ಭೇಟಿಯಾದ 4 ಗಂಟೆಗಳಲ್ಲಿ ಮದುವೆಯಾದ ಫೇಸ್‍ಬುಕ್‍ ಜೋಡಿ

ಕೋಲ್ಕತ್ತಾ: ಫೇಸ್‍ಬುಕ್‍ನಲ್ಲಿ ಸ್ನೇಹಿತರಾದ ಯುವಕ ಹಾಗೂ ಯುವತಿ ಮೊದಲ ಬಾರಿ ಭೇಟಿಯಾಗಿ ಕೆಲವೇ ಗಂಟೆಗಳಲ್ಲಿ ಮದುವೆಯಾದ ಸಂಗತಿಯೊಂದು ಪಶ್ಚಿಮ ಬಂಗಾಳದ ಕೋಲ್ಕತ್ತಾದಲ್ಲಿ ನಡೆದಿದೆ.

ಸುದೀಪ್ ಘೋಷಲ್ ಹಾಗೂ ಪ್ರತಿಮಾ ಬ್ಯಾನರ್ಜಿ ಮದುವೆಯಾದ ಜೋಡಿ. ಇಬ್ಬರು ಮೂರು ತಿಂಗಳ ಹಿಂದೆ ಫೇಸ್‍ಬುಕ್‍ನಲ್ಲಿ ಸ್ನೇಹಿತರಾಗಿದ್ದರು. ಪ್ರತಿಮಾ ಅಷ್ಟಮಿ ದಿನ ತನ್ನ ಸ್ನೇಹಿತರನ್ನು ಭೇಟಿ ಆಗಲು ಕೋಲ್ಕತ್ತಾಗೆ ಬರಲಿದ್ದಾರೆ ಎಂಬ ವಿಷಯ ಸುದೀಪ್‍ಗೆ ಫೇಸ್‍ಬುಕ್ ಮೂಲಕ ತಿಳಿಯಿತು. ಈ ವೇಳೆ ಇಬ್ಬರು ಭೇಟಿ ಆಗಲು ನಿರ್ಧರಿಸಿದ್ದರು.

ನಾನು ಹೋಗಿದ್ದ ಪೆಂಡಾಲ್‍ನಲ್ಲಿ ಪ್ರತಿಮಾ ಕೂಡ ಬಂದಿದ್ದಳು. ಪ್ರತಿಮಾ ತನ್ನ ಸ್ನೇಹಿತರ ಜೊತೆ ಅಲ್ಲಿಗೆ ಬಂದಿದ್ದಳು. ಅಲ್ಲಿ ವಾತಾವರಣ ಹೇಗಿತ್ತು ಎಂದರೆ ನನಗೆ ಪ್ರತಿಮಾಳನ್ನು ಪ್ರಪೋಸ್ ಮಾಡಬೇಕು ಎನಿಸುತ್ತಿತ್ತು ಹಾಗೂ ನಾನು ಆಕೆಗೆ ಪ್ರಪೋಸ್ ಕೂಡ ಮಾಡಿದ್ದೇನೆ. ಆಕೆ ತುಂಬಾ ಸುಂದರವಾಗಿ ಕಾಣಿಸುತ್ತಿದ್ದಳು ಎಂದು ಸುದೀಪ್ ಹೇಳಿದ್ದಾರೆ.

ಬೆಳಗ್ಗೆ ಮೊದಲ ಬಾರಿ ಭೇಟಿಯಾದ ನಂತರ ಸಂಜೆ 8 ಗಂಟೆಗೆ ಮತ್ತೆ ಸುದೀಪ್ ಹಾಗೂ ಪ್ರತಿಮಾ ಭೇಟಿ ಆಗಿದ್ದಾರೆ. ಈ ವೇಳೆ ಸುದೀಪ್ ಮಂಡಿಯೂರಿ ಪ್ರತಿಮಾಗೆ ಪ್ರಪೋಸ್ ಮಾಡಿದ್ದಾರೆ. ಬಳಿಕ ಸಾವಿರಾರು ಜನರ ನಡುವೆ ಇವರಿಬ್ಬರ ಮದುವೆ ಆಗಿದೆ.

ಸುದೀಪ್ ಪ್ರೀತಿಯ ಸರಳತೆ ಹಾಗೂ ಮುಗ್ಧತೆ ನನಗೆ ಆಶ್ಚರ್ಯಗೊಳಿಸಿತ್ತು. ಹಾಗಾಗಿ ನಾನು ಮದುವೆಗೆ ಒಪ್ಪಿಗೆ ಸೂಚಿಸಿದೆ. ಇದು ಲವ್ ಅಟ್ ಫಸ್ಟ್ ಸೈಟ್ ಆಗಿದ್ದು, ರಾತ್ರಿ ಸುಮಾರು 10.30ಕ್ಕೆ ಹಿಂದ್ ಮೋಟರ್ಸ್ ಗೆ ಹೋಗಿ ಸ್ಥಳೀಯ ಪೆಂಡಾಲ್‍ನಲ್ಲಿ ಮಧ್ಯರಾತ್ರಿ ಮದುವೆಯಾಗಿದ್ದೇವೆ ಎಂದು ಪ್ರತಿಮಾ ತಿಳಿಸಿದ್ದಾರೆ.