ಮನಿಲಾ: ಪುರುಷರು ಮೊದಲು ತಮ್ಮ ಅಹಂ ಬಿಡಬೇಕು. ಹೆಣ್ಣುಮಕ್ಕಳು ಹೇಳುವ ಮಾತುಗಳನ್ನು ಕೇಳಬೇಕು. ಪ್ರತಿಯೊಂದು ವಿಚಾರದಲ್ಲೂ ಮಹಿಳೆಯರ ಆಲೋಚನೆ ವಾಸ್ತವ ನೆಲಗಟ್ಟಿನಲ್ಲಿ ಇರುತ್ತದೆ. ಇದರಿಂದ ಎಷ್ಟೋ ಸಮಸ್ಯೆಗಳಿಗೆ ಸ್ತ್ರೀಯರಿಂದ ಪರಿಹಾರಗಳು ದೊರೆಯುತ್ತವೆ. ಹೀಗಾಗಿ ಗಂಡಸರು ಒಣಜಂಭ ತೋರದೆ ಹೆಣ್ಣುಮಕ್ಕಳ ಮಾತುಗಳಿಗೆ ಕಿವಿಗೊಡಬೇಕು ಎಂದು ಪೋಪ್ ಫ್ರಾನ್ಸಿಸ್ ಹೇಳಿದ್ದಾರೆ.
ಫಿಲಿಪ್ಪೀನ್ಸ್ ರಾಜಧಾನಿ ಮನಿಲಾದ ಕೋ-ಎಜುಕೇಷನ್ ಯುನಿವರ್ಸಿಟಿಯಲ್ಲಿ ನಡೆದ ಯುವ ರ‌್ಯಾಲಿಯನ್ನು ಉದ್ದೇಶಿಸಿ ಅವರು ಮಾತನಾಡಿದರು.
”ಈ ವೇದಿಕೆಯಲ್ಲಿರುವ ಐವರಲ್ಲಿ ನಾಲ್ವರು ಪುರುಷರಾಗಿದ್ದು, ಮಹಿಳಾ ಪ್ರಾತಿನಿಧ್ಯ ಅತಿ ಕಡಿಮೆ ಇದೆ. ಇಂದಿನ ಸಮಾಜದಲ್ಲಿ ಗಂಡಸರಿಗೆ ಮಹಿಳೆಯರ ಮಾರ್ಗದರ್ಶನ ಅಗತ್ಯವಿದೆ. ಹೆಣ್ಣುಮಕ್ಕಳ ಒಳತೋಟಿಗೆ ಕಿವಿಯಾದರೆ ಉದ್ಧಾರವಾಗುತ್ತೇವೆ. ಆದರೆ, ಪುರುಷರಾದ ನಾವು ನಿರಂಕುಶ ಮನಸ್ಥಿತಿ ಹೊಂದಿದ್ದೇವೆ. ಹೆಣ್ಣಿನ ಮಾತೇಕೆ ಕೇಳುವುದು ಎಂಬ ಅಹಂ ನಮ್ಮದು,” ಎಂದು ಪೋಪ್ ಅಸಮಾಧಾನ ವ್ಯಕ್ತಪಡಿಸಿದರು.
ರೋಮನ್ ಕ್ಯಾಥೊಲಿಕ್ ಚರ್ಚ್ ಮಹಿಳಾ ಪುರೋಹಿತರ ನೇಮಕವನ್ನು ನಿರ್ಬಂಧಿಸಿದೆ. ಆದರೂ ವ್ಯಾಟಿಕನ್‌ನಲ್ಲಿ ಹೆಚ್ಚು ನನ್‌ಗಳು ಮತ್ತು ಉನ್ನತ ಸ್ಥಾನಗಳಲ್ಲಿ ಮಹಿಳೆಯರ ನೇಮಕವನ್ನು ಬಯಸುವುದಾಗಿ ಪೋಪ್ ಹೇಳಿದರು.
