ಈ ಮೇಕೆ ಮರಿಯ ಮುಖ ಮನುಷ್ಯನ ಮುಖವನ್ನೇ ಹೋಲುತ್ತದೆ!

ಈ ಮೇಕೆ ಮರಿಯನ್ನು ನೋಡಿದಾಗ ವಿಚಿತ್ರವೆನಿಸುತ್ತದೆ. ಕಾರಣ ಇದರ ಮುಖ. ಈ ಮೇಕೆ ಮರಿಯ ಮುಖ ಪಕ್ಕಾ ಮನುಷ್ಯನ ಮುಖವನ್ನೇ ಹೋಲುತ್ತಿದೆ…! ಇದೇ ಕಾರಣಕ್ಕೆ ಈ ಮರಿ ಈಗ ಎಲ್ಲರ ಗಮನ ಸೆಳೆದಿದೆ.

ಇತ್ತ, ಈ ವಿಚಿತ್ರ ಮರಿ ಹುಟ್ಟುತ್ತಿದ್ದಂತೆಯೇ ಅಚ್ಚರಿಗೊಂಡಿರುವ ಜನ ಇದನ್ನು ಪವಾಡ ಎಂದೇ ನಂಬಿದ್ದಾರೆ. ಇದು ದೇವರ ಅವತಾರ ಎಂದು ಭಾವಿಸಿರುವ ಇಲ್ಲಿನ ಜನ ಈ ಮರಿಗೆ ಪೂಜೆ ಮಾಡುತ್ತಿದ್ದಾರೆ… ರಾಜಸ್ಥಾನದ ನಿಮೋಡಿಯಾ ಎಂಬ ಗ್ರಾಮ ಈ ವಿಚಿತ್ರ ಮೇಕೆ ಮರಿಯ ಕಾರಣಕ್ಕೆ ಸದ್ಯ ಎಲ್ಲರನ್ನೂ ಆಕರ್ಷಿಸುತ್ತಿದೆ.

ಮುಕೇಶ್‌ಜೀ ಎಂಬವರ ಮನೆಯಲ್ಲಿ ಹುಟ್ಟಿರುವ ಈ ಮೇಕೆ ಮರಿಯ ಮುಖವನ್ನು ನೋಡಿದಾಗ ತಕ್ಷಣಕ್ಕೆ ಮನುಷ್ಯರ ಮುಖದಂತೆ ಕಾಣುತ್ತದೆ. ಹೀಗಾಗಿ, ಈ ವಿಚಿತ್ರ ಮರಿಯನ್ನು ನೋಡಲು ಜನ ದಿನಾಲೂ ಇವರ ಮನೆಗೆ ಬರುತ್ತಿದ್ದಾರೆ. ಪರಿಣಾಮ, ಈ ಮರಿಯ ಕಾರಣಕ್ಕೆ ಮುಕೇಶ್ ಅವರ ಮನೆ ಇಲ್ಲಿ ಖ್ಯಾತಿ ಗಳಿಸಿದೆ.

ಇಷ್ಟಕ್ಕೂ ಈ ಮರಿ ಈ ರೀತಿ ವಿಚಿತ್ರವಾಗಿ ಜನಿಸಲು ಕಾರಣ ಅನುವಂಶೀಯ ಸಮಸ್ಯೆ. ಈ ಮರಿ `ಸೈಕ್ಲೋಪಿಯಾ’ ಎಂಬ ಸಮಸ್ಯೆಯಿಂದ ಬಳಲುತ್ತಿದೆ. ಇದು ತೀರಾ ಅಪರೂಪದ ಸಮಸ್ಯೆ ಎಂದು ತಜ್ಞರು ತಿಳಿಸಿದ್ದಾರೆ. 16,000 ಪ್ರಾಣಿಗಳಲ್ಲಿ ಒಂದು ಈ ಸೈಕ್ಲೋಪಿಯಾ ಸಮಸ್ಯೆಯಿಂದ ಜನಿಸುತ್ತದೆ ಎನ್ನಲಾಗಿದೆ. ಮನುಷ್ಯರಲ್ಲೂ ಈ ಸಮಸ್ಯೆ ಕಾಣಿಸಿಕೊಳ್ಳುತ್ತದೆಯಂತೆ. ಆದರೆ, ಸಾಮಾನ್ಯವಾಗಿ ಈ ಸಮಸ್ಯೆಯಿಂದ ಜನಿಸಿದ ಮಕ್ಕಳು ಅಥವಾ ಪ್ರಾಣಿಗಳು ಬದುಕುವುದು ತೀರಾ ಅಪರೂಪ. ಆದರೆ, ಈ ಮೇಕೆ ಮರಿ ಸದ್ಯ ಆರೋಗ್ಯವಾಗಿದ್ದು, ಸಹಜವಾಗಿಯೇ ಅತ್ತಿಂದಿತ್ತ ಓಡಾಡುತ್ತಿದೆ.