ಕುಡುಕ ಗಂಡನಿಂದ ಪತ್ನಿಯ ಹುಟ್ಟುಹಬ್ಬದ ದಿನವೇ ಆಕೆಯ ಕೊಲೆ!

ಹೊಸದಿಲ್ಲಿ: ಕುಡುಕ ಪತಿಯೊಬ್ಬ ಮನೆಗೆ ಬಂದು ತನ್ನ ಹೆಂಡತಿಯನ್ನು ಇರಿದು ಕೊಂದು ಹಾಕಿದ ಘಟನೆ ರಾಷ್ಟ್ರ ರಾಜಧಾನಿಯಲ್ಲಿ ನಡೆದಿದೆ. 34 ವರ್ಷ ವಯಸ್ಸಿನ ಮಹಿಳೆಯ ಹುಟ್ಟುಹಬ್ಬದ ದಿನವೇ ಕೊಲೆ ಮಾಡಿದ್ದು, ಎರಡು ವರ್ಷದ ಪುತ್ರನ ಎದುರಲ್ಲೇ ಪತಿ ಈ ಹೇಯ ಕೃತ್ಯ ನಡೆಸಿದ್ದಾನೆ. ಹೊಸದಿಲ್ಲಿಯ ಖಾನ್‌ಪುರ ಪ್ರದೇಶದಲ್ಲಿ ಈ ಘಟನೆ ನಡೆದಿದೆ.

ರಾಜೇಶ್ ಚೌಹಾಣ್‌ ಎಂಬ ಪತಿ ಯಾವಾಗಲೂ ಕುಡಿದು ಮನೆಗೆ ಬಂದು ಹೆಂಡತಿ ರೇಣುವಿಗೆ ಹೊಡೆಯುತ್ತಿದ್ದ ಎಂಬುದು ಬೆಳಕಿಗೆ ಬಂದಿದೆ. ಇನ್ನು, ಪತಿ ವಿರುದ್ಧ ಪತ್ನಿ ಚಂಡೀಗಢದಲ್ಲಿರುವ ಮಹಿಳಾ ಪೊಲೀಸ್ ಠಾಣೆಗೆ ಅಪರಾಧ ಪ್ರಕರಣವೊಂದಕ್ಕೆ ಸಂಬಂಧಪಟ್ಟಂತೆ ಈ ಹಿಂದೆ ದೂರು ನೀಡಿದ್ದಳು. ಆದರೆ, ಘಟನೆಯ ಬಳಿಕವೂ ಪತ್ನಿಯನ್ನು ಟಾರ್ಚರ್ ಮಾಡುತ್ತಿದ್ದ ರಾಜೇಶ್‌ ವಿರುದ್ಧ ಪೊಲೀಸರಿಗೆ ಮಾಹಿತಿ ನೀಡುವುದಾಗಿ ರೇಣು ಬೆದರಿಕೆ ಹಾಕಿದ್ದಳು. ಈ ಹಿನ್ನೆಲೆ ಆಕ್ರೋಶಗೊಂಡ ಪತಿ, ಅಡುಗೆ ಮನೆಯಲ್ಲಿದ್ದ ಚಾಕುವಿನಿಂದ ಸುಮಾರು 12 ಬಾರಿ ಪತ್ನಿಗೆ ಇರಿದು ಸಾಯಿಸಿದ್ದಾನೆ ಎಂದು ತಿಳಿದು ಬಂದಿದೆ.

ಘಟನೆ ಬಗ್ಗೆ ಮಾಹಿತಿ ನೀಡಿದ ಡಿಸಿಪಿ ದಕ್ಷಿಣ ರೋಮಿಲ್ ಬಾನಿಯಾ, ನಮಗೆ ಮಧ್ಯಾಹದ ವೇಳೆಗೆ ಘಟನೆ ಬಗ್ಗೆ ತಿಳಿದು ಬಂತು. ನಂತರ, ನಾವು ಮನೆಗೆ ಹೋದಾಗ ಮನೆಯಿಂದ ಹೊರಗೆ ಓಡಿ ಹೋಗಲು ಬ್ಯಾಗ್ ಪ್ಯಾಕ್ ಮಾಡುತ್ತಿದ್ದ ರಾಜೇಶ್ ಸಿಕ್ಕಿಬಿದ್ದ ಎಂದು ಮಾಹಿತಿ ನೀಡಿದ್ದಾರೆ.