ಹೆಣ್ಣು ಮಕ್ಕಳನ್ನು ರಕ್ಷಿಸುವಂತೆ ಮನವಿ ಮಾಡಿದ ಪೋಪ್, ”ಪ್ರತಿ ಮಗುವೂ ಕೊಡುಗೆ ಎಂದು ಭಾವಿಸಿ ಪ್ರೀತಿಯಿಂದ ರಕ್ಷಿಸಬೇಕು. ಅದೇ ರೀತಿ ನಮ್ಮ ಯುವ ಜನತೆಯ ಕುರಿತೂ ಕಾಳಜಿ ವಹಿಸಬೇಕು. ಅವರು ಭರವಸೆ ಕಳೆದುಕೊಳ್ಳಲು ಮತ್ತು ಬೀದಿ ಬದಿಯ ಜೀವನವನ್ನು ಅವಲಂಬಿಸಲು ಅವಕಾಶ ನೀಡಬಾರದು,” ಎಂದರು.
ತಾವು ಕಂಡು ಮಾತನಾಡಿಸಿದ ಇಬ್ಬರು ಬೀದಿ ಬದಿಯ ಮಕ್ಕಳ ಜೀವನ, ಬಡತನದ ಕುರಿತು ಹೇಳುವಾಗ ಕಣ್ಣೀರಾದರು.
ಪೋಪ್ ಅವರ ಭಾಷಣವನ್ನು ಎರಡು ಲಕ್ಷ ಜನ ಆಲಿಸಿದರು. 2013ರ ಚಂಡಮಾರುತಕ್ಕೆ ಬಲಿಯಾದವರಿಗೆ ಶ್ರದ್ಧಾಂಜಲಿ ಸಲ್ಲಿಸಲು ಪೋಪ್ ಅವರು ತಕೊಬಾನ್‌ಗೆ ಭೇಟಿ ನೀಡಿದ್ದರು.
—
ಅಸಾಧಾರಣ ಸ್ತ್ರೀ
”ಪುರುಷರು ಮಹಿಳೆಯರನ್ನು ನಮ್ಮ ಬಳಿ ಬಿಟ್ಟು ಕೊಳ್ಳುತ್ತಿಲ್ಲ. ಆದರೂ ಅವರು ನಮ್ಮ ಬಗ್ಗೆ ನಾನಾ ದೃಷ್ಟಿಕೋನಗಳಿಂದ ವಿಶ್ಲೇಷಿಸಿ ತಿಳಿದುಕೊಳ್ಳುವ ಸಾಮರ್ಥ್ಯ ಹೊಂದಿದ್ದಾರೆ. ನಾವು ಹೇಳದೆಯೂ ಅವರಿಗೆ ಎಲ್ಲ ತಿಳಿದಿರುತ್ತದೆ. ಮಹಿಳೆಯರು ಪ್ರಶ್ನೆಗಳನ್ನು ಮುಂದಿಡಲು ಸಮರ್ಥರಾಗಿರುವಂತೆ ಪರಿಹಾರ ಕೂಡ ಕಂಡುಕೊಳ್ಳಬಲ್ಲರು. ಆದರೆ ಪುರುಷರಾದ ನಾವು ಇವನ್ನೆಲ್ಲ ಅರ್ಥೈಸಿಕೊಳ್ಳಲು ಅಸಮರ್ಥರು,”ಎಂದು ಮಹಿಳೆಯರ ಸಾಮರ್ಥ್ಯದ ಕುರಿತು ಪೋಪ್ ಮೆಚ್ಚುಗೆ ವ್ಯಕ್ತಪಡಿಸಿದರು. 12 ವರ್ಷದ ಬಾಲಕಿಯೊಬ್ಬಳು, ”ದೇವರು ಮಕ್ಕಳನ್ನು ಏಕೆ ಅನಾಥರನ್ನಾಗಿಸುತ್ತಾನೆ,” ಎಂದು ಪ್ರಶ್ನಿಸಿದ್ದನ್ನು ಉಲ್ಲೇಖಿಸಿ ಈ ಮಾತು ಹೇಳಿದರು.
