ಹೊಸದಿಲ್ಲಿ: ನಕಲಿ ಅಕೌಂಟ್‌ಗಳು ಮತ್ತು ಸ್ಪ್ಯಾಮ್‌ ಸಂದೇಶಗಳನ್ನು ಹರಡುತ್ತಿರುವವರ ವಿರುದ್ಧ ಫೇಸ್ಬುಕ್ ಕ್ರಮ ಕೈಗೊಳ್ಳುತ್ತಿದ್ದು, ಕಾಂಗ್ರೆಸ್‌ನ ಐಟಿ ಸೆಲ್‌ಗೆ ಸಂಬಂಧಿಸಿದ ವ್ಯಕ್ತಿಗಳ 687 ಖಾತೆಗಳು ಮತ್ತು ಫೇಸ್ಬುಕ್ ಪುಟಗಳನ್ನು ತೆಗೆದುಹಾಕಿದೆ.
ಈ ಖಾತೆಗಳು ಮತ್ತು ಪುಟಗಳನ್ನು ಅವುಗಳಲ್ಲಿ ಇರುವ ಕಂಟೆಂಟ್‌ಗಳ ಆಧಾರದಲ್ಲಿ ತೆಗೆದುಹಾಕಿಲ್ಲ; ಆದರೆ ಅವುಗಳ ‘ಅನಧಿಕೃತ ಹಾಗೂ ಸಂಶಯಾಸ್ಪದ ನಡವಳಿಕೆ’ ಹಾಗೂ ಸ್ಪಾಮ್‌ಗಳನ್ನು ಹರಡುತ್ತಿರುವ ಹಿನ್ನೆಲೆಯಲ್ಲಿ ತೆಗೆದುಹಾಕಲಾಗಿದೆ. ಇದೊಂದು ಸಂಘಟಿತ ಜಾಲದ ಭಾಗವಾಗಿತ್ತು ಎಂದು ಫೇಸ್ಬುಕ್ ಪ್ರಕಟಣೆ ತಿಳಿಸಿದೆ.
ಅಲ್ಲದೆ, ಪಾಕಿಸ್ತಾನದಿಂದ ಕಾರ್ಯನಿರ್ವಹಿಸುವ ಇಂತಹದೇ 103 ಪುಟಗಳು ಮತ್ತು ಖಾತೆಗಳನ್ನು ಫೇಸ್ಬುಕ್ ಕಿತ್ತುಹಾಕಿದೆ.
ಫೇಸ್‌ಬುಕ್‌ನ ಸೈಬರ್ ಭದ್ರತಾ ನೀತಿಯ ಮುಖ್ಯಸ್ಥ ನಥಾನಿಯೆಲ್ ಗ್ಲಿಷರ್ ಸುದ್ದಿಗಾರರ ಜತೆ ಮಾತನಾಡುತ್ತ, ಭಾರತದಲ್ಲಿ ‘ಸಮನ್ವಿಯಿತ ಸಂಶಯಾತ್ಮಕ ನಡವಳಿಕೆ’ ಪ್ರದರ್ಶಿಸುತ್ತಿದ್ದ 687 ಫೇಸ್ಬುಕ್ ಪುಟಗಳು ಮತ್ತು ಖಾತೆಗಳನ್ನು ಕಿತ್ತುಹಾಕಿದ್ದೇವೆ. ಇವುಗಳು ಭಾರತದ ರಾಷ್ಟ್ರೀಯ ಕಾಂಗ್ರೆಸ್‌ನ (ಐಎನ್‌ಸಿ) ಐಟಿ ಸೆಲ್‌ಗೆ ಸಂಬಂಧಿಸಿದ ವ್ಯಕ್ತಿಗಳದ್ದಾಗಿವೆ’ ಎಂದು ತಿಳಿಸಿದರು.
