166 ವರ್ಷಗಳ ಇತಿಹಾಸದಲ್ಲೇ ಈ ವರ್ಷ ರೈಲ್ವೆ ಅಪಘಾತದಲ್ಲಿ ಒಂದೇ ಒಂದು ಸಾವಿಲ್ಲ

ಭಾರತೀಯ ರೈಲ್ವೆಯ 166 ವರ್ಷಗಳ ಸುದೀರ್ಘ ಇತಿಹಾಸದಲ್ಲಿಇದೇ ಮೊತ್ತ ಮೊದಲ ಬಾರಿಗೆ ದಾಖಲೆಯೊಂದು ನಿರ್ಮಾಣವಾಗಿದೆ. 2019-20ರ ಹಣಕಾಸು ವರ್ಷದಲ್ಲಿ ಇದುವರೆಗೆ ರೈಲುಗಳು ಮುಖಾಮುಖಿ ಡಿಕ್ಕಿಯಾದ ಒಂದು ಘಟನೆ ಕೂಡ ನಡೆದಿಲ್ಲ. ಹಳಿ ತಪ್ಪುವಿಕೆಯಂತಹ ಸಣ್ಣಪುಟ್ಟ ದುರ್ಘಟನೆಗಳು ನಡೆದಿದ್ದರೂ ವರ್ಷದಲ್ಲಿ ಒಬ್ಬ ಪ್ರಯಾಣಿಕ ಕೂಡ ಮೃತಪಟ್ಟಿಲ್ಲ.

ವಿವಿಧ ಅವಘಡಗಳಲ್ಲಿ ರೈಲ್ವೆ ಇಲಾಖೆಯ 16 ಸಿಬ್ಬಂದಿ ಮಾತ್ರ ಮೃತಪಟ್ಟಿದ್ದಾರೆ. ನಿಕಟ ಪೂರ್ವ 2016-17ರ ಸಾಲಿಗೆ ಹೋಲಿಸಿದರೆ, 2018-19ರಲ್ಲಿಒಟ್ಟಾರೆ ಅವಘಡ ಸಂಬಂಧಿ ಸಾವುಗಳ ಸಂಖ್ಯೆ ಶೇ.50ರಷ್ಟು ಕಡಿಮೆಯಾಗಿದೆ. ಈ ಹಿನ್ನೆಲೆಯಲ್ಲಿ 2019 ಅನ್ನು ರೈಲ್ವೆ ಸುರಕ್ಷತೆಯ ಸುವರ್ಣ ವರ್ಷವೆಂದೇ ಪರಿಗಣಿಸಲಾಗಿದೆ. ಮುಖಾಮುಖಿ ಡಿಕ್ಕಿ, ಬೆಂಕಿ ಅವಘಡ, ಲೆವೆಲ್‌ ಕ್ರಾಸಿಂಗ್‌ ಮತ್ತಿತರೆ ಸ್ವರೂಪದ ಅಪಘಾತಗಳನ್ನು ರೈಲ್ವೆ ಪರಿಗಣಿಸುತ್ತದೆ. ಚಲಿಸುವ ರೈಲಿಗೆ ಸಿಲುಕಿ ಸತ್ತವರ ಸಂಖ್ಯೆಯನ್ನು ಇಲಾಖೆ ತನ್ನ ಅವಘಡಗಳ ಖಾತೆಗೆ ಸೇರಿಸುವುದಿಲ್ಲ.

ಈ ಸಂಬಂಧ ಪ್ರತಿಕ್ರಿಯೆ ನೀಡಿರುವ ರೈಲ್ವೆ ಖಾತೆ ಸಚಿವ ಪಿಯೂಷ್‌ ಗೋಯಲ್‌, “ಪ್ರಯಾಣಿಕರ ಸುರಕ್ಷತೆಯೇ ಭಾರತೀಯ ರೈಲ್ವೆಯ ಮೊದಲ ಆದ್ಯತೆಯಾಗಿದೆ. ಸುರಕ್ಷತಾ ಕ್ರಮಗಳ ಬಗ್ಗೆ ನಿರಂತರವಾಗಿ ನಿಗಾ ವಹಿಸಲಾಗುತ್ತಿದೆ. ಜತೆಗೆ ರೈಲ್ವೆ ಸಿಬ್ಬಂದಿಗೆ ನಿಯಮಿಯತವಾಗಿ ತರಬೇತಿ ನೀಡಲಾಗುತ್ತಿದೆ,” ಎಂದು ತಿಳಿಸಿದ್ದಾರೆ.

ರೈಲ್ವೆ ಇಲಾಖೆಯಲ್ಲಿ ಆರ್ಥಿಕ ಬಿಕ್ಕಟ್ಟು, ಸದ್ಯದಲ್ಲೇ ಟಿಕೆಟ್‌ ದರ ಏರಿಕೆ ಸಾಧ್ಯತೆ

* 0 – ಪ್ರಯಾಣಿಕ ಸಾವು ಮತ್ತು ರೈಲುಗಳ ಮುಖಾಮುಖಿ ಡಿಕ್ಕಿ (2019ರಲ್ಲಿ)

* 50% – 2019ರಲ್ಲಿ ರೈಲ್ವೆ ಅಪಘಾತಗಳ ಪ್ರಯಾಣ ಕಳೆದ ವರ್ಷಕ್ಕೆ ಹೋಲಿಸಿದರೆ ಅರ್ಧದಷ್ಟು ಕಡಿಮೆಯಾಗಿದೆ

* 16 – 2018-19ರ ಸಾಲಿನ ಅವಘಡಗಳಲ್ಲಿ ಮೃತಪಟ್ಟ ರೈಲ್ವೆ ಇಲಾಖೆ ಸಿಬ್ಬಂದಿ

* 106 – 2018-19ರ ಸಾಲಿನಲ್ಲಿ ಗಾಯಗೊಂಡವರು

* 28 – 2017-18ರ ಸಾಲಿನ ಅವಘಡಗಳಲ್ಲಿ ಮೃತರು

* 195 – 2016-17ರ ಸಾಲಿನ ಅವಘಡಗಳಲ್ಲಿ ಮೃತರ ಸಂಖ್ಯೆ

* 2,400 – 2013 ರಿಂದ 2018 ರವರೆಗಿನ 5 ವರ್ಷಗಳ ಅವಧಿಯಲ್ಲಿ ಘಟಿಸಿದ 500 ಅಪಘಾತಗಳಲ್ಲಿ ಮಡಿದವರ ಸಂಖ್ಯೆ

ರೈಲು ಅಪಘಾತಗಳಲ್ಲಿಇಳಿಕೆ

*1960-61 : 2,131

* 1970 – 71: 840

* 1980 – 81: 1,013

* 1990 – 91: 532

* 2010 – 11: 141

*2018 – 19: 73