ಧಾರ್ಮಿಕ ಟೋಪಿ ಧರಿಸಿದ್ದ ಯುವಕನ ಮೇಲೆ ದಾಳಿ

ಗುರುಗ್ರಾಮ್‍‌: ಧಾರ್ಮಿಕ ಟೋಪಿ ಧರಿಸಿದ್ದ ಒಂದು ಕೋಮಿನ ಯುವಕನ ಮೇಲೆ ಇನ್ನೊಂದು ಕೋಮಿನ ಐದಾರು ಜನರ ಗುಂಪೊಂದು ದಾಳಿ ನಡೆಸಿರುವ ಘಟನೆ ಹರಿಯಾಣದ ಗುರುಗ್ರಾಮ್‌ನ ಸದರ್ ಬಜಾರ್‌ನಲ್ಲಿ ನಡೆದಿದೆ.

‘ಈ ಪ್ರದೇಶದಲ್ಲಿ ಧಾರ್ಮಿಕ ಟೋಪಿ ಧರಿಸುವಂತಿಲ್ಲ ಎಂದು ದುಷ್ಕರ್ಮಿಗಳಲ್ಲೊಬ್ಬ ಅವಾಜ್ ಹಾಕಿದ. ನಾನು ಈಗ ತಾನೇ ನಮಾಜ್ ಮುಗಿಸಿ ಬರುತ್ತಿದ್ದೇನೆ ಎಂದು ಹೇಳಿದೆ. ಅಷ್ಟಕ್ಕೆ ಕೋಪಕೊಂಡ ಆತ, ನನ್ನ ಟೋಪಿ ಕಿತ್ತೆಸೆದು ಕಪಾಳಮೋಕ್ಷ ಮಾಡಿದ’ ಎಂದು ದಾಳಿಗೊಳಗಾದ ಯುವಕ ಹೇಳಿಕೊಂಡಿದ್ದಾನೆ.

ನನಗೆ ಹಂದಿ ಮಾಂಸ ತಿನ್ನುವಂತೆ ಒತ್ತಾಯ ಮಾಡಿದ್ದಲ್ಲದೆ, ಜೈ ಶ್ರೀರಾಮ ಮತ್ತು ಭಾರತ್ ಮಾತಾ ಕೀ ಜೈ ಎಂದು ಘೋಷಣೆ ಕೂಗಬೇಕು ಎಂದರು. ನಾನು ತಪ್ಪಿಸಿಕೊಳ್ಳಲು ಯತ್ನಿಸಿದ ಸಂದರ್ಭದಲ್ಲಿ ನನ್ನ ಕುರ್ತಾ ಹರಿದು ಹಾಕಿದರು ಎಂದು ಯುವಕ ಹೇಳಿಕೊಂಡಿದ್ದಾನೆ.

ಯುವಕನ ಮಾಹಿತಿ ಆಧಾರದ ಮೇಲೆ ದೂರು ದಾಖಲಿಸಿಕೊಂಡಿರುವ ಪೊಲೀಸರು, ಪ್ರಕರಣದ ವಿಚಾರಣೆ ನಡೆಸುತ್ತಿದ್ದಾರೆ.