ದೇಶದ 14 ಸಿಟಿಗಳಲ್ಲಿ ಹೆಚ್ಚಿರುವ ಅಪಾಯಕಾರಿ ಧೂಳಿನ ಕಣಗಳು

ಹೊಸದಿಲ್ಲಿ: ವಿಶ್ವದಲ್ಲಿ ಕೆಟ್ಟ ವಾತಾವರಣ ಹೊಂದಿರುವ 15 ನಗರಗಳ ಪೈಕಿ 14 ಭಾರತದಲ್ಲೇ ಇದೆ.
ವಿಶ್ವ ಆರೋಗ್ಯ ಸಂಸ್ಥೆಯ ವರದಿ ಪ್ರಕಾರ, ದೇಶದ ಕಾನ್ಪುರದಲ್ಲಿ ವಾಯುಮಾಲಿನ್ಯದ ಪ್ರಮಾಣ ಹೆಚ್ಚಾಗಿದ್ದು, ಅಪಾಯಕಾರಿ ಧೂಳಿನ ಕಣಗಳು(ಪಿಎಂ 2.5ಕಾನ್ಸನ್‌ಟ್ರೇಷನ್‌) ಮಿತಿ ಮೀರಿತ್ತಿದೆ ಎಂದು ತಿಳಿಸಿದೆ.

ದೆಹಲಿ, ಜೈಪುರ, ಗುರ್‌ಗಾಂವ್, ಪಟನಾ, ಆಗ್ರ, ಮುಜಾಫರ್‌ಪುರ, ಶ್ರೀನಗರ, ಪಟಿಯಾಲ, ಜೋಧ್‌ಪುರಗಳಲ್ಲಿ ಪಿಎಂ 2.5 ಸಾಂಧ್ರತೆ ಅಧಿಕವಾಗಿರುವುದಾಗಿ ವರದಿ ಹೇಳಿದೆ. ಚೀನಾದ ಕೆಲ ನಗರಗಳು ಹಾಗೂ ಕುವೈತ್‌ನ ಅಲಿ ಸುಬಾಹ್‌ ಅಲ್‌-ಸಲೀಂ ನಗರಗಳಲ್ಲಿಯೂ ಪಿಎಂ 2.5 ಪ್ರಮಾಣ ಹೆಚ್ಚಿದೆ.

ಕೆಟ್ಟ ಗಾಳಿ ಹಾಗೂ ವಿಷ ಗಾಳಿ ಸೇವನೆಯ ಕಾರಣಗಳಿಂದ ವಾರ್ಷಿಕ ವಿಶ್ವದಲ್ಲಿ 70 ಲಕ್ಷ ಜನರು ಪ್ರಾಣ ಕಳೆದುಕೊಳ್ಳುತ್ತಿದ್ದಾರೆ. 2016ರಲ್ಲಿ ಉತ್ತಮ ಗಾಳಿ ಇಲ್ಲದ ಕಾರಣವೇ ಅಂದಾಜು 4.2 ದಶಲಕ್ಷ ಜನರು ಸಾವನ್ನಪ್ಪಿದ್ದಾರೆ. ಇದಲ್ಲದೆ ಅಡುಗೆ ಅನಿಲ ಇತ್ಯಾದಿ ಗೃಹೋಪಯೋಗಿ ಉಪಕರಣಗಳಿಂದಾಗುವ ವಾಯುಮಾಲಿನ್ಯದಿಂದ ಅಂದಾಜು 3.8 ದಶಲಕ್ಷ ಜನರು ಮೃತರಾಗಿದ್ದಾರೆ ಎಂದು ವರದಿ ತಿಳಿಸಿದೆ.

ಆರೋಗ್ಯದ ಮೇಲೆ ಕೆಟ್ಟ ಪರಿಣಾಮ
ವಾಯುಮಾಲಿನ್ಯದಿಂದ ವಯಸ್ಕರು ಹಾಗೂ ಯುವಕರಲ್ಲಿ ಸಾಂಕ್ರಾಮಿಕವಲ್ಲದ ರೋಗಗಳು ಹೆಚ್ಚಾಗುತ್ತಿದೆ. ವಾರ್ಷಿಕ ವಯಸ್ಕರ ಮರಣದ ಸಂಖ್ಯೆಯಲ್ಲಿ ಶೇ.24ರಷ್ಟು ಹೃದಯ ಸಂಬಂಧಿ ಕಾಯಿಲೆ, ಶೇ.25ರಷ್ಟು ಪಾಶ್ರ್ವವಾಯು ಹಾಗೂ ಶೇ.43ರಷ್ಟು ಶ್ವಾಸಕೋಶ ಹಾಗೂ ಉಸಿರಾಟದ ಸಮಸ್ಯೆಯಿಂದ ಸಾವನ್ನಪ್ಪುತ್ತಿದ್ದಾರೆ. ಇದಲ್ಲದೆ ಶೇ.29ರಷ್ಟು ಮಂದಿಗೆ ಶ್ವಾಸಕೋಶದ ಕ್ಯಾನ್ಸರ್‌ಗೂ ತುತ್ತಾಗುತ್ತಿರುವುದಾಗಿ ವರದಿ ತಿಳಿಸಿದೆ.

