ಒಂದೇ ರಾತ್ರಿ 2 ಯತ್ನದಲ್ಲಿ ವಿಫಲನಾಗಿ ಮೂರನೇ ಯತ್ನದಲ್ಲಿ ತಾಯಿಯನ್ನು ಕೊಂದ!

ಮುಂಬಯಿ: ತಾಯಿಯ ಜತೆಗೆ ದಿನವೂ ಜಗಳವಾಡುತ್ತಿದ್ದ ಮಗನೋರ್ವ, ಕಿರಿಕಿರಿಯಾಗುತ್ತಿದೆ ಎಂದು ಆಕೆಯನ್ನು ಒಂದೇ ರಾತ್ರಿಯಲ್ಲಿ ಮೂರು ಬಾರಿ ಯತ್ನಿಸಿ ಕೊನೆಗೂ ಹತ್ಯೆ ಮಾಡಿದ್ದಾನೆ.

53 ವರ್ಷದ ಯೋಗೇಶ್ ಶೆಣೈ ತನ್ನ 80 ವರ್ಷದ ತಾಯಿಯನ್ನು ಹತ್ಯೆಗೈಯುವ ಉದ್ದೇಶದಿಂದ ಆಕೆಗೆ ಬುಧವಾರ ರಾತ್ರಿ 30 ನಿದ್ರೆ ಮಾತ್ರೆಯನ್ನು ಹಾಲಿನಲ್ಲಿ ಬೆರೆಸಿ ಕೊಟ್ಟ ಬಳಿಕ ಮಲಗಿದ್ದ.

ಆದರೆ ಮಧ್ಯರಾತ್ರಿ ಎದ್ದು ನೋಡಿದಾಗ ಆಕೆ ಉಸಿರಾಡುತ್ತಿದ್ದದ್ದನ್ನು ಗಮನಿಸಿ ದಿಂಬುವನ್ನು ಮುಖಕ್ಕೆ ಒತ್ತಿ ಹಿಡಿದು ಸಾಯಿಸಲು ಯತ್ನಿಸಿದ್ದ. ಆದರೆ ಆಕೆ ಸಾಯದೇ ಇದ್ದಾಗ ಗಂಟಲು ಸೀಳಿ ಸಾಯಿಸಿದ್ದಾನೆ. ನಂತರ ಏನೂ ಆಗದವನಂತೆ ಮನೆಯಲ್ಲೇ ಮಲಗಿದ್ದ.

ಬೆಳಗ್ಗೆ ಮನೆಯಿಂದ ಏನೂ ಶಬ್ದ ಕೇಳದೇ ಇದ್ದಾಗ, ಪಕ್ಕದ ಮನೆಯವರು ಪೊಲೀಸರಿಗೆ ತಿಳಿಸಿದ್ದಾರೆ. ಪೊಲೀಸರು ಬಂದು ಪರಿಶೀಲಿಸಿದಾಗ ವೃದ್ಧೆ ತಾಯಿ ಸತ್ತುಹೋಗಿರುವುದು ಪತ್ತೆಯಾಗಿದೆ.

ಪೊಲೀಸರು ಯೋಗೇಶ್‌ನನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸಿದ್ದಾರೆ. ಯೋಗೇಶ್ ತಂದೆ ಮತ್ತು ಸಹೋದರ ಕೂಡ ಸಾವನ್ನಪ್ಪಿದ್ದು, ಆತನ ಪತ್ನಿಯೂ ಯೋಗೇಶ್‌ನನ್ನು ತೊರೆದು ಹೋಗಿದ್ದು, ಹೀಗಾಗಿ ತಾಯಿ ಜತೆ ಆತ ವಾಸವಾಗಿದ್ದ.

ಇತ್ತೀಚೆಗೆ ತಾಯಿಯ ವೈದ್ಯಕೀಯ ಚಿಕಿತ್ಸಾ ವೆಚ್ಚ ಏರಿಕೆಯಾಗುತ್ತಿದೆ ಎಂದು ಗಲಾಟೆ ಮಾಡಿದ್ದ ಎಂದು ನೆರೆಮನೆಯವರು ಹೇಳಿದ್ದಾರೆ.