ನವದೆಹಲಿ: ರಾಷ್ಟ್ರ ರಾಜಧಾನಿ, ವಿಶ್ವದ ಅತಿ ಮಲಿನ ನಗರ ಎಂಬ ಅಪಖ್ಯಾತಿಗೆ ಒಳಗಾಗಿದೆ. ಏರ್ ವಿಷುವಲ್ ಡೇಟಾ ಪ್ರಕಾರ ದೆಹಲಿಯಲ್ಲಿ ಶುಕ್ರವಾರದಂದು ವಾಯು ಗುಣಮಟ್ಟ ಸೂಚ್ಯಂಕ (ಎಕ್ಯೂಐ) 527ಕ್ಕೆ ಕುಸಿದಿದೆ.
ದೆಹಲಿಯ ವಾಯು ಗುಣಮಟ್ಟ ನ.5ರಂದು ಅತ್ಯಂತ ಮಲಿನಕಾರಕವಾಗಿತ್ತು. ಸತತ 9 ದಿನ ದೆಹಲಿಯ ಗಾಳಿಯ ಗುಣಮಟ್ಟ ಉಸಿರಾಡಲು ಅಸಾಧ್ಯ ಎಂಬ ಮಟ್ಟದಲ್ಲಿ ಇದ್ದದ್ದು ದಾಖಲೆಯಾಗಿತ್ತು ಎಂದು ಏರ್ ವಿಷುವಲ್ ಹೇಳಿದೆ.
ವಿಶ್ವದ ಅತಿ ಮಲಿನ ನಗರಗಳ ಪಟ್ಟಿಯಲ್ಲಿ ಭಾರತೀಯ ಉಪಖಂಡದ 10 ನಗರಗಳು ಸ್ಥಾನ ಪಡೆದುಕೊಂಡಿವೆ. ದೆಹಲಿ, ಲಾಹೋರ್, ಕರಾಚಿ, ಕೋಲ್ಕತ, ಮುಂಬೈ ಮತ್ತು ಕಠ್ಮಂಡು ನಗರಗಳು ಈ ಪಟ್ಟಿಯಲ್ಲಿ ಅಗ್ರಸ್ಥಾನ ಪಡೆದುಕೊಂಡಿವೆ.
ದೆಹಲಿ ನಂತರದ ಸ್ಥಾನದಲ್ಲಿರುವ ಪಾಕಿಸ್ತಾನದ ಲಾಹೋರ್ನಲ್ಲಿ ವಾಯು ಗುಣಮಟ್ಟ ಸೂಚ್ಯಂಕ 234 ಇದೆ. ಅಂದರೆ ದೆಹಲಿಗೆ ಹೋಲಿಸಿದರೆ ಅಲ್ಲಿನ ಗಾಳಿಯ ಗುಣಮಟ್ಟ 2 ಪಟ್ಟು ಉತ್ತಮವಾಗಿದೆ ಎಂದೇ ಹೇಳಬಹುದಾಗಿದೆ. ಕೋಲ್ಕತದ ವಾಯು ಗುಣಮಟ್ಟ ಸೂಚ್ಯಂಕ 161 ಇದೆ. ಉಜ್ಬೇಕಿಸ್ತಾನದ ತಾಷ್ಕೆಂಟ್ನಲ್ಲಿ ವಾಯು ಗುಣಮಟ್ಟ ಸೂಚ್ಯಂಕ 185 ಇದೆ. ಜನಸಂಖ್ಯೆ ಮತ್ತು ವಾಹನಗಳ ಸಂಖ್ಯೆ ಕಡಿಮೆ ಇದ್ದ ಹೊರತಾಗಿಯೂ ಅಲ್ಲಿನ ಗಾಳಿಯ ಗುಣಮಟ್ಟ ಕಳಪೆಯಾಗಿರುವುದು ಅಚ್ಚರಿಗೆ ಕಾರಣವಾಗಿದೆ. ಕರಾಚಿ (180), ಚೀನಾದ ಚೆಂಗ್ಡು (158), ವಿಯೆಟ್ನಾಂನ ಹನೋಯಿ (158) ಚೀನಾದ ಗುವಾಂಗ್ಝೌ (157), ಭಾರತದ ಮುಂಬೈ (153), ನೇಪಾಳದ ಕಠ್ಮಂಡು (152) ನಂತರದ ಸ್ಥಾನಗಳಲ್ಲಿವೆ
Comments are closed.