ಕಳೆದ ೨ ವರ್ಷಕ್ಕೆ ಹೋಲಿಸಿದಲ್ಲಿ ಹೊಸದಿಲ್ಲಿಯ ಪಿಎಂ 2.5 ಪ್ರಮಾಣ ಕೊಂಚ ಇಳಿಮುಖವಾಗಿದ್ದರೂ, ಹೆಚ್ಚು ಮಾಲಿನ್ಯ ಇರುವ ನಗರದ ಪಟ್ಟಿಯಿಂದ ಹೊರಬಿದ್ದಿಲ್ಲ. ಅತಿ ಹೆಚ್ಚು ಮಲಿನ ಗಾಳಿ ಹೊಂದಿರುವ ನಗರಗಳ ಪೈಕಿ ಬೆಂಗಳೂರು ಪಟ್ಟಿಗೆ ಸೇರ್ಪಡೆಯಾಗಿಲ್ಲ.

ಪಿಎಂ 2.5 ಅತ್ಯಂತ ಹಾನಿಕಾರಕ
ಸಾರಿಗೆ ವಾಹನ, ಉಷ್ಣ ವಿದ್ಯುತ್‌ ಸ್ಥಾವರ, ಬೃಹತ್‌ ಕಾರ್ಖಾನೆಗಳು ಹೊರ ಸೂಸುವ ಹೊಗೆಯಲ್ಲಿ ಅಪಾಯಕಾರಿ ಪಿಎಂ 2.5 ಕಣಗಳಿರುತ್ತದೆ. ಇವುಗಳು ಶ್ವಾಸಕೋಶದ ರಕ್ತನಾಳಗಳಿಗೆ ಘಾಸಿಯುಂಟು ಮಾಡುತ್ತವೆ.

ಅನೇಕ ಭಾಗದ ಮಾಹಿತಿಯೇ ಇಲ್ಲ
ವಿಶ್ವ ಆರೋಗ್ಯ ಸಂಸ್ಥೆಯು ಒಟ್ಟು 108 ದೇಶದ 4,300 ನಗರಗಳಿಂದ ವಾಯುಮಾಲಿನ್ಯ ಹಾಗೂ ಗಾಳಿಯಲ್ಲಿನ ಪಿಎಂ ಪ್ರಮಾಣದ ಕುರಿತು ಮಾಹಿತಿ ಸಂಗ್ರಹಿಸಲು ಉದ್ದೇಶಿಸಿತ್ತು. ಆದರೆ ಆಫ್ರಿಕಾ ಭಾಗದ ಅನೇಕ ನಗರಗಳಲ್ಲಿ ಪಿಎಂ ಪ್ರಮಾಣ, ವಾಯುಮಾಲಿನ್ಯ ಪ್ರಮಾಣ ಅಳತೆಗೆ ಅಗತ್ಯ ಮೂಲಸೌಕರ್ಯಗಳಿಲ್ಲದೇ ಇರುವುದು ಪತ್ತೆಯಾಗಿದೆ. ವೆಸ್ಟರ್ನ್‌ ಫೆಸಿಫಿಕ್‌ ವಲಯದ 47 ದೇಶಗಳ ಪೈಕಿ ಕೇವಲ 8 ದೇಶಗಳಿಂದ ಮಾತ್ರ ಮಾಹಿತಿ ಸಿಕ್ಕಿದೆ. ಭಾರತದ ಒಟ್ಟು 181 ಹಾಗೂ ಚೀನಾದ 9 ನಗರಗಳು ವಿಶ್ವ ಆರೋಗ್ಯ ಸಂಸ್ಥೆ ಜತೆ ಮಾಹಿತಿ ಹಂಚಿಕೊಂಡಿದೆ.