಹೊಸ ನಿಯಮ ಹೇಗಿರುತ್ತೆ ಎನ್ನುವುದ ಮಾತ್ರ ಹೇಳಿಲ್ಲ.
