ಲೂಧಿಯಾನಾ: ಈಕೆ 19 ವರ್ಷದ ಯುವತಿ. ಇತ್ತೀಚೆಗೆ ವೈದ್ಯರು ಯುವತಿಗೆ ಶಸ್ತ್ರಚಿಕಿತ್ಸೆ ಮಾಡಿ ವಿಚಿತ್ರ ವಸ್ತುವೊಂದನ್ನು ಹೊರತೆಗೆದಿದ್ದಾರೆ.
ಹೊಟ್ಟೇಲಿ ಪ್ಲಾಸ್ಟಿಕ್ ಇತ್ತಂತೆ, ದೊಡ್ಡ ಗಡ್ಡೆ ಇತ್ತಂತೆ, ಮೆಟಲ್ ವಸ್ತುಗಳಿದ್ದವಂತೆ ಅದನ್ನು ಆಪರೇಶನ್ ಮೂಲಕ ಹೊರತೆಗೆಯಲಾಯಿತಂತೆ…ಎಂಬಂತಹ ಹಲವು ಸುದ್ದಿಗಳನ್ನು ನಾವು ಈಗಾಗಲೇ ಅನೇಕ ಬಾರಿ ಕೇಳಿದ್ದೇವೆ. ಹಾಗೇ ಈ ಯುವತಿಯದ್ದೂ ಒಂದು ವಿಚಿತ್ರ ಪ್ರಕರಣ. ಈಕೆಯ ಹೊಟ್ಟೆಯಿಂದ ವೈದ್ಯರು ತೆಗೆದಿದ್ದು ಕೂದಲ ಮುದ್ದೆಯನ್ನು !
ಪಂಜಾಬ್ನ ಲೂಧಿಯಾನಾ ನಗರದಲ್ಲಿರುವ ಮಹಾವೀರ ಸಿವಿಲ್ ಆಸ್ಪತ್ರೆಯಲ್ಲಿ ಯುವತಿಗೆ ಶಸ್ತ್ರಚಿಕಿತ್ಸೆ ನಡೆಸಲಾಗಿದೆ. ಬರೋಬ್ಬರಿ 22 ಸೆಂಮೀ ಉದ್ದ ಹಾಗೂ 8 ಸೆಂ.ಮೀ. ಅಗಲವಿರುವ ಕೂದಲ ರಾಶಿಯನ್ನು ಯುವತಿಯ ಹೊಟ್ಟೆಯಿಂದ ಹೊರಗೆ ತೆಗೆದಿದ್ದಾರೆ.
ವೈದ್ಯ ಮಿಲನ್ ವರ್ಮಾ ಈ ಬಗ್ಗೆ ತಿಳಿಸಿದ್ದು, ಯುವತಿ ಅಪರೂಪದ ಮಾನಸಿಕ ಕಾಯಿಲೆಯೊಂದರಿಂದ ಬಳಲುತ್ತಿದ್ದು ತನ್ನ ಕೂದಲನ್ನು ತಾನೇ ತಿನ್ನುತ್ತಿದ್ದಳು. ಅಷ್ಟೇ ಅಲ್ಲದೆ ಮಣ್ಣು, ಚಾಕ್ಪೀಸ್, ಮರಳನ್ನೂ ತಿನ್ನುತ್ತಿದ್ದಳು ಎಂದು ತಿಳಿಸಿದ್ದಾರೆ.
ಈ ಶಸ್ತ್ರಕ್ರಿಯೆ ಕೂಡ ಸವಾಲಿನ ಕೆಲಸವೇ ಆಗಿತ್ತು. ಯಾಕೆಂದರೆ ಯುವತಿಗೆ ಅಲ್ಸರ್ ಇದೆ. ಹಾಗೇ ಕಡಿಮೆ ತೂಕ ಮತ್ತು ಅಪೌಷ್ಟಿಕತೆಯಿಂದ ಬಳಲುತ್ತಿದ್ದಾಳೆ ಎಂದು ವೈದ್ಯರು ತಿಳಿಸಿದ್ದಾರೆ.
ಸದ್ಯ ಯುವತಿ ಸರ್ಜರಿಯಿಂದ ಚೇತರಿಸಿಕೊಳ್ಳುತ್ತಿದ್ದಾಳೆ ಎನ್ನಲಾಗಿದೆ.
Comments are closed.