ವಿಶ್ವದ ಅತ್ಯಂತ ಕುರೂಪಿ ಹಾಗೂ ಅವಲಕ್ಷಣ ಹೊಂದಿರುವ ನಾಯಿ ಎಂಬ ಹೆಗ್ಗಳಿಕೆಗೆ ಈ ನಾಯಿ ಪಾತ್ರವಾಗಿದೆಯಲ್ಲದೇ ಇಂತಹ ಅವಲಕ್ಷಣ ಹೊಂದಿದ ಪ್ರಾಣಿಗಳ ಸ್ಪರ್ಧೆಯಲ್ಲಿ ಪ್ರಥಮ ಬಹುಮಾನವನ್ನೂ ಗಿಟ್ಟಿಸಿಕೊಂಡಿದೆ.
ಫ್ಲೋರಿಡಾದ ವ್ಯಕ್ತಿಯೊಬ್ಬರು ಈ ನಾಯಿಯನ್ನು ಸಾಕಿಕೊಂಡಿದ್ದು, ಹುಟ್ಟುವಾಗಲೇ ನ್ಯೂನ್ಯತೆಗಳಿಂದ ಕೂಡಿರುವ ಈ ನಾಯಿ ನೋಡಲು ಕತ್ತೆ ಕಿರುಬದಂತೆ ಕಾಣುತ್ತದೆ. ರೂಪವೊಂದನ್ನು ಬಿಟ್ಟರೆ ಮಿಕ್ಕಂತೆ ಇತರೆ ನಾಯಿಗಳು ಮಾಡುವ ಬುದ್ದಿವಂತಿಕೆ ಕಾರ್ಯಗಳನ್ನೂ ಈ ನಾಯಿ ಮಾಡುತ್ತದೆ.
10 ವರ್ಷದ ಕ್ವಾಸಿ ಮೊಡೋ ಎಂಬ ಈ ನಾಯಿ ಸ್ಪರ್ಧೆಯಲ್ಲಿ ಗೆಲ್ಲುತ್ತಿದ್ದಂತೆಯೇ ರಾಜ ಗಾಂಭಿರ್ಯದಲ್ಲಿ ವೇದಿಕೆ ಮೇಲೆ ಹೆಜ್ಜೆ ಹಾಕಿದ್ದು, ಸ್ಪರ್ಧೆ ವೀಕ್ಷಿಸಲು ಬಂದ ಹಲವರು ಮುಗಿ ಬಿದ್ದು ಇದರ ಫೋಟೋ ಕ್ಲಿಕ್ಕಿಸಿಕೊಂಡಿದ್ದಾರೆ. ಇಂತಹ ನಾಯಿ ಸಾಕಿಕೊಂಡಿದ್ದಕ್ಕೆ ಇದುವರೆಗೂ ಎಲ್ಲರಿಂದಲೂ ಮೂದಲಿಕೆಗೆ ಗುರಿಯಾಗಿದ್ದ ಇದರ ಮಾಲೀಕರು ಈಗ ಹೆಮ್ಮೆಯಿಂದ ಬೀಗುತ್ತಿದ್ದಾರಂತೆ.