‘ಈ ನೆಟ್‌ವರ್ಕ್‌ಗಳು ಸಂಶಯಾಸ್ಪದವಾಗಿ ಅನಧಿಕೃತ ಹಾಗೂ ಸಮನ್ವಯದ ನಡವಳಿಕೆ ಪ್ರದರ್ಶಿಸುತ್ತಿದ್ದವು. ತಮ್ಮ ಗುರುತು ಮರೆಮಾಚಿ ನಕಲಿ ಖಾತೆಗಳ ಮೂಲಕ ಕಾರ್ಯನಿರ್ವಹಿಸುತ್ತಿದ್ದವು. ಈ ಕಾರಣಕ್ಕಾಗಿಯೇ ಅವುಗಳನ್ನು ತೆಗೆದುಹಾಕಲಾಗಿದೆ’ ಎಂದು ಅವರು ವರದಿಗಾರರಿಗೆ ತಿಳಿಸಿದರು.
‘ಸಂಘಟಿತ ಸಂಶಯಾಸ್ಪದ ನಡವಳಿಕೆ ಪ್ರದರ್ಶಿಸುವ ಅಕೌಂಟ್‌ಗಳನ್ನು ಪತ್ತೆ ಮಾಡಲು ನಾವು ನಿರಂತರ ಶ್ರಮಿಸುತ್ತಿದ್ದೇವೆ. ನಮ್ಮ ಸೇವೆಗಳನ್ನು ಬಳಸಿಕೊಂಡು ಜನರನ್ನು ದಾರಿ ತಪ್ಪಿಸುವ ಕೆಲಸ ಮಾಡುವುದನ್ನು ನಾವು ಬಯಸುವುದಿಲ್ಲ. ಅವುಗಳ ನಡವಳಿಕೆ ಹಿನ್ನೆಲೆಯಲ್ಲಿ ಈ ಪೇಜ್‌ಗಳನ್ನು ನಾವು ಕಿತ್ತು ಹಾಕಿದ್ದೇವೆ’ ಎಂದು ಅವರು ವಿವರಿಸಿದರು.
ಡೇಟಾ ಸುರಕ್ಷತೆಯ ಉಲ್ಲಂಘನೆ ವಿಚಾರದಲ್ಲಿ ಫೇಸ್ಬುಕ್ ಇತ್ತೀಚಿಗೆ ಜಾಗತಿಕವಾಗಿ ತೀವ್ರ ಟೀಕೆಗೆ ಗುರಿಯಾಗಿದೆ. ಈ ಹಿನ್ನೆಲೆಯಲ್ಲಿ ಬಳಕೆದಾರರ ಮತ್ತು ಮಾಹಿತಿ ಸುರಕ್ಷತೆಗೆ ಫೇಸ್ಬುಕ್ ಹೆಚ್ಚಿನ ಕ್ರಮ ಕೈಗೊಳ್ಳುತ್ತಿದೆ. ಫೇಸ್ಬುಕ್ ಒಡೆತನಕ್ಕೆ ಸೇರಿದ ವಾಟ್ಸ್‌ಆ್ಯಪ್‌ ಮತ್ತು ಇನ್‌ಸ್ಟಾಗ್ರಾಂ ತಾಣಗಳನ್ನು ಕೂಡ ಇದೇ ರೀತಿ ದುರ್ಬಳಕೆ ಮಾಡಿಕೊಳ್ಳಲಾಗುತ್ತಿದೆ ಎಂಬ ಆರೋಪಗಳು ಕೇಳಿ ಬರುತ್ತಿವೆ. ಭಾರತದ ಲೋಕಸಭಾ ಚುನಾವಣೆ ಹಿನ್ನೆಲೆಯಲ್ಲಿ ತಪ್ಪು ಮಾಹಿತಿ, ಸುಳ್ಳು ಸುದ್ದಿಗಳನ್ನು ಹರಡುವುದನ್ನು ತಡೆಯಲು ಫೇಸ್ಬುಕ್ ಕ್ರಮ ಆರಂಭಿಸಿದೆ.
