ಬರ್ಲಿನ್: ಸುಂದರ ತರುಣಿಯರನ್ನು ಬೀದಿ ಪುಂಡರು ಫಾಲೋ ಮಾಡುವ ಮಾದರಿಯಲ್ಲೇ ಯುವತಿಯೊಬ್ಬಳನ್ನು ಹಿಂಬಾಲಿಸಿದ ತುಂಟ ಅಳಿಲನ್ನು ಜರ್ಮನ್ ಪೊಲೀಸರು ಬಂಧಿಸಿದ್ದಾರೆ.
ಈ ವಿಲಕ್ಷಣ ಘಟನೆ ನಡೆದಿದ್ದು ಪಶ್ಚಿಮ ಜರ್ಮನ್ ನಗರದಲ್ಲಿ. ಅಲ್ಲಿನ ನಾರ್ತ್ ರೈನ್-ವೆಸ್ಟ್ ಫಾಲಯಾದ ಬಟ್ರಾಪ್ ಎಂಬ ಪ್ರದೇಶದ ಬೀದಿಯಲ್ಲಿ ಬುಧವಾರ ನಡೆದು ಹೋಗುತ್ತಿದ್ದ ಮಹಿಳೆಯನ್ನು ಪುಂಡ ಅಳಿಲು ಹೋದಲ್ಲೆಲ್ಲ ಹಿಂಬಾಲಿಸಲಾರಂಭಿಸಿತ್ತಂತೆ. ಆಗಾಗ ನಿಂತು ಹಿಂತಿರುಗಿ ಓರೆ ಕಣ್ಣಿಂದ ನೋಡಿದರೆ ಅಳಿಲು ಮಾತ್ರ ಜಪ್ಪಯ್ಯ ಎನ್ನದೆ ಫಾಲೋ ಮಾಡುತ್ತಿತ್ತಂತೆ. ನಿಂತರೆ ಅದು ಕೂಡ ಹಾಗೇ ನಿಂತು ನೋಡುತ್ತಿತ್ತಂತೆ.
ಆಕೆಗೆ ಅದರ ಚಲನ ವಲನ ಕಂಡಾಗ ಅದು ಪುಂಡ ಅಳಿಲು ಎಂದು ಖಚಿತವಾಯಿತಂತೆ. ಅದಕ್ಕಾಗಿ ಆಕೆ ಪೊಲೀಸರಿಗೆ ತುರ್ತು ಕರೆ ಮಾಡಿ ಅಳಿಲಿನ ವಿರುದ್ಧ ದೂರು ನೀಡಿದ್ದಾಳೆ. ಕೂಡಲೇ ಅಲ್ಲಿಗೆ ಧಾವಿಸಿದ ಪೊಲೀಸರು ಆಕೆಯ ನೆರವಿಗೆ ನಿಂತು ಅಳಿಲನ್ನು ಬಂಧಿಸಿ ಕಂಬಿ ಎಣಿಸುವಂತೆ ಮಾಡಿದ್ಧಾರೆ.
ಬಂಧಿಸಿದ ಅಳಿಲಿನ ಬಗ್ಗೆ ಪೊಲೀಸ್ ವೆಬ್ ಸೈಟ್ನಲ್ಲೂ ಮಾಹಿತಿ ನೀಡಿರುವ ಪೊಲೀಸರು, ಆ ಪ್ರಾಣಿಗೆ ಬಳಲಿಕೆಯ ಸಮಸ್ಯೆ ಇದೆ ಎಂದು ಅಂದಾಜಿಸಿದ್ದಾರಂತೆ. ಪುಂಡ ಅಳಿಲನ್ನು ‘ಬಂಧಿಸಿ’ ವಶಕ್ಕೆ ತೆಗೆದುಕೊಂಡಿರುವುದಾಗಿ ಪೊಲೀಸರು ಪತ್ರಿಕಾ ಪ್ರಕಟಣೆಯಲ್ಲೂ ತಿಳಿಸಿದ್ದಾರೆ.
ನಾರ್ತ್ ರೈನ್-ವೆಸ್ಟ್ ಫಾಲಯಾದ ಪೊಲೀಸ್ ಠಾಣೆಯಲ್ಲಿ ಅಧಿಕಾರಿಯೊಬ್ಬ ಅಳಿಲಿಗೆ ಜೇನು ತಿನ್ನಿಸುವ ವೀಡಿಯೊ ತುಣಕನ್ನು ಫೇಸ್ಬುಕ್ ಪುಟದಲ್ಲಿ ಪ್ರಕಟಿಸಿದ್ದು, ಅದಕ್ಕೆ ವ್ಯಾಪಕ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಈಗಾಗಲೇ 12,000 ಬಾರಿ ಈ ವಿಡಿಯೋ ನೋಡಲಾಗಿದೆ.
ಅಳಿಲು ಚೇತರಿಸಿಕೊಂಡ ಮೇಲೆ ಅದನ್ನು ರಕ್ಷಣಾ ಕೇಂದ್ರಕ್ಕೆ ಕಳುಹಿಸುವುದಾಗಿ ಪೊಲೀಸರು ತಿಳಿಸಿದ್ದಾರೆ.
