ಕುದಿಯುವ ನೀರಿನಂತಾದ ರಾಜಸ್ಥಾನ: ರಾಜ್ಯದಲ್ಲೂ ಜೋರು ಬಿಸಿಲ ಅಬ್ಬರ

ನವದೆಹಲಿ: ಬಿಸಿಲ ಬೇಗೆಗೆ ಭಾರತ ತತ್ತರಿಸಿದೆ. ಉತ್ತರ ಭಾರತವಂತೂ ಅಕ್ಷರಶಃ ಕುದಿಯುವ ನೀರಿನ ಪಾತ್ರೆಯಂತಾಗಿದೆ. ರಾಜಸ್ಥಾನದಲ್ಲಿ ದಾಖಲೆಯ ತಾಪಮಾನ ದಾಖಲಾಗಿದೆ. ಅಲ್ಲಿನ ಜನರು ಮಳೆಗಾಗಿ ಚಾತಕ ಪಕ್ಷಿಯಂತೆ ಕಾದು ಕೂತಿದ್ದಾರೆ.

ರಾಜಸ್ಥಾನದ ಚುರುದಲ್ಲಿ 50 ಡಿಗ್ರಿ ಸೆಲ್ಸಿಯಸ್​ ತಾಪಮಾನ ದಾಖಲಾಗಿದೆ. ಇತಿಹಾಸದಲ್ಲಿ ದಾಖಲಾದ ಗರಿಷ್ಠ ತಾಪಮಾನ ಇದಾಗಿದೆ. ಇನ್ನು ಗಾಂಧೀನಗರ 49, ಬಿಕಾನೇರ್​ 47.9, ಜೈಸಲ್ಮೇರ್​​ನಲ್ಲಿ 47.2 ಹಾಗೂ ಕೋಟಾದಲ್ಲಿ 46 ಡಿಗ್ರಿ ಸೆಲ್ಸಿಯಸ್​ ತಾಪಮಾನ ದಾಖಲಾಗಿದೆ. ಜೋದ್ಪುರದಲ್ಲಿ 45.6, ಬರ್ಮೇರ್​​ನಲ್ಲಿ 44.5 ಡಿಗ್ರಿ ಸೆಲ್ಸಿಯಸ್​ ಉಷ್ಣಾಂಶವಿದೆ.

ಬಿಸಿ ಗಾಳಿಗೆ ರಾಜಸ್ಥಾನ ತತ್ತಿರಿಸಿದೆ. ರಾಜಸ್ಥಾನದಲ್ಲಿ ತಾಪಮಾನ ಮಿತಿಮೀರಿದೆ ಎಂದು ಹವಾಮಾನ ಇಲಾಖೆ ಎಚ್ಚರಿಕೆ ನೀಡಿದ್ದು, ಇದೇ ಹವಾಮಾನ ಮುಂದುವರಿದರೆ ಅಪಾಯ ಕಟ್ಟಿಟ್ಟ ಬುತ್ತಿ ಎಂದು ಹೇಳಿದೆ. ಈ ಭಾಗದಲ್ಲಿ ಅನೇಕರು ಅಸ್ವಸ್ಥಗೊಂಡಿದ್ದಾರೆ. ಜಮ್ಮುವಿನಲ್ಲಿ 43.6 ಡಿಗ್ರಿ ಸೆಲ್ಸಿಯಸ್​ ತಾಪಮಾನ ದಾಖಲಾಗಿದೆ.

ಕರ್ನಾಟಕದಲ್ಲೂ ಬಿಸಿಲ ಅಬ್ಬರ ಜೋರಿದೆ. ವಿಜಯಪುರದಲ್ಲಿ 41 ಡಿ.ಸೆ. ಹಾಗೂ ಕಲಬುರ್ಗಿಯಲ್ಲಿ 42 ಡಿ.ಸೆ. ಉಷ್ಣಾಂಶ ದಾಖಲಾಗಿದೆ.