ಭಾರತದಲ್ಲಿ ಮಹಿಳೆಯರ ಸುರಕ್ಷತೆಯನ್ನು ಹೆಚ್ಚಿಸಲು ಕೇಂದ್ರ ಸರ್ಕಾರ ಕೆಲ ಸಂಚಾರ ನಿಯಮಗಳನ್ನು ಜಾರಿಗೆ ತಂದಿದೆ. ಇದರ ಅನ್ವಯ ಪ್ರತಿಯೊಂದು ಸಾರ್ವಜನಿಕ ಸಾರಿಗೆಗಳಲ್ಲಿ ಕಡ್ಡಾಯವಾಗಿ VLTs ಮತ್ತು ಪ್ಯಾನಿಕ್ ಬಟನ್ ಅನ್ನು ಅಳವಡಿಸಬೇಕೆಂದು ತಿಳಿಸಲಾಗಿದೆ. ಈ ನಿಯಮವು ಹೊಸ ವರ್ಷದಿಂದ ಜಾರಿಯಲ್ಲಿದ್ದು, ಏಪ್ರಿಲ್ 1, 2019 ರೊಳಗೆ ಹಳೆಯ ವಾಹನಗಳಲ್ಲಿ ಪ್ಯಾನಿಕ್ ಬಟನ್ ಅಳವಡಿಸಲು ಗಡುವು ನೀಡಲಾಗಿದೆ.
ಜನವರಿ 1, 2019 ರ ಬಳಿಕ ನೋಂದಾಯಿತವಾಗಿರುವ ಎಲ್ಲಾ ವಾಹನಗಳಲ್ಲಿ ಈ ಬಟನ್ ಅನ್ನು ಕಡ್ಡಾಯಗೊಳಿಸಲಾಗಿದೆ. ಕಳೆದ ಬಜೆಟ್ ವೇಳೆಯೇ ಹೊಸ ನಿಮಯ AIS140 ಅನ್ನು ಪ್ರಸ್ತಾಪಿಸಲಾಗಿತ್ತು. ಈ ನಿಯಮದ ಅನುಸಾರ ಸಾರ್ವಜನಿಕ ವಾಹನಗಳಲ್ಲಿ ಕಡ್ಡಾಯವಾಗಿ VLTs ಮತ್ತು ಒಂದು ಅಥವಾ ಅದಕ್ಕಿಂತ ಹೆಚ್ಚಿನ ಪ್ಯಾನಿಕ್ ಬಟನ್ ಅಳವಡಿಸುವುದು ನಿರ್ಬಂಧ ಮಾಡಲಾಗಿದೆ. ಆದರೆ ಈ ನಿಯಮವು ರಿಕ್ಷಾ ಮತ್ತು ಇ- ರಿಕ್ಷಾಗಳಿಗೆ ಅನ್ವಯಿಸುವುದಿಲ್ಲ ಎಂದು ಸಾರಿಗೆ ಇಲಾಖೆ ತಿಳಿಸಿದೆ.
ನವೀಕರಣ ಹೇಗೆ?
ಹಳೆಯ ವಾಹನಗಳಲ್ಲಿ AIS140 ಅನ್ನು ನವೀಕರಿಸಲು ಹಲವು ಆಯ್ಕೆಗಳಿವೆ. ವಾಹನಗಳ ಮಾಲೀಕರು ಆಫ್ಟರ್ ಮಾರ್ಕೆಟ್ ಡಿವೈಸ್ ವೆಂಡರ್, ಒಇಎಂ ಅನ್ನು ಅಪ್ಡೇಟ್ ಮಾಡಿಕೊಳ್ಳಬಹುದು. ಅಥವಾ ಯಾವುದಾದರೂ ಟ್ರಾನ್ಸ್ಪೋರ್ಟ್ ಎಂಡ್ ಲಾಜಿಸ್ಟಿಕ್ ಕಂಪೆನಿಯ ಮೂಲಕ ಈ ಬಟನ್ಗಳನ್ನು ಅಳವಡಿಸಿಕೊಳ್ಳಬಹುದು. ಅಲ್ಲದೆ ಆರ್ಟಿಓ ಅನ್ನು ಸಂಪರ್ಕಿಸುವ ಮೂಲಕ ಬಟನ್ ಅಳವಡಿಕೆಯ ಸಂಪೂರ್ಣ ಮಾಹಿತಿಗಳನ್ನು ಪಡೆಯಬಹುದಾಗಿದೆ.
ಏನಿದು ಪ್ಯಾನಿಕ್ ಬಟನ್?
