ಅಂತರಾಷ್ಟ್ರೀಯ

ತೀವ್ರ ಬಡತನ; ಕ್ರಿಸ್ಮಸ್ ಹಬ್ಬಕ್ಕಾಗಿ ಎದೆಹಾಲು ಮಾರಿದ ಮಹಾತಾಯಿ

Pinterest LinkedIn Tumblr

rt

ಲಂಡನ್: ತೀವ್ರ ಬಡತನದಿಂದ ಹಬ್ಬ ಹರಿದಿನಗಳಂದೂ ಉಪವಾಸ-ವನವಾಸ ಅನುಭವಿಸುವುದು ಬಡರಾಷ್ಟ್ರಗಳಿಗೆ ಸೀಮಿತವಲ್ಲ. ಅಭಿವೃದ್ಧಿ ಹೊಂದಿದ ದೇಶವೆಂದು ಖ್ಯಾತಿವೆತ್ತಿರುವ ಬ್ರಿಟನ್‌ನಲ್ಲೂ ಇಂತಹ ಮನಕಲಕುವ ಘಟನೆ ವರದಿಯಾಗಿದೆ.

ತೀವ್ರ ಹಣಕಾಸಿನ ಮುಗ್ಗಟ್ಟಿನಿಂದ ಬಳಲುತ್ತಿರುವ ತಾಯಿಯೊಬ್ಬಳು, ಕ್ರಿಸ್ಮಸ್ ಹಬ್ಬದ ಆಚರಣೆಗೆ ದುಡ್ಡು ಸಂಪಾದಿಸಲು ತನ್ನ ಎದೆ ಹಾಲನ್ನೇ ಮಾರಿದ್ದಾಳೆ. ರೆಬೆಕ್ಕಾ ಹಡ್ಸನ್ ಎಂಬ 26 ವರ್ಷದ ಮಹಿಳೆಗೆ ನಾಲ್ಕು ಮಕ್ಕಳು. ಮ್ಯಾಂಚೆಸ್ಟರ್ ನಿವಾಸಿಯಾದ ಈಕೆಗೆ ಹಣಕಾಸಿನ ತೀವ್ರ ಅಡಚಣೆ ಕಾಡುತ್ತಿತ್ತು. ಹೇಳಿಕೇಳಿ ಇದು ಡಿಸೆಂಬರ್ ತಿಂಗಳು. ಕ್ರಿಸ್ಮಸ್ ಹಬ್ಬ ಮುಂದಿದೆ. ಆದರೆ, ಮಕ್ಕಳಿಗೆ ಚೂರು ಸಿಹಿ ಮಾಡೋಣವೆಂದರೆ ಕೈಯಲ್ಲಿ ಕಾಸಿಲ್ಲ. ಹೀಗೆ ದಿಕ್ಕು ತೋಚದೆ ಕುಳಿತಿದ್ದಾಗ ಆಕೆಯ ಮನಸ್ಸಿನೊಳಗೆ ಬಂದ ಅಲೋಚನೆಯೇ ಎದೆಹಾಲು ಮಾರಿ ಕಾಸು ಸಂಪಾದಿಸುವುದು.

ತನ್ನ ಒಂದು ವರ್ಷ ಮಗು ಕುಡಿದು ತೃಪ್ತಿಗೊಂಡ ಬಳಿಕವೂ ಎದೆ ಹಾಲು ಸಾಕಷ್ಟು ಮಿಕ್ಕುತ್ತಿರುವುದು ಈಕೆಯ ಗಮನಕ್ಕೆ ಬಂದಿತ್ತು. ಅದನ್ನೇಕೆ ಮಾರಿ ಹಣ ಸಂಪಾದಿಸಬಾರದು ಎಂದು ಯೋಚಿಸಿದ ರೆಬೆಕ್ಕಾ, ತಡ ಮಾಡದೇ ಎಂಟು ಗ್ರಾಹಕರನ್ನು ಹುಡುಕಿದಳು. ಪ್ರತಿ ಬಾಟಲ್ ಹಾಲಿಗೆ 12.50 ಪೌಂಡ್ ದರ ವಿಧಿಸಿ, ಇದುವರೆಗೂ 3,700 ಪೌಂಡ್ ಹಣ ಸಂಪಾದಿಸಿದ್ದಾಳೆ. ಹಬ್ಬ ಹೇಗೆ ಆಚರಿಸುವುದು ಎಂಬ ತಲೆನೋವು ಸದ್ಯಕ್ಕೆ ಬಗೆಹರಿದಿದೆ. ರೆಬೆಕ್ಕಾ ಅವರ ಮನಕಲಕುವ ಕತೆ ಮಾಧ್ಯಮಗಳಿಗೆ ಹೇಗೋ ತಿಳಿದು ಅದೀಗ ದೊಡ್ಡ ಸುದ್ದಿಯಾಗಿದೆ.

