ನವದೆಹಲಿ: ಸಲಿಂಗಕಾಮಿ ಮಹಿಳಾ ಜೋಡಿಯೊಂದು ಅಹಮದಾಬಾದ್ನ ಶಬರಮತಿ ನದಿಯಲ್ಲಿ ಮುಳುಗಿ ಆತ್ಮಹತ್ಯೆ ಮಾಡಿಕೊಂಡಿರುವ ಘಟನೆ ಸೋಮವಾರ ನಡೆದಿದೆ. ಆತ್ಮಹತ್ಯೆಗೂ ಮುನ್ನ ಮೂರು ವರ್ಷದ ಹೆಣ್ಣು ಮಗುವನ್ನೂ ನೀರಿಗೆ ಎಸೆಯಲಾಗಿದ್ದು, ಮೃತ ಮಗು ಸಲಿಂಗಕಾಮಿಯೊಬ್ಬಳ ಮಗಳೆಂದು ಹೇಳಲಾಗಿದೆ.
ಸೋಮವಾರ ಬೆಳಗ್ಗೆ ನಸುಕಿನಲ್ಲೇ ಈ ಘಟನೆ ನಡೆದಿದ್ದು, ಶಬರಮತಿ ನದಿಗೆ ಅಡ್ಡಲಾಗಿರುವ ಎಲಿಸ್ಬ್ರಿಡ್ಜ್ ನಿಂದ ನದಿಗೆ ಹಾರಿ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಅದಕ್ಕೂ ಮುನ್ನಾ ಮಗುವನ್ನು ಕೂಡ ಸೇತುವೆ ಮೇಲಿಂದ ನದಿಗೆ ಎಸೆದು ಹತ್ಯೆ ಮಾಡಿದ್ದಾರೆ ಎಂದು ಅಹಮದಾಬಾದ್ನ ಮಹಿಳಾ ಪೊಲೀಸ್ ಠಾಣೆಯ ಇನ್ಸ್ಪೆಕ್ಟರ್ ಎಂ.ಎಸ್. ಸಿಂಗ್ ತಿಳಿಸಿದ್ದಾರೆ.
ಆತ್ಮಹತ್ಯೆ ಸಂಬಂಧ ಪೊಲೀಸರಿಗೆ ಎರಡು ಡೆತ್ನೋಟ್ ಸಿಕ್ಕಿದ್ದು, ಒಂದು ಪೇಪರ್ ಪ್ಲೇಟ್ ಮೇಲೆ ಹಾಗೂ ಇನ್ನೊಂದನ್ನು ನದಿ ಮುಂಭಾಗದ ಗೋಡೆಯ ಮೇಲೆ ಬರೆಯಲಾಗಿದೆ. ಎರಡು ಡೆತ್ನೋಟ್ಗಳಲ್ಲೂ ನಾವಿಬ್ಬರು ಒಂದಾಗಲು ಈ ಪ್ರಪಂಚ ಬಿಡುವುದಿಲ್ಲ. ನಮ್ಮ ಸಂಬಂಧವನ್ನು ಅರ್ಥ ಮಾಡಿಕೊಂಡು ನಮ್ಮನ್ನು ಸುಮ್ಮನೇ ಬದಕಲು ಬಿಡುವುದಿಲ್ಲ. ಹೀಗಾಗಿ ನಾವು ಈ ಪ್ರಪಂಚ ಬಿಡುತ್ತಿದ್ದೇವೆ ಎಂದು ಬರೆದಿದ್ದಾರೆ.
ಮೃತರನ್ನು ಆಶಾ ಠಾಕೂರ್(30) ಹಾಗೂ ಭಾವನಾ ಠಾಕೂರ್(28) ಎಂದು ಗುರುತಿಸಲಾಗಿದ್ದು, ಮೃತ ಹೆಣ್ಣು ಮಗು ಮೇಘಾ, ಆಶಾಗೆ ಸೇರಿದ್ದಾಗಿದೆ. ಭಾವನಾ ಠಾಕೂರ್ರಿಗೆ ಇಬ್ಬರು ಗಂಡು ಮಕ್ಕಳಿದ್ದಾರೆ.
Comments are closed.