ರಾಷ್ಟ್ರೀಯ

ನಾವು ಇಲ್ಲಿ ಭಯದಿಂದ ಬದುಕುತ್ತಿದ್ದೇವೆ: ಅಯೋಧ್ಯೆಯ ಮುಸ್ಲಿಮರು

Pinterest LinkedIn Tumblr


ಫೈಜಾಬಾದ್: ಉತ್ತರ ಪ್ರದೇಶದ ಅಯೋಧ್ಯೆಯಲ್ಲಿ ವಿಶ್ವ ಹಿಂದೂ ಪರಿಷತ್ ( ವಿಎಚ್‌ಪಿ ) ಹಾಗೂ ಶಿವಸೇನಾ ಕಾರ್ಯಕರ್ತರು ಸಭೆ ನಡೆಸಲು ಮುಂದಾಗಿದ್ದಾರೆ. ಇದರಿಂದಾಗಿ ನಾವು ಇಲ್ಲಿ ಭಯದಿಂದ ಜೀವನ ಮಾಡುತ್ತಿದ್ದೇವೆ. ಅಯೋಧ್ಯೆಯಿಂದ ವಲಸೆ ಕೂಡ ಹೋಗಬೇಕಾಗಿ ಬರಬಹುದು ಎಂದು ಸ್ಥಳೀಯ ಮುಸ್ಲಿಮರು ಹೇಳಿಕೊಂಡಿದ್ದಾರೆ.

ನವೆಂಬರ್ 24, 25 ರಂದು ವಿಎಚ್‌ಪಿ ‘ಸಂತ ಸಮ್ಮೇಳನ’ ನಡೆಸುವುದಾಗಿ ಘೋಷಿಸಿದೆ. ಅಲ್ಲದೆ, ಶಿವಸೇನಾ ಸಹ ಹಲವು ಸ್ವಾಮೀಜಿಗಳನ್ನು ಭೇಟಿಯಾಗುತ್ತಿದ್ದು, ಇನ್ನು ಕೆಲ ದಿನಗಳಲ್ಲಿ ಪಕ್ಷದ ಮುಖ್ಯಸ್ಥ ಉದ್ಧವ್‌ ಠಾಕ್ರೆ ಸಾರ್ವಜನಿಕ ಸಭೆಯನ್ನು ಉದ್ದೇಶಿಸಿ ಮಾತನಾಡಲಿದ್ದಾರೆ ಎಂದು ತಿಳಿದುಬಂದಿದೆ. ಅಲ್ಲದೆ, ಈ ಎರಡೂ ಕಾರ್ಯಕ್ರಮಗಳಲ್ಲಿ ತಲಾ 1 ಲಕ್ಷ ಜನ ಸೇರಲಿದ್ದಾರೆ ಎಂದು ವಿಎಚ್‌ಪಿ ಹಾಗೂ ಶಿವಸೇನಾದ ಕಾರ್ಯಕರ್ತರು ಹೇಳಿಕೊಂಡಿದ್ದಾರೆ.

”ಈ ಹಿನ್ನೆಲೆ ಲಕ್ಷಾಂತರ ಕರಸೇವಕರು ಅಯೋಧ್ಯೆಗೆ ಬರುವ ಸಾಧ್ಯತೆ ಇದೆ. ಹೀಗಾಗಿ, ಅಯೋಧ್ಯೆಯಲ್ಲಿರುವ ಮುಸ್ಲಿಮರು ಭಯಭೀತರಾಗಿದ್ದಾರೆ” ಎಂದು ಬಾಬ್ರಿ ಮಸೀದಿ ಧ್ವಂಸ ಪ್ರಕರಣದ ಅರ್ಜಿದಾರರು ಹೇಳಿದ್ದಾರೆ. ಅಲ್ಲದೆ, ಸರಕಾರ ಸ್ಥಳೀಯ ಮುಸ್ಲಿಮರಿಗೆ ಭದ್ರತೆ ಒದಗಿಸಬೇಕೆಂದೂ ಪ್ರಕರಣದ ಪ್ರಮುಖ ಅರ್ಜಿದಾರ ಇಕ್ಬಾಲ್ ಅನ್ಸಾರಿ ಒತ್ತಾಯಿಸಿದ್ದಾರೆ. ಜತೆಗೆ, ”ಡಿಸೆಂಬರ್ 6, 1992ರಲ್ಲಿ ಮುಸ್ಲಿಮರ ಮೇಲೆ ದಾಳಿ ಮಾಡಿರುವುದು ಹಾಗೂ ಕೊಲೆ ಮಾಡಿರುವುದನ್ನು ಸ್ಥಳೀಯರು ಇನ್ನೂ ಮರೆತಿಲ್ಲ”’ ಎಂದು ಮತ್ತೊಬ್ಬ ಅರ್ಜಿದಾರ ಹಾಜಿ ಮಹಬೂಬ್‌ ಹೇಳಿದ್ದಾರೆ.