ಅನೇಕ ಸುದ್ದಿವಾಹಿನಿಗಳು ರೆಬೆಕ್ಕಾರನ್ನು ಕೂರಿಸಿಕೊಂಡು ಆಕೆ ನೀಡಿದ ಎಲೆಹಾಲು ಹೇಗೆಲ್ಲಾ ಬಳಕೆಯಾಗುತ್ತಿದೆ ಎಂಬ ಕುರಿತು ಪ್ಯಾನೆಲ್ ಚರ್ಚೆಯನ್ನೂ ನಡೆಸಿವೆ. ಕೆಲವರು ಹೇಳುವ ಪ್ರಕಾರ, ರೆಬೆಕ್ಕಾಳಿಂದ ಖರೀದಿಸಿದ ಹಾಲನ್ನು ಕೆಲವರು ಲೈಂಗಿಕ ಉದ್ದೇಶಕ್ಕೆ ಬಳಸಿಕೊಂಡಿದ್ದಾರಂತೆ. ಇದು ನೈತಿಕತೆಗೆ ವಿರುದ್ಧವಂತೆ. ಆದರೆ, ರೆಬೆಕ್ಕಾ ಇಂತಹ ಸುದ್ದಿಗಳಿಂದ ವಿಚಲಿತರಾಗಿಲ್ಲ.

”ನನ್ನ ಹಣಕಾಸಿನ ಅಗತ್ಯಕ್ಕಾಗಿ ಎದೆಹಾಲನ್ನು ಮಾರಿದ್ದೇನೆ. ಅದನ್ನು ಹೇಗೆ ಬಳಸಿಕೊಳ್ಳಬೇಕು ಎಂಬುದು ಖರೀದಿಸಿದವರಿಗೆ ಬಿಟ್ಟ ವಿಷಯ. ಅದಕ್ಕೂ ನನಗೂ ಸಂಬಂಧವಿಲ್ಲ,” ಎಂದು ಆಕೆ ದಿಟ್ಟವಾಗಿ ಉತ್ತರಿಸಿದ್ದಾರೆ.

ಇದು ಮೊದಲಲ್ಲ
ಎದೆ ಹಾಲು ಮಾರಾಟ ಬ್ರಿಟನ್‌ನಲ್ಲಿ ಇದು ಮೊದಲ ಪ್ರಕರಣವೇನಲ್ಲ. ಅಲಿಸಿಯಾ ಮಾಗೋವರ್ ಎಂಬ ಮೂರು ಮಕ್ಕಳ ತಾಯಿ, ‘ಮಮ್ಮಿ ಮಿಲ್ಕ್ ಕ್ರಿಯೇಷನ್’ ಎಂದು ಸಂಸ್ಥೆಯನ್ನೇ ಸ್ಥಾಪಿಸಿ ಎದೆ ಹಾಲು ಮಾರುತ್ತಿದ್ದಾರೆ. ಇದರ ಉದ್ದೇಶ ಚಿನ್ನಾಭರಣ ಮಾಡಿಸಿಕೊಳ್ಳಲು ಹಣ ಸಂಪಾದಿಸುವುದಂತೆ.

Write A Comment