ಹೊಸದಿಲ್ಲಿ: ಏಕಾಏಕಿ ವಾಸನೆ ಗುರುತಿಸಲು ಸಾಧ್ಯವಾಗದೇ ಇರುವುದು ಮತ್ತು ನಾಲಿಗೆ ರುಚಿ ಕಳೆದುಕೊಳ್ಳುವುದನ್ನೂ ಕೊರೊನಾ ಲಕ್ಷಣಗಳಲ್ಲಿ ಒಂದು ಎಂದು ಕೇಂದ್ರ ಸರಕಾರ ಹೇಳಿದೆ. ಇವುಗಳನ್ನು ಕೋವಿಡ್‌ನ ಹೊಸ ಲಕ್ಷಣಗಳ ಪಟ್ಟಿಯಲ್ಲಿ ಸೇರಿಸಲಾಗಿದೆ.
‘ಕ್ಲಿನಿಕಲ್‌ ಮ್ಯಾನೇಜ್‌ಮೆಂಟ್‌ ಪ್ರೋಟೋಕಾಲ್‌: ಕೋವಿಡ್‌-19’ನಲ್ಲಿ ಈಗಿರುವ ಕೊರೊನಾದ ಒಂಬತ್ತು ಲಕ್ಷಣಗಳ ಜೊತೆ ಇದನ್ನೂ ಸೇರಿಸಲಾಗಿದೆ. ಜ್ವರ, ಕೆಮ್ಮು, ಆಯಾಸ, ಉಸಿರಾಟದ ತೊಂದರೆ, ಉಗುಳುವುದು, ಸ್ನಾಯುಗಳಲ್ಲಿ ನೋವು, ಶೀತ, ಗಂಟಲು ನೋವು ಮತ್ತು ಅತಿಸಾರದ ಜೊತೆಗೆ ಇದೀಗ ವಾಸನೆ ಮತ್ತು ರುಚಿ ಕಳೆದುಕೊಳ್ಳುವುದನ್ನೂ ಸೇರಿಸಲಾಗಿದೆ.
ಈ ಹಿಂದೆಯೇ ಇದನ್ನು ಕೊರೊನಾ ವೈರಸ್‌ ಲಕ್ಷಣಗಳ ಪಟ್ಟಿಯಲ್ಲಿ ಸೇರಿಸುವಂತೆ ಹಲವು ತಜ್ಞರು ಕೇಂದ್ರ ಆರೋಗ್ಯ ಇಲಾಖೆಯನ್ನು ಆಗ್ರಹಿಸಿದ್ದರು. ಹೆಚ್ಚಿನ ಸೋಂಕಿತರು ತಮಗೆ ರುಚಿ ಮತ್ತು ವಾಸನೆ ತಿಳಿಯುತ್ತಿಲ್ಲ ಎಂದಿದ್ದರಿಂದ ತಜ್ಞರು ಈ ಆಗ್ರಹ ಮುಂದಿಟ್ಟಿದ್ದರು. ಆದರೆ ಇದು ಸಾಮಾನ್ಯ ಜ್ವರದಿಂದ ಹಿಡಿದು ಹಲವು ರೋಗಗಳ ಲಕ್ಷಣವೂ ಆಗಿರುವುದರಿಂದ ಆರಂಭದಲ್ಲಿ ಕೊರೊನಾ ಲಕ್ಷಣಗಳ ಪಟ್ಟಿಗೆ ಸೇರಿಸಿರಲಿಲ್ಲ.
ಆದರೆ ಈ ಹಿಂದೆಯೇ ಅಮೆರಿಕಾದ ಡಿಸೀಸ್‌ ಕಂಟ್ರೋಲ್‌ ಆಂಡ್‌ ಪ್ರಿವೆನ್ಶನ್‌ (ಸಿಡಿಸಿ) ಸಂಸ್ಥೆ ವಾಸನೆ ಮತ್ತು ರುಚಿ ಕಳೆದುಕೊಳ್ಳುವುದನ್ನೂ ಕೊರೊನಾ ವೈರಸ್‌ ಲಕ್ಷಣಗಳಲ್ಲಿ ಸೇರಿಸಿತ್ತು. ಇದೀಗ ಭಾರತವೂ ಅದೇ ದಾರಿಯಲ್ಲಿ ಹೆಜ್ಜೆ ಹಾಕಿದೆ.
Comments are closed.