ರಾಷ್ಟ್ರೀಯ

ಡೆಬಿಟ್‌ ಕಾರ್ಡ್ ಹಿಂದೆ ಪಿನ್ ನಂಬರ್ ಬರೆದು 47 ಸಾವಿರ ರೂ. ಕಳೆದುಕೊಂಡ!

Pinterest LinkedIn Tumblr


ಪುಣೆ: ಎಟಿಎಂ ಕಾರ್ಡ್ ಹಿಂಭಾಗ ಅದರ ಪಿನ್ ನಂಬರ್‌ ಬರೆಯುವ ಅಭ್ಯಾಸ ನಿಮಗಿದ್ಯಾ? ಹಾಗಿದ್ರೆ, ಇಂದೇ ಈ ಅಭ್ಯಾಸವನ್ನು ಬಿಟ್ಟುಬಿಡಿ. ಇಲ್ಲದಿದ್ರೆ ನಿಮ್ಮ ಬ್ಯಾಂಕ್‌ನ ಹಣವೆಲ್ಲ ಮಂಗಮಾಯವಾಗುತ್ತದೆ.

ಮಹಾರಾಷ್ಟ್ರದ ಪುಣೆಯ ಚಿಕಲಿ ಪ್ರದೇಶದ ನಿವಾಸಿಯೊಬ್ಬರು ಡೆಬಿಟ್‌ ಕಾರ್ಡ್ ಹಿಂಭಾಗ ಪಿನ್ ನಂಬರ್ ಬರೆದು 47 ಸಾವಿರ ರೂ. ಹಣ ಕಳೆದುಕೊಂಡಿದ್ದಾರೆ. ಅವರ ಮನೆಗೆ ನುಗ್ಗಿದ ಕಳ್ಳ ಡೆಬಿಟ್ ಕಾರ್ಡ್ ಜತೆಗೆ 13 ಸಾವಿರ ಮೌಲ್ಯದ ಬೆಲೆಬಾಳುವ ವಸ್ತುಗಳನ್ನು ದೋಚಿದ್ದಾನೆ. ಸೋಮವಾರ ಬೆಳಗ್ಗಿನ ಜಾವ ಈ ಘಟನೆ ನಡೆದಿದೆ ಎಂದು ತಿಳಿದುಬಂದಿದೆ. ಡೆಬಿಟ್ ಕಾರ್ಡ್ ಹಿಂಭಾಗ ಬರೆದಿದ್ದ ಪಿನ್‌ ನಂಬರ್‌ನ ಸಹಾಯದಿಂದ ಎಟಿಎಂನಲ್ಲಿ 47 ಸಾವಿರ ರೂ. ಹಣವನ್ನು ಕಳ್ಳ ಆರಾಮಾಗಿ ದೋಚಿದ್ದಾನೆ.

”ಭಾನುವಾರ ರಾತ್ರಿ ಚಿಕಲಿ ಪ್ರದೇಶ ಮೋರೆ ವಸ್ತಿಯ ಮನೆಯ ಟೆರೇಸ್‌ ಮೇಲೆ ಕುಟುಂಬ ಸಮೇತ ಮಲಗಿದ್ದೆವು. ಆ ವೇಳೆ ಶಂಕಿತ ಕಳ್ಳ ಮನೆಗೆ ನುಗ್ಗಿ 13 ಸಾವಿರ ರೂ. ಮೌಲ್ಯದ ಹಣ, ಎರಡು ಮೊಬೈಲ್‌ ಫೋನ್‌ಗಳು, ಚಿನ್ನ, ಬೆಳ್ಳಿ ಆಭರಣಗಳನ್ನು ದೋಚಿರುವುದಾಗಿ” ಖಾಸಗಿ ಕಂಪನಿಯೊಂದರಲ್ಲಿ ಕೆಲಸ ಮಾಡುತ್ತಿರುವ ವಡೈಲ್‌ ದೂರು ನೀಡಿದ್ದಾಗಿ ಚಿಕಲಿ ಪೊಲೀಸರು ವಿಜಯ ಕರ್ನಾಟಕ ಸೋದರ ಪತ್ರಿಕೆ ಟೈಮ್ಸ್ ಆಫ್‌ ಇಂಡಿಯಾಗೆ ಮಾಹಿತಿ ನೀಡಿದ್ದಾರೆ.

ಇನ್ನು, ವಡೈಲ್‌ನ ಡೆಬಿಟ್‌ ಕಾರ್ಡ್‌ ಅನ್ನೂ ಕಳ್ಳರು ನೋಡಿದ್ದು, ಅದನ್ನು ತೆಗೆದುಕೊಂಡು ಹೋಗಿದ್ದಾರೆ. ಬಳಿಕ, ಕಾರ್ಡ್ ಹಿಂಭಾಗ ಬರೆದಿರುವ ಪಿನ್ ನಂಬರ್ ನೋಡಿ ಹತ್ತಿರದ ಎಟಿಎಂಗೆ ಹೋಗಿ ಅವರ ಬ್ಯಾಂಕ್‌ ಅಕೌಂಟ್‌ನಿಂದ 47 ಸಾವಿರ ರೂ. ಹಣ ದೋಚಿದ್ದಾರೆ. ಸೋಮವಾರ ಬೆಳಗ್ಗೆ ಈ ಘಟನೆ ಅವರಿಗೆ ಬೆಳಕಿಗೆ ಬಂದಿದೆ” ಎಂದು ಸಹ ಅಧಿಕಾರಿ ಹೇಳಿದ್ದಾರೆ. ಜತೆಗೆ, ಪೊಲೀಸರಿಗೆ ಕರೆ ಮಾಡಲೆಂದು ಮೊಬೈಲ್‌ ತೆಗೆದುಕೊಂಡ ವಡೈಲ್‌ ತನ್ನ ಮೊಬೈಲ್‌ಗೆ ಬಂದಿರುವ ಎಸ್‌ಎಂಎಸ್‌ ನೋಡಿ ದಂಗಾಗಿದ್ದಾರೆ. ಯಾಕೆಂದರೆ ಅಕೌಂಟ್‌ನಿಂದ 47 ಸಾವಿರ ರೂ. ಕಳೆದುಕೊಂಡಿರುವುದು ಆ ವೇಳೆಗೆ ಗೊತ್ತಾಗಿದೆ. ಬಳಿಕ, ಡೆಬಿಟ್‌ ಕಾರ್ಡ್ ಕಳೆದುಹೋಗಿರುವುದು ಸಹ ಗೊತ್ತಾಗಿದೆ.

ಈ ಹಿನ್ನೆಲೆ, ಮನೆ ಬಳಿಯ ಸಿಸಿ ಕ್ಯಾಮರಾ ದೃಶ್ಯಾವಳಿಗಳನ್ನು ಪರಿಶೀಲಿಸಿ ತನಿಖೆ ನಡೆಸಲಿದ್ದೇವೆ ಎಂದು ಸಹ ತನಿಖಾಧಿಕಾರಿ ಹೇಳಿದ್ದಾರೆ.

Comments are closed.