5 ಸ್ಟಾರ್ ಹೋಟೆಲ್‌ನಲ್ಲಿ ಕೆಲಸ ದೊರೆತ ಬಳಿಕ ದಂಪತಿ ಕಳೆದ 2 ವರ್ಷಗಳ ಹಿಂದೆ ದಿಲ್ಲಿಗೆ ಶಿಫ್ಟ್‌ ಆಗಿದ್ದರು ಎಂದು ಕೊಲೆಯಾದ ಮಹಿಳೆಯ ಸಹೋದರ ರಾಕೇಶ್ ತಿಳಿಸಿದ್ದಾನೆ. ಇನ್ನು, ಸಂಸಾರ ನಡೆಸಲು ಪತ್ನಿ ಆಕೆಯ ತವರು ಮನೆಯಿಂದ ಹಣ ತರುವಂತೆ ಪತಿ ಯಾವಾಗ್ಲೂ ಒತ್ತಾಯಿಸುತ್ತಿದ್ದ ಎಂದು ಮಹಿಳೆಯ ಕುಟುಂಬಸ್ಥರು ಆರೋಪಿಸಿದ್ದಾರೆ. ಅಲ್ಲದೆ, ಗಂಡು ಮಗು ಹುಟ್ಟಿದಾಗ, ಮಹಿಳೆಯ ತಂದೆಯೇ ಆಸ್ಪತ್ರೆಯ ವೆಚ್ಚವನ್ನು ಭರಿಸಿದ್ದರು ಎಂದು ತಿಳಿದು ಬಂದಿದೆ.

ಪತಿ ಪತ್ನಿಯನ್ನು ಇರರಿದ ಬಳಿಕ ಆಕೆ ಸಹಾಯಕ್ಕಾಗಿ ನೆರೆ ಮನೆಯವರನ್ನು ಕೂಗಿದ್ದಾರೆ. ಈ ವೇಳೆ, ಪ್ರದೇಶದ ಕೆಲವು ಯುವಕರು ಇದನ್ನು ಗಮನಿಸಿ ಆಸ್ಪತ್ರೆಗೆ ಕರೆದೊಯ್ದಿದ್ದಾರೆ. ಆದರೆ, ಆ ವೇಳೆಗೆ ಆಕೆ ಮೃತಪಟ್ಟಿದ್ದಾಳೆ ಎಂದು ವೈದ್ಯರು ತಿಳಿಸಿದ್ದಾರೆ. ಇನ್ನು, ಘಟನೆ ಬಳಿಕ ಮನೆ ತೊರೆದಿದ್ದ ಪತಿ, ನಂತರ ಬಟ್ಟೆ ತೆಗೆದುಕೊಂಡು ಹೋಗಲು ಪುನ: ವಾಪಸ್ ಬಂದಿದ್ದ. ಈ ವೇಳೆ ಪೊಲೀಸರ ಕೈಯಲ್ಲಿ ಸಿಕ್ಕಿಬಿದ್ದಿದ್ದಾನೆಂದು ನೆರೆ ಹೊರೆಯವರು ತಿಳಿಸಿದ್ದಾರೆ. ಕೊಲೆ ಹಾಗೂ ವರದಕ್ಷಿಣೆಗೆ ಡಿಮ್ಯಾಂಡ್ ಮಾಡಿದ ಆರೋಪದಡಿ ದಿಲ್ಲಿಯ ವ್ಯಕ್ತಿ ವಿರುದ್ಧ ಕೇಸ್ ದಾಖಲಿಸಿದ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.

ಮಹಿಳೆಯ ಮೃತದೇಹವನ್ನು ಪೋಸ್ಟ್‌ಮಾರ್ಟಂಗೆ ಕಳುಹಿಸಲಾಗಿದ್ದು, ನಂತರ ಡೆಡ್‌ಬಾಡಿಯನ್ನು ಕುಟುಂಬ ವರ್ಗಕ್ಕೆ ಹಸ್ತಾಂತರ ಮಾಡಲಿದ್ದಾರೆ. ಇನ್ನು, ಸಂಬಂಧಿಕರ ನಿವಾಸಕ್ಕೆ ಮಗನನ್ನು ಕಳಿಸಲಾಗಿದೆ. ತಾನು ಖ್ಯಾತ ಅಡುಗೆಯವ ( ಚೆಫ್ ) ಎಂದು ಸುಳ್ಳು ಹೇಳಿಕೊಂಡಿದ್ದ ರಾಜೇಶ್ 2014ರಲ್ಲಿ ರೇಣು ಜತೆ ವಿವಾಹವಾಗಿದ್ದ. ಆದರೆ, ಆತ ಚೆಫ್‌ನ ಸಹಾಯಕನಾಗಿದ್ದ ಎಂಬುದು ನಂತರ ತಿಳಿದುಬಂದಿದೆ.