ಇತ್ತೀಚೆಗೆ ಹೆಚ್ಚಿನ ಪಾರದರ್ಶಕತೆಗಾಗಿ ರಾಜಕೀಯ ಪಕ್ಷಗಳ ಜಾಹೀರಾತುಗಳಿಗೂ ಫೇಸ್ಬುಕ್ ತನ್ನ ವೇದಿಕೆಯಲ್ಲಿ ಅವಕಾಶ ಕಲ್ಪಿಸಿದೆ. ಅದೇ ರೀತಿ ಫೇಕ್ ನ್ಯೂಸ್ ಹಾವಳಿ ತಡೆಯಲು ಫ್ಯಾಕ್ಟ್ ಚೆಕ್‌ ತಂಡಗಳನ್ನು ನಿಯೋಜಿಸಿದೆ.
‘ನಾವು ಕಾಂಗ್ರೆಸ್ ಪಕ್ಷವನ್ನು ಸಂಪರ್ಕಿಸಿ ಫೇಸ್ಬುಕ್ ಬಳಕೆಯ ಸರಿಯಾದ ಕ್ರಮಗಳ ಬಗ್ಗೆ ತರಬೇತಿ ನೀಡುತ್ತಿದ್ದೇವೆ. ನಕಲಿ ಖಾತೆಗಳ ಬಗ್ಗೆ ಅವರಿಗೂ ಮಾಹಿತಿ ನೀಡಲಾಗಿದ್ದು,ಅವರಿಂದ ಸೂಕ್ತ ಉತ್ತರಗಳನ್ನೂ ಪಡೆಯಲಾಗಿದೆ. ಸಾಮಾಜಿಕ ಜಾಲತಾಣಗಳಲ್ಲಿ ಯಾವ ರೀತಿಯ ನಡವಳಿಕೆ ಇರಬೇಕು ಎಂಬುದರ ಬಗ್ಗೆ ಜನರಿಗೆ ಜಾಗೃತಿ ಮೂಡಿಸುತ್ತಿದ್ದೇವೆ. ಸರಕಾರ ಮತ್ತು ನೀತಿ ನಿರೂಪಕರ ಜತೆಗೂ ನಾವು ಈ ಬಗ್ಗೆ ಚರ್ಚಿಸಿದ್ದೇವೆ’ ಎಂದು ಫೇಸ್ಬುಕ್ ಸೈಬರ್ ಸೆಕ್ಯುರಿಟಿ ಮುಖ್ಯಸ್ಥರು ತಿಳಿಸಿದರು.
ಬ್ಲಾಗ್ ಬರಹವೊಂದರಲ್ಲಿ ಫೇಸ್ಬುಕ್, ಭಾರತದಲ್ಲಿ 20 ಕೋಟಿಗೂ ಅಧಿಕ ಬಳಕೆದಾರರ ಪುಟಗಳು ಮತ್ತು ಖಾತೆಗಳನ್ನು ತೆಗೆದುಹಾಕಲಾಗಿದೆ. ಈ ಕುರಿತು ಜನರಿಗೆ ಜಾಗೃತಿ ಮೂಡಿಸುವ ಜಾಹೀರಾತುಗಳಿಗೆ ಫೇಸ್ಬುಕ್ 39,000 ಡಾಲರ್‌ಗೂ ಹೆಚ್ಚು ಹಣವನ್ನು ಭಾರತೀಯ ರೂಪಾಯಿಗಳಲ್ಲಿ ಖರ್ಚು ಮಾಡಿದೆ ಎಂದು ತಿಳಿಸಿದೆ.
ಸಿಲ್ವರ್ ಟಚ್ ಹೆಸರಿನ ಭಾರತೀಯ ಐಟಿ ಘಟಕಕ್ಕೆ ಸೇರಿದ 15 ಪುಟಗಳು ಗ್ರೂಪ್‌ಗಳು ಮತ್ತು ಖಾತೆಗಳನ್ನೂ ಫೇಸ್ಬುಕ್ ಅಳಿಸಿ ಹಾಕಿದೆ.
Comments are closed.