ಲಾಕ್ಡೌನ್ನಿಂದಾಗಿ ಇಡೀ ದೇಶವೇ ಸ್ಥಗಿತಗೊಂಡಿದೆ. ಎಲ್ಲ ಶಾಲಾ-ಕಾಲೇಜು, ಕಂಪನಿಗಳು, ಕಚೇರಿಗಳು ಮುಚ್ಚಲ್ಪಟ್ಟಿವೆ. ಆದರೆ, ಪಂಜಾಬ್ನ ಹುಡುಗನೊಬ್ಬನನ್ನು ಮಾತ್ರ ಆತನ ಅಪ್ಪ-ಅಮ್ಮ ಟ್ಯೂಷನ್ಗೆ ಕಳುಹಿಸುತ್ತಿದ್ದರು. ಬೇರೆ ಹುಡುಗರೆಲ್ಲ ಲಾಕ್ಡೌನ್ ನೆಪದಲ್ಲಿ ಮನೆಯಲ್ಲೇ ಆಟವಾಡಿಕೊಂಡು ಆರಾಮಾಗಿದ್ದುದನ್ನು ನೋಡಿ ತನ್ನ ಪರಿಸ್ಥಿತಿಯ ಬಗ್ಗೆ ಬೇಸರಿಸಿಕೊಂಡ ಬಾಲಕ ತನ್ನನ್ನು ಟ್ಯೂಷನ್ನಿಂದ ಬಚಾವ್ ಮಾಡುವಂತೆ ಪೊಲೀಸರ ಮೊರೆಹೋಗಿದ್ದಾನೆ!
ಚಿಕ್ಕ ಬಾಲಕನೋರ್ವ ಪೊಲೀಸರ ಬಳಿ ತನ್ನ ಸಂಕಷ್ಟ ಹೇಳಿಕೊಂಡಿದ್ದಾನೆ. ನನ್ನ ಅಪ್ಪ-ಅಮ್ಮ ಬಲವಂತವಾಗಿ ಟ್ಯೂಷನ್ಗೆ ಕಳುಹಿಸುತ್ತಿದ್ದಾರೆ. ಎಲ್ಲ ಕಡೆ ಲಾಕ್ಡೌನ್ ಇದ್ದರೂ ನನ್ನ ಮನೆಯವರು ಅದನ್ನು ಪಾಲಿಸದೆ ನನ್ನನ್ನು ಹೊರಗೆ ಕಳುಹಿಸುತ್ತಿದ್ದಾರೆ ಎಂದು ಪೊಲೀಸರ ಬಳಿ ಹೇಳಿಕೊಂಡಿದ್ದಾನೆ. ಅಷ್ಟೇ ಅಲ್ಲ, ಲಾಕ್ಡೌನ್ ಇದ್ದಾಗ ಟ್ಯೂಷನ್ ತೆಗೆದುಕೊಳ್ಳುವುದು ತಪ್ಪು ಎಂದು ಟೀಚರ್ಗೆ ಬುದ್ಧಿ ಹೇಳಿ ಎಂದು ಪೊಲೀಸರನ್ನು ತನ್ನ ಟ್ಯೂಷನ್ ಕ್ಲಾಸ್ ನಡೆಯುವ ಟೀಚರ್ ಮನೆಯ ಬಳಿ ಕರೆದುಕೊಂಡು ಹೋಗಿದ್ದಾನೆ. ಈ ವಿಡಿಯೋ ಈಗ ಟ್ವಿಟ್ಟರ್ನಲ್ಲಿ ವೈರಲ್ ಆಗಿದೆ.
ಮನೆಯ ಬಾಗಿಲಿನೆದುರು ನಿಂತಿದ್ದ ಪೊಲೀಸರನ್ನು ಕಂಡು ಟೀಚರ್ ದಂಗಾಗಿದ್ದಾರೆ. ಲಾಕ್ಡೌನ್ ಇದ್ದರೂ ನೀವು ಹೇಗೆ ಕ್ಲಾಸ್ ತೆಗೆದುಕೊಳ್ಳುತ್ತಿದ್ದೀರಿ? ನಿಮಗೆ ಬೇರೆ ಕಾನೂನು ಏನಾದರೂ ಇದೆಯೇ? ನಿಮಗೆ ಟ್ಯೂಷನ್ ಮಾಡಲು ಅನುಮತಿ ಕೊಟ್ಟವರು ಯಾರು? ಎಂದು ಪೊಲೀಸರು ಟೀಚರ್ಗೆ ಪ್ರಶ್ನೆಯ ಸುರಿಮಳೆಗರೆದಿದ್ದಾರೆ.
ನಾನು ಮಾತ್ರ ಅಲ್ಲ, ಇನ್ನೂ ಮೂರು ಹುಡುಗರಿಗೆ ಈ ಟೀಚರ್ ಕ್ಲಾಸ್ ಮಾಡುತ್ತಿದ್ದಾರೆ ಎಂದು ಆ ಬಾಲಕ ಮತ್ತೆ ಪೊಲೀಸರಿಗೆ ದೂರು ಹೇಳಿದ್ದಾನೆ. ಅದನ್ನು ಕೇಳಿದ ಪೊಲೀಸರು ಟೀಚರ್ಗೆ ತರಾಟೆ ತೆಗೆದುಕೊಂಡಿದ್ದಾರೆ. ಟ್ಯೂಷನ್ನಿಂದ ಬಚಾವಾಗಲು ಬಾಲಕ ಮಾಡಿದ ಕೆಲಸ ನೋಡಿ ಟ್ವಿಟ್ಟಿಗರು ಆಶ್ಚರ್ಯ ವ್ಯಕ್ತಪಡಿಸಿದ್ದಾರೆ.
Comments are closed.