AIS140 ಮಾನದಂಡಗಳನ್ನು ಸಂಪೂರ್ಣವಾಗಿ ಮಹಿಳೆಯರ ಸುರಕ್ಷತೆಗಾಗಿ ವಿನ್ಯಾಸಗೊಳಿಸಲಾಗಿದೆ. ಇದರಿಂದ ಒಬ್ಬಂಟಿಯಾಗಿ ಪ್ರಯಾಣಿಸುವ ಮಹಿಳೆರಿಗೆ ಅಥವಾ ತೊಂದರೆಗೆ ಒಳಗಾದವರಿಗೆ ಅನುಕೂಲವಾಗಲಿದೆ. ವಾಹನಗಳಲ್ಲಿ ಯಾವುದೇ ರೀತಿಯ ಅಹಿತಕರ ಘಟನೆ ಸಂಭವಿಸಿದರೆ, ಪ್ರಯಾಣಿಕರು ಪ್ಯಾನಿಕ್ ಬಟನ್ ಅನ್ನು ಒತ್ತಬಹುದು. ಅಷ್ಟೇ ಅಲ್ಲದೆ ವಾಹನಗಳ ವೇಗವನ್ನು ನಿಯಂತ್ರಿಸಲು ಕೂಡ ಸಹಕಾರಿಯಾಗಲಿದೆ. ವಾಹನವು ಅನಿಯಮಿತ ವೇಗದಿಂದ ಚಲಿಸುತ್ತಿದ್ದರೆ ಬಟನ್ ಒತ್ತುವ ಮೂಲಕ ಸೂಚನೆ ನೀಡಬಹುದು. ಈ ಗುಂಡಿಯನ್ನು ಒತ್ತುತ್ತಿದ್ದಂತೆ ತಕ್ಷಣವೇ ನಿಯಂತ್ರಣ ಕೇಂದ್ರಕ್ಕೆ ಮಾಹಿತಿ ರವಾನೆಯಾಗಲಿದೆ. ಇದರಿಂದ ವಾಹನಗಳ ಟ್ರಾಕಿಂಗ್ ಮಾಡುವುದು ಸುಲಭವಾಗಲಿದೆ.
ಯಾರು ನಿಯಂತ್ರಿಸುತ್ತಾರೆ?
ವಿಎಲ್ಟಿಗೆ ಸೇರಿದ ವಾಹನಗಳನ್ನು ರಾಜ್ಯ ಸರ್ಕಾರ ನಿಯಂತ್ರಿಸಲಿದೆ. ಪ್ರತಿ ರಾಜ್ಯದಲ್ಲೂ ಇದರ ಕಾರ್ಯಾಚರಣೆಯ ಕೇಂದ್ರಗಳನ್ನು ಸ್ಥಾಪಿಸಲಾಗುತ್ತದೆ. ಪ್ಯಾನಿಕ್ ಗುಂಡಿಗಳನ್ನು ಒತ್ತಿದಾಗ ತಕ್ಷಣವೇ ಕಾರ್ಯಾಚರಣೆ ಕೇಂದ್ರದಲ್ಲಿ ಮಾಹಿತಿ ತಲುಪುತ್ತದೆ. ಇದರಿಂದ ವಾಹನಗಳಲ್ಲಿ ಮಹಿಳೆಯರ ಮೇಲೆ ನಡೆಯುವ ಅಹಿತಕರ ಘಟನೆಗಳನ್ನು ತಡೆಗಟ್ಟಲು ಸಾಧ್ಯವಾಗುತ್ತದೆ. ಒಂದು ಬಾರಿ ಬಟನ್ ಕ್ಲಿಕ್ ಮಾಡಿದರೆ, ಆ ಪ್ರದೇಶದ ಪೊಲೀಸ್ ಠಾಣೆಗಳಿಗೆ ಅಥವಾ ಭದ್ರತಾ ಸಿಬ್ಬಂದಿಗಳಿ ಮಾಹಿತಿ ರವಾನೆಯಾಗಲಿದೆ. ಏಪ್ರಿಲ್ 1 ರ ನಂತರ ಪ್ಯಾನಿಕ್ ಬಟನ್ಗಳನ್ನು ಅಳವಡಿಸದ ಸಾರ್ವಜನಿಕ ವಾಹನಗಳನ್ನು ಜಪ್ತಿ ಮಾಡಲಾಗುವುದು ಎಂದು ಸಾರಿಗೆ ಇಲಾಖೆ ತಿಳಿಸಿದೆ.
Comments are closed.