” ನಾವು ಅಯೋಧ್ಯೆಯಲ್ಲಿ ಶಾಂತಿಯಿಂದ ಜೀವನ ಮಾಡಲು ಇಚ್ಛಿಸುತ್ತೇವೆ. ಇದು ನಮ್ಮ ಹುಟ್ಟೂರು. ಇಲ್ಲಿ ನಾವು ಹಲವು ತಲೆಮಾರುಗಳಿಂದ ಜೀವಿಸುತ್ತಿದ್ದೇವೆ. ಆದರೆ, ವಿಎಚ್‌ಪಿ ಹಾಗೂ ಶಿವ ಸೇನಾ ಕಾರ್ಯಕರ್ತರು ಬಾಬ್ರಿ ಮಸೀದಿ ಧ್ವಂಸ ಮಾಡಿದ ಬಳಿಕ ನಮ್ಮ ಮೇಲೆ ದಾಳಿಮಾಡಿದ್ದನ್ನು ಇನ್ನೂ ಮರೆತಿಲ್ಲ” ಎಂದು ಮತ್ತೊಬ್ಬ ಅರ್ಜಿದಾರ ಮೊಹಮ್ಮದ್ ಉಮರ್ ಹೇಳಿದ್ದಾರೆ.

ಇನ್ನು,ಮುಸ್ಲಿಮರ ಕಾಳಜಿ ಬಗ್ಗೆ ಪ್ರತಿಕ್ರಿಯೆ ನೀಡಿದ ಉತ್ತರ ಪ್ರದೇಶ ಡಿಜಿಪಿ ಓ.ಪಿ.ಸಿಂಗ್, ಮುಸ್ಲಿಮರ ಕುಂದುಕೊರತೆಗಳನ್ನು ಪೊಲೀಸರು ನಿವಾರಿಸಲಿದ್ದಾರೆ ಎಂದಿದ್ದು, ಕೋಮು ಉದ್ವಿಗ್ನತೆಯ ಸಾಧ್ಯತೆಗಳನ್ನು ತಳ್ಳಿಹಾಕಿದ್ದಾರೆ.

”ಅಯೋಧ್ಯೆಯಲ್ಲಿ ಯಾರ ಹೇಳಿಕೆಗಳನ್ನು ನಾನು ನೋಡಿಲ್ಲ. ಆದರೆ, ಉತ್ತರ ಪ್ರದೇಶದಲ್ಲಿ ಯಾರಿಗಾದರೂ ಅಭದ್ರತೆಯ ವಾತಾವರಣ ಮೂಡಿದರೆ, ಅವರ ಸುರಕ್ಷತೆಯನ್ನು ಕಾಪಾಡುವುದು ಉತ್ತರ ಪ್ರದೇಶ ಪೊಲೀಸರ ಕೆಲಸವಾಗಿದ್ದು, ಇದನ್ನು ನಾವು ಮಾಡುತ್ತೇವೆ” ಎಂದೂ ಸಿಂಗ್ ಹೇಳಿದ್ದಾರೆ.

”ಅಯೋಧ್ಯೆ ಮಾತ್ರವಲ್ಲದೆ, ಉತ್ತರ ಪ್ರದೇಶದ ಇತರ ಪ್ರದೇಶಗಳಲ್ಲೂ ಸಹ ಯಾವುದೇ ಅಲ್ಪಸಂಖ್ಯಾತ ಸಂಘಟನೆಗಳು ಅಹಿತಕರ ಪರಿಸ್ಥಿತಿ ಇದೆ ಎಂದು ಹೇಳಿಕೊಂಡಿಲ್ಲ. ಅಲ್ಲದೆ, ಕಳೆದ ಒಂದೂವರೆ ವರ್ಷದಿಂದ ಉತ್ತರ ಪ್ರದೇಶ ರಾಜ್ಯದಲ್ಲಿ ಒಂದೇ ಒಂದು ಕೋಮು ಸಂಘರ್ಷ ಘಟನೆಯೂ ನಡೆದಿಲ್ಲ ಎಂಬ ಹೆಮ್ಮೆ ನಮಗಿದೆ” ಎಂದು ಹೇಳಿದ್ದಾರೆ.

ಇನ್ನು, ”ಇಲ್ಲಿ ಯಾರೂ ಹೆದರಿಕೊಳ್ಳುವ ಅಗತ್ಯವಿಲ್ಲ. ವಿಎಚ್‌ಪಿ ಹಾಗೂ ಶಿವಸೇನಾದ ಕಾರ್ಯಕ್ರಮಗಳು ನಡೆಯುವ ವೇಳೆ ನಾವು ನಗರದಾದ್ಯಂತ ಹೆಚ್ಚು ಭದ್ರತೆ ಒದಗಿಸಲಿದ್ದೇವೆ” ಎಂದು ಫೈಜಾಬಾದ್‌ ನಗರದ ಎಸ್‌ಪಿ ಅನಿಲ್‌ ಕುಮಾರ್‌ ಸಿಂಗ್ ಭರವಸೆ ನೀಡಿದ್ದಾರೆ.

Comments are closed.